កាលពីថ្ងៃចន្ទ ទី៣០ ខែឧសភា មេដឹកនាំរបស់ក្រុមផ្ដាច់ខ្លួន នៅតំបន់អូសេទីខាងត្បូងនៃប្រទេសហ្សកហ្ស៊ី បានប្រកាសផ្អាកការរៀបចំការបោះឆ្នោតប្រជាមតិអំពីការរួមជាទឹកដីរបស់រុស្ស៊ី រហូតដល់ពេលដែលការពិគ្រោះយោបល់ជាមួយក្រុងម៉ូស្គូត្រូវបានបញ្ចប់។
តំបន់អូសេទីខាងត្បូង គឺជាចំណុចកណ្ដាលនៃសង្គ្រាមហ្សកហ្ស៊ី-រុស្ស៊ី កាលពីឆ្នាំ២០០៨ ដែលក្រោយមកត្រូវបានវិមានក្រឹមឡាំងទទួលស្គាល់ជារដ្ឋឯករាជ្យ និងបង្កើតមូលដ្ឋានយោធាអចិន្ត្រៃយ៍ នៅទីនោះ។ រហូតមកដល់ពេលនេះ មានតែរុស្ស៊ីទេ ដែលទទួលស្គាល់ឯករាជ្យភាពរបស់អូសេទីខាងត្បូង ខណៈពេលដែលសហគមន៍អន្តរជាតិទទួលស្គាល់តំបន់នេះថា ជាទឹកដីរបស់ប្រទេសហ្សកហ្ស៊ី។
ប្រធានាធិបតីក្រុមផ្ដាច់ខ្លួនលោក អាឡាន ហ្គាឡូអេវ (Alan Gagloyev) បានចេញក្រឹត្យមួយថា៖ «រហូតដល់ការបញ្ចប់ការពិគ្រោះយោបល់ សូមផ្អាកក្រឹត្យរបស់ប្រធានាធិបតី ចុះថ្ងៃទី ១៣ ខែឧសភា ឆ្នាំ២០២២ ស្ដីអំពីការរៀបចំប្រជាមតិនៃសាធារណរដ្ឋអូសេទីខាងត្បូង»។
ក្នុងក្រឹត្យកាលពីថ្ងៃទី ១៣ ខែឧសភា លោកហ្គាឡូអេវ បានឱ្យដឹងថា លោកគ្រោងរៀបចំការធ្វើបោះឆ្នោតប្រជាមតិនេះ នៅថ្ងៃទី ១៧ ខែកក្កដា។ ប្រទេសហ្សកហ្ស៊ីថ្កោលទោសផែនការធ្វើប្រជាមតិនេះថាមិនទទួលយកបានទេ។
លោកហ្គាឡូអេវ បាននិយាយថា ការផ្អាកនេះ គឺដោយសារ «ភាពមិនច្បាស់លាស់នៃផលប៉ះពាល់ផ្លូវច្បាប់នៃសំណួរដាក់ជូនក្នុងប្រជាមតិ» និង «ភាពមិនអាចទទួលយកបាននៃការសម្រេចចិត្តជាឯកតោភាគីនៃប្រជាមតិលើបញ្ហា ដែលប៉ះពាល់ដល់សិទ្ធិ និងផលប្រយោជន៍ស្របច្បាប់របស់សហព័ន្ធរុស្ស៊ី»៕
វីដេអូ៖