The Phnom Penh Post Search

Search form




Logo of Phnom Penh Post newspaper Phnom Penh Post - ការ​បោះ​ឆ្នោត​​ ត្រូវ​បាន​គេ​មើល​ឃើញ​ថា​ ជា​ការ​បង្កើន​ហានិភ័យ​នយោបាយ​នៅ​កូឡុំប៊ី

ការ​បោះ​ឆ្នោត​​ ត្រូវ​បាន​គេ​មើល​ឃើញ​ថា​ ជា​ការ​បង្កើន​ហានិភ័យ​នយោបាយ​នៅ​កូឡុំប៊ី

Content image - Phnom Penh Post
បេក្ខជនប្រធានាធិបតីកូឡុំប៊ី លោក Petro បង្ហាញសន្លឹកឆ្នោត អំឡុងពេលបោះឆ្នោត នៅក្រុង Bogota ​កាលពីថ្ងៃទី ២៩ ខែឧសភា។ AFP

ការ​បោះ​ឆ្នោត​​ ត្រូវ​បាន​គេ​មើល​ឃើញ​ថា​ ជា​ការ​បង្កើន​ហានិភ័យ​នយោបាយ​នៅ​កូឡុំប៊ី

ការ​បោះឆ្នោត​​ជ្រើសរើស​ប្រធានាធិបតី​របស់​ប្រទេស​កូឡុំប៊ី​ ដែល​ជា​ការ​ប្រជែង​គ្នា​​រវាង​​អតីត​​ទ័ព​ព្រៃ​​ឆ្វេង​​​និយម​​ ​និង​​មហាសេដ្ឋី​​អចលនទ្រព្យ​​ប្រជានិយម​ ត្រូវ​​បាន​គេ​មើល​ឃើញ​ថា ជា​ការ​បង្ក​​ឱ្យ​​មាន​ភាព​ច្របូកច្របល់​ និង​ទំនង​​​​ជា​​នឹង​​បង្កើន​​ហានិភ័យ​​នយោបាយ​​​នៅ​​ក្នុង​ប្រទេស​​។​

ដូច​ការ​រំពឹង​ទុក លោក Gustavo Petro ​ឈ្នះ​ជុំទី​១ កាល​ពី​ថ្ងៃ​អាទិត្យ ជាមួយ​នឹង​សំឡេង​ ៤០​%។ អតីត​អភិបាល​ក្រុង​បូហ្គោ​តា ​វ័យ​​ ៦២ ​ឆ្នាំ ​ដែល​កំពុង​ និង​ជា​មេ​ដឹកនាំ​ឆ្វេង​និយម​​​ដំបូង​របស់​កូឡុំប៊ី លោក​សន្យា​ថា នឹង​​ដំឡើង​ពន្ធ​លើ​អ្នក​មាន​បញ្ចប់​ការ​រុករក​ឥន្ធនៈ​ហ្វូស៊ីល​​ថ្មី ​និង​​ផ្តល់​អាទិភាព​​ដល់​ការ​វិនិយោគ​ក្នុង​វិស័យ​កសិកម្ម​។​

ដោយ​ឡែក​បេក្ខភាព​គូ​ប្រជែង​របស់​លោក​នោះ គឺ​អ្នក​ជំនួញ​​មហាសេដ្ឋី ​និង​អតីត​អភិបាល​ក្រុង Bucaramanga គឺ​លោក Rodolfo Hernandez ទទួល​បាន​តែ ២៨​% នៃ​ចំនួន​ឆ្នោត​សរុប​ប៉ុណ្ណោះ​ ពោល​គឺ​​​ច្រើន​ជាង​​តួលេខ​ដែល​បាន​ព្យាករ​ក្នុង​ការ​ស្ទង់​មតិ​ទ្វេដង​​​នៅ​ក្នុង​ខែ​មេសា​។

