The Phnom Penh Post Search

Search form




Logo of Phnom Penh Post newspaper Phnom Penh Post - កម្រិត​ឧស្ម័ន​កាបូន​លើ​ផែនដី​ក្នុង​ខែឧសភា កើន​ខ្ពស់ជាង​មុន​មាន​បដិវត្តន៍​ឧស្សាហកម្ម ៥០ ភាគរយ

កម្រិត​ឧស្ម័ន​កាបូន​លើ​ផែនដី​ក្នុង​ខែឧសភា កើន​ខ្ពស់ជាង​មុន​មាន​បដិវត្តន៍​ឧស្សាហកម្ម ៥០ ភាគរយ

Content image - Phnom Penh Post
ដេប៉ូ​ប្រេង​របស់​ក្រុមហ៊ុន​ប្រេង​រដ្ឋ Pertamina នៅ​ក្រុង Cilacap កោះ Central Java កំពុង​បញ្ចេញ​ផ្សែង​ខ្មៅ​យ៉ាង​ខ្មួលខ្មាញ់​ទៅ​ក្នុង​បរិយាកាស​។

កម្រិត​ឧស្ម័ន​កាបូន​លើ​ផែនដី​ក្នុង​ខែឧសភា កើន​ខ្ពស់ជាង​មុន​មាន​បដិវត្តន៍​ឧស្សាហកម្ម ៥០ ភាគរយ

ទីភ្នាក់ងារ​អាកាសធាតុ​សំខាន់​របស់​សហរដ្ឋ​អាមេរិក​ បាន​និយាយ​កាលពី​ថ្ងៃ​សុក្រ​ថា​ ការប្រមូលផ្តុំ​កាបូន​ឌីអុកស៊ីត ​នៅក្នុង​បរិយាកាស​ ក្នុង​ខែឧសភា កើន​ខ្ពស់ជាង​សម័យមុន​មាន​ឧស្សាហកម្ម​ដល់​ទៅ ៥០ ភាគរយ​ ដែល​ជា​កម្រិត​ខ្ពស់បំផុត មិន​ធ្លាប់មាន​លើ​ផែនដី​ ក្នុង​រយៈពេល ៤ លាន​ឆ្នាំ​កន្លងមក។

រដ្ឋបាល​មហាសមុទ្រ ​និង​បរិយាកាស​អាមេរិក (NOAA) បាន​និយាយថា បរិមាណ​កាបូន​ឌីអុកស៊ីត​នៅក្នុង​បរិយាកាស កើន​លើស​កម្រិត ៤២០​ ផ្នែក​ក្នុង​ ១​​ លាន (ppm ឬ មី​ល្លី​ក្រាម​ក្នុង​ ១​លីត្រ) ហើយ​។ គួរ​បញ្ជាក់​ផងដែរ​ថា PPM គឺជា​ឯកតា​រង្វាស់ ដែល​ប្រើ​ដើម្បី​កំណត់​បរិ​មាណនៃ​ការបំពុល​បរិយាកាស។

កាលពី​ខែឧសភា​កន្លងទៅ​កម្រិត​ឧស្ម័ន​នេះ កើន​ដល់ ៤១៩ ppm កើន​លើស​កម្រិត កាលពី​ឆ្នាំ ២០២០ ដែល​កើន​ត្រឹម ៤១៧ ppm។

រដ្ឋបាល NOAA បាន​និយាយថា ការឡើង​កម្ដៅ​​ផែនដី​ ដែល​បង្កឡើង​ដោយ​មនុស្សជាតិ​ ជាពិសេស​តាមរយៈ​ការផលិត​អគ្គិសនី ​ដោយ​ប្រើ​ឥន្ធនៈ​ហ្វូ​ស៊ី​ល​ ការដឹកជញ្ជូន​ ការផលិត​ស៊ីម៉ងត៍ ឬ​សូម្បីតែ​ការកាប់បំផ្លាញ​ព្រៃឈើ​ ជាហេតុ​បង្កឱ្យមាន​ការកើនឡើង​កម្រិត​ឧស្ម័ន​កាបូន​នេះ។

គួរកត់សម្គាល់​ផងដែរ​ថា ឧស្ម័ន​កាបូន​ គឺជា​ឧស្ម័ន​ផ្ទះ​កញ្ចក់ ​ដែល​ខ្ទប់​កម្ដៅលើ​អាកាស បណ្តាលឱ្យ​កើន​កម្ដៅផែនដី​បន្តិចម្តងៗ ខណៈ​ឧស្ម័ន​នេះ អាច​បណ្ដែត​នៅក្នុង​បរិយាកាស និង​មហាសមុទ្រ​រាប់ពាន់​ឆ្នាំ។

រដ្ឋបាល NOAA បាន​កត់សម្គាល់ថា ឥទ្ធិពល​ការឡើង​កម្ដៅ​លើ​ផែនដី កំពុង​បង្កឱ្យមាន​ផលវិបាក​យ៉ាងខ្លាំង ដូចជាការកើនឡើង​នៃ​រលក​កម្ដៅ​គ្រោះរាំងស្ងួត អគ្គិភ័យ ឬ​ទឹកជំនន់​ជាដើម។
លោក Pieter Tans អ្នកវិទ្យាសាស្ត្រ នៅ​មន្ទីរពិសោធន៍ និង​ត្រួតពិនិត្យ​អាកាសធាតុ​សកល​ ក្នុង​​រដ្ឋបាល​ NOAA បាន​និយាយថា៖ «កម្រិត​កាបូនឌីអុកស៊ីត កើន​ឡើងដល់​កម្រិត​ខ្ពស់បំផុត ដែល​យើង​មិន​ធ្លាប់​ជួបប្រទះ​ពីមុន​មក ហើយ​វា​មិនមែនជា​រឿង​ថ្មី​ទេ។ យើង​បានដឹង​ពី​រឿងនេះ​អស់​រយៈពេល​កន្លះ​សតវត្សរ៍​មកហើយ ហើយ​មិនបាន​ធ្វើ​អ្វី​ធំដុំ ដើម្បី​ជួយ​កាត់បន្ថយ​វា​ទេ។ ខ្ញុំ​មិនដឹងថា ពេលណា​ទើប​យើងទាំងអស់គ្នា​ភ្ញាក់ខ្លួន​នោះទេ»។

មុនពេល​បដិវត្តន៍​ឧស្សាហកម្ម​កម្រិត​នៃ​ឧស្ម័ន​កាបូ​និក ​បាន​រក្សា​ជា​ស្ថិរភាព​ នៅត្រឹម​កម្រិត ២៨០ ppm ដែលជា​កម្រិត​មួយ​រក្សាបាន​ប្រហែល ៦ ០០០ ឆ្នាំ​ មកហើយ។ នេះ​បើ​យោងតាម​រដ្ឋបាល NOAA៕

អត្ថបទគួរចាប់អារម្មណ៍