កាលពីថ្ងៃអាទិត្យ ទី២៩ ខែឧសភា ក្រសួងហិរញ្ញវត្ថុអាល្លឺម៉ង់ បានប្រកាសថា គណបក្សនយោបាយនៃប្រទេសនេះ បានយល់ព្រមធ្វើវិសោធនកម្មលើរដ្ឋធម្មនុញ្ញ ដើម្បីអនុញ្ញាតឱ្យបង្កើតមូលនិធិការពារជាតិពិសេសផ្អែកលើកម្ចីឥណទាន ១០០ពាន់លានអឺរ៉ូ ($១០៧,៣៥ពាន់លាន) ដែលត្រូវបានស្នើឡើង បន្ទាប់ពីការឈ្លានពាន។
រដ្ឋាភិបាលចម្រុះដឹកនាំដោយគណបក្សឆ្វេង-កណ្ដាលនិយម ប្រជាធិបតេយ្យសង្គម (SDP) និងគណបក្សប្រឆាំងស្ដាំកណ្ដាលនិយម និយាយថា ពួកគេមានសំឡេងភាគច្រើន ២ ភាគ ៣ គ្រប់គ្រាន់ សម្រាប់ធ្វើការលើកឡើងមូលនិធិនេះពីដែនកំណត់ខ្ចីបំណុលចែង ក្នុងរដ្ឋធម្មនុញ្ញរបស់អាល្លឺម៉ង់។
សំឡេង ២ ភាគ ៣ នេះ ត្រូវបានសម្រេចបន្ទាប់ពីការចរចា រវាងរដ្ឋមន្ត្រីហិរញ្ញវត្ថុលោក គ្រីស្ទៀន លីនន័រ រដ្ឋមន្ត្រីការពារជាតិលោកស្រី គ្រីស្ទីន ឡាំប្រេក រដ្ឋមន្ត្រីការបរទេសលោកស្រី អាណាលេណា ប៊ែរប៊ុក និងតំណាងបក្សប្រឆាំងលោក ម៉ាឌីស មីឌែលប៊ឺក។
ថវិកាទាំងហ្នឹង ត្រូវចំណាយក្នុងរយៈពេលជាច្រើនឆ្នាំ ដើម្បីបង្កើនកញ្ចប់ថវិកាការពារជាតិរបស់អាល្លឺម៉ង់ទៅដល់ ៥០ពាន់លានអឺរ៉ូ ក្នុងមួយឆ្នាំ និងដើម្បីអនុញ្ញាតឱ្យប្រទេសនេះ បំពេញគោលដៅរបស់អង្គការណាតូក្នុងការចំណាយយ៉ាងហោចណាស់ ២ ភាគរយ នៃ GDP ទៅលើវិស័យការពារជាតិក្នុងមួយឆ្នាំ៕