ដោយសារ​តែ​ជនជាតិ​​កូឡុំប៊ី​ប្រដូច​លោក​​ Hernandez ទៅ​​នឹង​​​​​​លោក ដូណាល់ ត្រាំ ​ព្រោះ​​​បុគ្គលិក​លក្ខណៈ​មិន​​​​ល្អ​​​របស់​​​លោក និង​ឧត្តមគតិ​​អភិរក្ស ជាហេតុ​​ធ្វើ​ឱ្យ​ធ្លាក់​ប្រជាប្រិយភាព​វិញ ​​នៅ​​ប៉ុន្មាន​​ថ្ងៃ​​ថ្មីៗ​នេះ។

អ្នកស្រី Karla Schiaffino អ្នក​វិភាគ​ជាន់​ខ្ពស់​នៅ​អាមេរិក​ឡាទីន​នៃ​វិទ្យាស្ថាន​ Verisk Maplecroft បាន​និយាយ​ថា​៖ «លោក​ Gutiérrez បាន​បរាជ័យ​លើ​គោល​នយោបាយ​​សិទ្ធិ​ប្រពៃណី ​និង​គោល​នយោបាយ​ Uribismo (គោល​នយោបាយ​បង្កើត​ឡើង​ដោយ​ប្រធានាធីបតី​កូឡុំប៊ី​ចាស់​) ដែល​ជា​ជំហាន​ ដើម្បី​ឈាន​​ទៅ​ជុំ​បន្ទាប់»។

អ្នកស្រី​បន្ថែម​ថា៖ «ដោយ​ឡែក​ លោក​ Hernández ដែល​ទើប​លេច​មុខ​ជា​អ្នក​ប្រជែង​ក្នុង​ខែ​ចុង​ក្រោ​យ​ រហូត​ឈាន​ដល់​ថ្ងៃ​បោះ​ឆ្នោត​ ​បង្ហាញ​ការ​​បដិសេធ​ចំពោះ​នយោបាយ​ប្រពៃណី​​ ដោយ​ជំរុញ​គាត់​ឱ្យ​​នាំមុខ​​ Gutiérrez និង​កណ្តាល​ស្តាំ​និយម​ លោក Sergio Fajardo ដែល​​ជា​អតីត​អភិបាល​ក្រុង Medellín។ ការ​បោះឆ្នោត​​ប្រឆាំង និង​នយោបាយ​​ប្រពៃណី​​ ​ផ្តល់​​ការ​លួង​លោម​​តិចតួច​សម្រាប់​​វិនិយោគិន​ ដែល​កំពុង​​រក​ឱកាស​។​ អ្វី​ដែល​​ត្រូវ​រំពឹង​​ពី​​​រដ្ឋាភិបាល​​បន្ទាប់​ គឺ​មិន​​គិត​​ពី​លទ្ធផល​​​នៃ​​ការ​បោះ​ឆ្នោត​បន្ទាប់​ឡើយ​»។​

អ្នកស្រី Schiaffino ​ព្យាករ​​ថា សំឡេង​ឆ្នោត​របស់​លោក Hernández ទំនង​ជា​កើន​ឡើង​មុន​ការ​​បោះ​ឆ្នោត ដោយសារ​​​សំណើ​សេដ្ឋកិច្ច​ ដែល​​​អ្នក​បោះឆ្នោត​​កំពុង​តែ​រំពឹង​ទុក​។

ការ​បោះ​ឆ្នោត​នេះ​កើត​ឡើង​រយៈពេល ១ ​ឆ្នាំ បន្ទាប់​ពី​ប្រទេស​កូឡុំប៊ី ​ត្រូវ​ប្រឈម​នឹង​ការ​តវ៉ា​ដោយ​​ហិង្សា ដែល​បាន​បណ្តាល​ឱ្យ​មនុស្ស​យ៉ាង​ហោច​ណាស់​​ ៤៦ នាក់​ស្លាប់​។ នេះ​បើ​យោង​តាម​អង្គការ​សហប្រជាជាតិ។

