.jpg)
បុគ្គលិកដើរកាត់អក្សររបស់ក្រុមហ៊ុន Alibaba នៅទីស្នាក់ការកណ្តាល ក្នុងទីក្រុង Hangzhou កាលពីថ្ងៃទី ២៧ ខែឧសភា។ AFP
ក្រុមហ៊ុនបណ្ដាក់ទុន (Venture capital) ដែលវិនិយោគលើក្រុមហ៊ុនទើបតែចាប់ផ្ដើម (startups) នៅឥណ្ឌា និងអាស៊ីអាគ្នេយ៍ កំពុងបំបែកកំណត់ត្រានៃការរៃអង្គាសប្រាក់វិនិយោគថ្មី ខណៈពេលដែលវិនិយោគិនបរទេសជាច្រើន កំពុងធ្វើការចាកចេញពីទីផ្សារប្រទេសចិន។
ចាប់ពីដើមឆ្នាំ ២០២២ រហូតមកដល់ពេលនេះ ក្រុមហ៊ុនបណ្ដាក់ទុន ដែលផ្ដោតលើឥណ្ឌា និងអាស៊ីអាគ្នេយ៍បានរៃអង្គាសប្រាក់វិនិយោគថ្មីបាន $៣,១ ពាន់លាន ដែលជិតស្មើតួលេខរៃអង្គាស $៣,៥ ពាន់លាន ពេញ ១ ឆ្នាំ ២០២១។ នេះបើធៀបទៅនឹងការធ្លាក់ចុះយ៉ាងខ្លាំងក្លារបស់ក្រុមហ៊ុនបណ្ដាក់ទុននៅប្រទេសចិន ដែលឃើញការរៃអង្គាសធ្លាក់ចុះពី $២៧,២ ពាន់លាន នៅឆ្នាំ ២០២១ ដោយមកសល់ត្រឹមតែ $២,១ ពាន់លាន នៅឆ្នាំនេះ។
កាលពីដើមខែនេះ ក្រុមហ៊ុនបណ្ដាក់ទុនសិង្ហបុរី East Venture បាននិយាយថា ពួកគេរៃអង្គាសបានប្រាក់ $៥៥០ លាន ធ្វើឱ្យមូលនិធិវិនិយោគ ដែលពួកគេគ្រប់គ្រងកើនឡើងដល់ជាង $១ ពាន់លាន។ នៅខែមេសា ក្រុមហ៊ុនបណ្ដាក់ទុនឥណ្ឌា Elevation Capital និយាយថា ខ្លួនរៃអង្គាសបានប្រាក់ចំនួន $៦៧០ ដុល្លារ។
ក្រុមហ៊ុនបណ្ដាក់ទុនសិង្ហបុរី Wavemaker Partners បានទទួលប្រាក់ចំនួន $១៣៦ លាន កាលពីខែមីនា ដែលជាការកើន ២២ ភាគរយ បើធៀបនឹងខែកុម្ភៈ។ នាយកគ្រប់គ្រងនៃក្រុមហ៊ុននេះ លោក ផល សាន់តូស និយាយថា លោកសង្កេតឃើញការប្រែប្រួលបរិយាកាសជាពិសេសក្នុងចំណោមវិនិយោគិនអាមេរិក។
ក្រុមហ៊ុនបណ្ដាក់ទុនទាំងនេះ ពីវិនិយោគិនជាច្រើនប្រភេទ ដែលរួមមានមូលនិធិសោធននិវត្តន៍ មូលនិធិឧបត្ថម្ភសាកលវិទ្យាល័យ និងសេដ្ឋី។ អាស៊ីអាគ្នេយ៍ និងឥណ្ឌា បានផុសឡើងជាទីផ្សារដ៏ទាក់ទាញមួយ ដោយសារកំណើនយ៉ាងរហ័សនៃក្រុមហ៊ុនទើបតែចាប់ផ្ដើម (Startups) ក្នុងរយៈពេលប៉ុន្មានឆ្នាំចុងក្រោយនេះ ដែលរួមមានការចុះបញ្ជីទីផ្សារភាគហ៊ុនរបស់ក្រុមហ៊ុនធំៗ ដូចជា Grab របស់សិង្ហបុរី និង Zomato របស់ឥណ្ឌា។
