.jpg)
អំពើហិង្សាផ្ទុះឡើងនៅហ្ស៊េរុយសាឡិម ក្នុងពិធីដង្ហែទង់ជាតិដ៏ចម្រូងចម្រាស។ រូបថត AFP
កាលពីថ្ងៃអាទិត្យ ទី ២៩ ខែឧសភា ជនជាតិជ្វីហ្វរាប់ពាន់នាក់ បានចូលរួមក្នុងពិធីដង្ហែទង់ជាតិដ៏ចម្រូងចម្រាស ឆ្លងកាត់ក្រុងហ្ស៊េរុយសាឡិមខាងកើត ខណៈដែលក្រុមជនជាតិប៉ាឡេស្ទីនព្រមានថា ការធ្វើបែបនេះ នឹងបង្កឱ្យភាពតានតឹងជាថ្មីទៀត។
ជនជាតិជ្វីហ្វរាប់ពាន់នាក់ បានចាប់ផ្ដើមក្បួនដង្ហែទង់ជាតិរបស់ពួកគេ នៅច្រកទ្វារដាម៉ាសកាស ដែលជាច្រកចូលចម្បងទៅកាន់ភូមិភាគសាសនិកមូស្លីម ក្នុងក្រុងហ្ស៊េរុយសាឡិម។ ពួកគេបានគ្រវីទង់ជាតិអ៊ីស្រាអែល ហើយស្រែកពាក្យស្លោកថា «ជនជាតិអារ៉ាប់សមតែស្លាប់»។
ប៉ូលិសអ៊ីស្រាអែល ដែលបំពាក់ឧបករណ៍បង្ក្រាបបាតុកម្មបានធ្វើការបង្ក្រាប និងបណ្ដេញបាតុករប៉ាឡេស្ទីន ដែលព្យាយាមបិទផ្លូវមិនឱ្យក្បួនដង្ហែរបស់ជនជាតិជ្វីហ្វឆ្លងកាត់។ ភ្នាក់ងារអឌ្ឍចន្ទក្រហមប៉ាឡេស្ទីនរាយការណ៍ថា បាតុករចំនួន ៧៩ នាក់ រងរបួសដោយសារការប៉ះទង្គិចជាមួយប៉ូលិសអ៊ីស្រាអែល ដោយក្នុងនោះ យ៉ាងហោចណាស់ ២៨ នាក់ ត្រូវបញ្ជូនទៅព្យាបាលនៅមន្ទីរពេទ្យ។
រីឯនៅតំបន់វ៉េសប៊ែងវិញ ជនជាតិប៉ាឡេស្ទីនចំនួន ១៦៣ នាក់ រងរបួសក្នុងការប៉ះទង្គិចជាមួយកងកម្លាំងអ៊ីស្រាអែល ដោយក្នុងនោះមនុស្ស ១១ នាក់ បានរងរបួសដោយសារការបាញ់គ្រាប់កាំភ្លើងពិត។
នេះ គឺធៀបនឹងប៉ូលិសអ៊ីស្រាអែល ៥ នាក់ ដែលរងរបួសស្រាល។ រដ្ឋាភិបាលអ៊ីស្រាអែលនិយាយថា មនុស្សយ៉ាងហោចណាស់ ៥០ នាក់ ត្រូវបានចាប់ខ្លួន ឬឃាត់ខ្លួន ដោយសារការពាក់ព័ន្ធនឹងអំពើកុប្បកម្ម និងការវាយប្រហារលើប៉ូលិស។
ពិធីដង្ហែទង់ជាតិនេះ ត្រូវបានរៀបចំប្រចាំឆ្នាំ ដោយក្រុមជនជាតិជ្វីហ្វជាតិនិយមជ្រុល ដើម្បីរំឭកដល់ជ័យជម្នះរបស់អ៊ីស្រាអែលក្នុងសង្គ្រាមឆ្នាំ ១៩៦៧ និងការដណ្ដើមយកទីក្រុងហ្ស៊េរុយសាឡិមភាគខាងកើត៕
វីដេអូ៖