ការ​តវ៉ា​ប្រឆាំង​នេះ​ផង​ដែរ​ ក៏​​បណ្ដាល​ឱ្យ​មាន​​ការ​យក​ពន្ធ​​ខ្ពស់​លើ​អ្នក​ដែល​មាន​​ចំណូល​ទាប និង​មធ្យម ដោយ​ទាមទារ​ឱ្យ​មាន​ការ​កែ​​លម្អ​​ទូលំទូលាយ​ លើ​សមភាព​ និង​សេវា​សាធារណៈ​​សំខាន់ៗ​ ដូចជា​សុខភាព និង​ការ​អប់រំ។

រយៈពេល​ ១១ ខែ​កន្លង​មក​នេះ ទោះជា​គេ​មើល​ឃើញ​មាន​ភាព​ស្ងប់ស្ងាត់​នៅ​តាម​ដង​ផ្លូវ​នៃ​ទី​ក្រុង​ធំៗ​របស់​​កូឡុំប៊ី​ក៏​ដោយ ក៏​ប្រទេស​នេះ​អាច​នឹង​ប្រឈម​នូវ​​រលក​បាតុកម្ម​ថ្មី​នៅ​សប្តាហ៍​ខាង​មុខ​នេះ។ នេះ​បើ​យោង​តាម​អ្នកស្រី Schiaffino។

អ្នកស្រី​ថា​៖​ «តាម​ទស្សនៈ​របស់​​​យើង ​ហានិភ័យ​ទាំង​នេះ​នឹង​កើន​ឡើង​មុន​នឹង​គេ​ប្រកាស​លទ្ធផល​នៃ​ការ​បោះឆ្នោត​ថ្ងៃទី ១៩ ខែ​មិថុនា​ទៀត។ ​ប្រសិន​បើ​លោក Hernández ឈ្នះ ក្តី​បារម្ភ​ពី​ភាព​មិន​លម្អៀង​នៃ​ដំណើរការ​បោះឆ្នោត​​ និង​​ភាព​ត្រឹមត្រូវ​ចំពោះ​លទ្ធផល​នៃ​ការ​បោះឆ្នោត​នឹង​ជំរុញ​ឱ្យ​មាន​ហានិភ័យ​នៃ​ភាព​ចលាចល​នៅ​ក្នុង​តំបន់​ទីក្រុង​ធំ​ៗ ដោយ​ការ​តវ៉ា​ផ្តោត​​លើ​រដ្ឋាភិបាល ដែល​កំពុង​បន្ត​មាន​ និង​រដ្ឋាភិបាល​​ថ្មី​ថែម​ទៀត​ផង​»។

ការ​ស្ទង់​មតិ​ថ្មីៗ​នះ កាន់​តែ​បង្ហាញ​ការ​​មិន​ទុក​ចិត្ត​​កាន់​តែ​ខ្លាំង​ឡើង​ក្នុង​ស្ថាប័ន​ភាគ​ច្រើន​របស់​ប្រទេស​ រួម​ទាំង​សមាជ​គណបក្ស​នយោបាយ​ ​ប៉ូលិស យោធា សារព័ត៌មាន និង​មន្ត្រី​អត្រានុកូលដ្ឋានជាតិ ដែល​ជា​ស្ថាប័ន​បោះឆ្នោត​​សំខាន់​មួយ​។

គេ​ក៏​ចាប់​ឃើញ​មាន​​អំពើ​ហិង្សា ​ដែល​រាប់​បញ្ចូល​​ទាំង​បទបញ្ជា​ស្នាក់​ក្នុង​ផ្ទះ ​ដែល​ចេញ​ ដោយ​​ក្រុម​ឧក្រិដ្ឋជន​ កាល​​​ពី​ដើម​ខែ​នេះ​​​ ​ដែល​បាន​ធ្វើ​ឱ្យ​មួយ​ផ្នែក​ធំ​នៃ​ប្រទេស​ជាប់​គាំង​យ៉ាង​ហោច​ណាស់​ ៤ ​​ថ្ងៃ​៕

អត្ថបទគួរចាប់អារម្មណ៍