ស្របពេលជាមួយគ្នានេះ គេបានសង្កេតឃើញការប្រែប្រួលយ៉ាងខ្លាំងនៅក្នុងគោលនយោបាយរបស់រដ្ឋាភិបាលចិន។ កាលពីឆ្នាំមុន ក្រុងប៉េកាំង បានហាមឃាត់មិនឱ្យមានក្រុមហ៊ុនស៊ីឈ្នួលបង្រៀនគួរ ធ្វើឱ្យខូចក្រុមហ៊ុនអប់រំជាច្រើន ដែលទទួលការវិនិយោគពីក្រុមហ៊ុនបណ្ដាក់ទុន។ ក្រុមហ៊ុនបណ្ដាក់ទុនរងការបាត់បង់ខ្លាំងជាងគេដោយសារការហាមឃាត់នេះ គឺ SoftBank Group របស់ជប៉ុន ដែលបានធ្វើការរាយការណ៍ថា ការវិនិយោគរបស់ពួកគេតម្លៃ $៧០០ លាន ទៅលើក្រុមហ៊ុនចិន Zuoyebang បានធ្លាក់នៅត្រឹម $១០០ លានប៉ុណ្ណោះ។
រដ្ឋាភិបាលចិនក៏បានធ្វើការបង្ក្រាបទៅលើក្រុមហ៊ុនបច្ចេកវិទ្យាធំៗផង ដែលរួមមានវិធានការ ដើម្បីធានាឱ្យបាននូវ «វិបុលភាពរួម» និងបទប្បញ្ញត្តិពាក់ព័ន្ធការគ្រប់គ្រងទិន្នន័យអ្នកប្រើប្រាស់ជាជនជាតិចិន។ វិធានការទាំងនេះ បានធ្វើឱ្យភាគហ៊ុន នៃក្រុមហ៊ុនធំៗ ដូចជា Alibaba និង Tencent ធ្លាក់ចុះយ៉ាងខ្លាំង។
ទើបតែថ្មីៗនេះទេ ដែលក្រុងប៉េកាំង បង្ហាញសញ្ញាថា ការបង្ក្រាបនឹងត្រូវតែបញ្ចប់។ ការិយាល័យនយោបាយបក្សកុម្មុយនីស្តចិនបានសន្យាកាលពីខែមុន ដើម្បី «លើកកម្ពស់ការអភិវឌ្ឍប្រកបដោយសុខភាពល្អនៃសេដ្ឋកិច្ច»។ វិធានការបិទខ្ទប់ដ៏តឹងរ៉ឹងនៅទីក្រុងសៀងហៃ និងទីក្រុងប៉េកាំង គឺនៅតែបង្កអស្ថិរភាពសេដ្ឋកិច្ច និងធ្វើឱ្យវិនិយោគិនចាកចេញពីប្រទេស។
យ៉ាងណាមិញ រំហូរចូលនៃមូលធនចេញពីចិន គឺជាកត្តាជំរុញមួយសម្រាប់ក្រុមហ៊ុន Startup នៅតំបន់ទាំង ២ ប៉ុន្តែបញ្ហាសេដ្ឋកិច្ចនៅតំបន់ដទៃទៀតក៏នៅតែបន្តផលប៉ះពាល់ដែរ។ ជាមួយគ្នានេះ ក្រុមហ៊ុន Grab និងក្រុមហ៊ុនទើបតែចុះបញ្ជីទីផ្សារភាគហ៊ុនថ្មីៗនេះ បានឃើញតម្លៃភាគហ៊ុនរបស់ពួកគេ ធ្លាក់ចុះជាង ៥០ ភាគរយ នៅក្នុងឆ្នាំនេះ៕
