ប្រទេសអ៊ីរ៉ង់ និងវ៉េណេស៊ុយអេឡា បាន​ចុះ​ហត្ថលេខា​លើកិ​ច្ច​ព្រម​ព្រៀង​រយៈពេល ​២០ ​ឆ្នាំ លើ​កិច្ច​​សហ​ប្រតិ​បត្តិ​ការរវាង​ប្រទេស​សម្ព័ន្ធមិត្ត​ទាំង ២ ដែល​សុទ្ធតែ​ជា​​ប្រទេស​ទទួល​រ​ង​​ទណ្ឌកម្មពី​សហរដ្ឋ​អាមេរិក ក្នុង​អំឡុង​ពេល​ដំណើរ​ទស្សន​កិច្ច​របស់​ប្រធានាធិប​តីវ៉េណេស៊ុយអេឡា​ លោក Nicolas Maduro កាលពី​ថ្ងៃ​សៅរ៍​ចុង​សប្ដាហ៍​កន្លង​មក ទៅ​កាន់​សា​ធារណ​រដ្ឋ​អ៊ិស្លាម​​។

ប្រធានាធិបតី​អ៊ីរ៉ង់​ លោក Ebrahim Raisi​ បាននិ​យា​យ​​ថា​ ការ​ចុះ​ហត្ថលេ​ខា​លើ​កិច្ច​ព្រម​ព្រៀង​នេះ បង្ហាញ​ពី​ការ​ប្តេជ្ញា​ចិត្ត​​រ​បស់​មន្ត្រី​​ជាន់ខ្ពស់​នៃប្រទេស​ទាំង ២ លើ​ការអភិវឌ្ឍទំ​នា​ក់​ទំ​ន​ង ​ក្នុ​ង​វិ​ស័យ​ផ្សេងៗ​គ្នា។

លោក​ Maduro បាន​និយាយ​នៅ​ក្នុង​សន្និ​សីទ​សារ​ព័ត៌មានរួម​គ្នា ក្នុង​ទី​ក្រុង​តេអេរ៉ង់ថា កិច្ច​សហ​ប្រតិបត្តិ​ការ​នេះ​គ្រប​ដណ្ត​ប់លើ​វិ​ស័​យថាមពល និង​ហិរញ្ញ​វត្ថុ ក៏​ដូចជា ​ធ្វើការ​រួមគ្នា​​លើ​គម្រោង​ការពារ​ជាតិ​។​

លោក Maduro ក៏​បាន​ជួប​ជាមួយ​មេដឹក​នាំ​កំពូល​របស់​អ៊ីរ៉ង់ Ayatollah Ali Khamenei ដែល​បាន​និយាយ​ថា​ ការ​តស៊ូ គឺជា​វិធី​ ដើម្បីប្រឈម​មុខ​នឹង​សម្ពាធរ​បស់​សហរដ្ឋ​អាមេរិក​។

លោក Khamenei បាន​និយាយ​ថា​ ការ​សន្និដ្ឋាន​ ដែល​អាច​ទាញ​បានពី​កិច្ចសហ​ប្រត្តិបត្តិ​ការ​របស់​ប្រទេស​ទាំង ២ អ៊ីរ៉ង់ និងវ៉េណេស៊ុយអេឡា​ ​គឺ​ថា ​វិធីតែ​​ ១​​​​​គ​ត់​ប្រ​ឆាំ​ង​នឹ​​​ង​​ទណ្ឌ​កម្ម​អាមេរិក​ ត្រូវឈរ និង​ទប់​ទល់​។

លោក Khamenei បាន​ស្វាគមន៍​កិច្ច​ព្រមព្រៀង​នេះ ហើយ​បាន​អំពាវ​នាវ​ឱ្យ​មាន​កិច្ច​សហប្រតិ​បត្តិការ​កាន់​តែខ្លាំង រវាងទី​ក្រុង​តេអេរ៉ង និង​ការ៉ាកាស។ នេះ​បើយោង​តាម​សេច​ក្តី​ថ្លែង​ការណ៍ នៅ​លើ​គេហ​ទំព័រ​ផ្លូវ​ការ​របស់​លោក​៕

វីដេអូ៖