កាលពីថ្ងៃសៅរ៍ ទី ២៨ ខែឧសភា ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) និងអធិការបតីអាល្លឺម៉ង់ លោក អូឡាហ្វ សូល (Olaf Scholz ) បានជំរុញប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) ឱ្យធ្វើ «ការចរចាដោយផ្ទាល់» ជាមួយប្រធានាធិបតីអ៊ុយក្រែន លោក វ៉ុលូឌីមៀរ ហ្សេលេនស្គី (Volodymyr Zelenskyy) ដើម្បីបានឈានដល់ «ដំណោះស្រាយការទូត» ចំពោះសង្គ្រាមបច្ចុប្បន្ន។
ការជំរុញនេះត្រូវបានធ្វើឡើង ក្នុងការសន្ទនាតាមទូរស័ព្ទរវាងមេដឹកនាំទាំង ៣។ បើតាមខុទ្ទកាល័យអធិការបតីអាល្លឺម៉ង់ លោក ម៉ាក្រុង និងលោក សូល «បានទទូចឱ្យមានបទឈប់បាញ់ទាំងស្រុង និងការដកទ័ពរុស្ស៊ី»។
រីឯលោក ពូទីន វិញ បានប្រាប់ថា ក្រុងម៉ូស្គូ បើកចំហសម្រាប់ការចាប់ផ្ដើមនូវការចរចាឡើងវិញ ជាមួយក្រុងកៀវ ប៉ុន្តែមិនបានបញ្ជាក់ថា នឹងមានការចរចា ១ ទល់ ១ រវាងមេដឹកនាំប្រទេសទាំង ២ នោះទេ។ លោក ពូទីន បានព្រមានលោក សូល និងលោក ម៉ាក្រុង ថា ការបង្កើនការផ្គត់ផ្គង់អាវុធទៅកាន់អ៊ុយក្រែននឹង «បង្កើនអស្ថិរភាពបន្ថែមទៀត» ទៅលើសង្គ្រាមនេះ។
គណៈប្រតិភូរបស់រុស្ស៊ី និងអ៊ុយក្រែន បានជួបគ្នាជាច្រើនលើក ចាប់តាំងពីរុស្ស៊ីចាប់ផ្ដើមការឈ្លានពានកាលពីចុងខែកុម្ភៈ ប៉ុន្តែការចរចា បានជាប់គាំងមិនទៅមុខ ដោយលោក ហ្សេលេនស្គី ធ្លាប់លើកឡើងថា លោកមិនសូវ «ចង់» ធ្វើការចរចាជាមួយរុស្ស៊ី ប៉ុន្តែទទួលស្គាល់ថា ការសន្ទនាបែបនេះអាចនឹងជួយបញ្ចប់សង្គ្រាម។
យ៉ាងណាមិញ លោក សូល និងលោក ម៉ាក្រុង ក៏បានជំរុញរុស្ស៊ី ឱ្យមានការដោះលែងទាហានរបស់អ៊ុយក្រែន ទាំង ២ ៥០០ នាក់ ដែលបានក្លាយខ្លួនជាឈ្លើយសឹក បន្ទាប់ពីមានការឡោមព័ទ្ធនៅក្រុងម៉ារី-អូប៉ូល៕
វីដេអូ៖