The Phnom Penh Post Search

Search form




Logo of Phnom Penh Post newspaper Phnom Penh Post - ចក្រភព​អង់គ្លេស កំពុង​គ្រោង​នឹង​សរសេរ​ច្បាប់​ក្រោយ Brexit ឡើង​វិញ ប៉ុន្តែ​អឺរ៉ុប​គំរាម​ចាត់​វិធានការ​ផ្លូវ​ច្បាប់

ចក្រភព​អង់គ្លេស កំពុង​គ្រោង​នឹង​សរសេរ​ច្បាប់​ក្រោយ Brexit ឡើង​វិញ ប៉ុន្តែ​អឺរ៉ុប​គំរាម​ចាត់​វិធានការ​ផ្លូវ​ច្បាប់

Content image - Phnom Penh Post
នាយក​រដ្ឋមន្រ្តី​អង់គ្លេស​លោក Johnson ថ្លែង​នៅ​ឯ​កិច្ច​ប្រជុំ​គណៈ​រដ្ឋមន្ត្រី​ប្រចាំ​សប្តាហ៍ ក្នុង​ក្រុង​ឡុងដ៍ កាលពី​ថ្ងៃ​ទី​ ១៧ ខែ​ឧសភា​។ AFP

ចក្រភព​អង់គ្លេស កំពុង​គ្រោង​នឹង​សរសេរ​ច្បាប់​ក្រោយ Brexit ឡើង​វិញ ប៉ុន្តែ​អឺរ៉ុប​គំរាម​ចាត់​វិធានការ​ផ្លូវ​ច្បាប់

កាល​ពី​ថ្ងៃ​ចន្ទ រដ្ឋាភិបាល​របស់​ចក្រភព​អង់គ្លេស ស្នើ​សរសេរ​ច្បាប់​ថ្មី​ឡើង​វិញ​ជា​ឯកតោ​ភាគី ពោល​គឺ​ច្បាប់​ពាណិជ្ជកម្ម​ក្រោយ Brexit (ការ​ចាកចេញ​របស់​ចក្រភព​អង់គ្លេស​ពី​សហភាព​អឺរ៉ុប) សម្រាប់​ប្រទេស​អៀរឡង់​ខាង​ជើង ទោះបី​ជា​មាន​ការ​ប្រឆាំង​​​ពី​សមាជិក​សភា​ចក្រភព​អង់គ្លេស និង​មន្ត្រី​សហភាព​អឺរ៉ុប​មួយ​ចំនួន ដែល​លើក​ឡើង​ថា ទង្វើ​នេះ​​ បាន​បំពាន​ច្បាប់​អន្តរជាតិ​ក៏​ដោយ​​ចុះ​។

សេចក្ដី​ព្រាង​ច្បាប់ ដែល​បាន​ស្នើ​ឡើង​ដោយ​ប្រទេស​អង់គ្លេស មាន​បំណង​ស្វែងរក​ការ​ដក​ការ​ត្រួត​ពិនិត្យ​គយ​លើ​ទំនិញ​មួយ​ចំនួន ដែល​នាំចូល​ពី​អង់គ្លេស​ទៅ​អៀរឡង់​ខាង​ជើង ដោយ​លក្ខខណ្ឌ​នេះ មាន​លក្ខណៈ​លើស​នូវ​ផ្នែក​ខ្លះ​នៃ​សន្ធិសញ្ញា​ពាណិជ្ជកម្ម ដែល​នាយក​រដ្ឋមន្ត្រី​លោក Boris Johnson បាន​ចុះ​ហត្ថលេខា​ជាមួយ​សហភាព​អឺរ៉ុប កាល​ពី ២ ​ឆ្នាំ​មុន​។

រដ្ឋាភិបាល​របស់​ចក្រភព​អង់គ្លេស នៅ​តែ​រក្សា​ជំហរ​ខ្លួន ដែល​ចង់់​ឱ្យ​មាន​ការ​ផ្លាស់ប្តូរ ដោយ​អះអាង​ជំហាន​នេះ មាន​ភាព​យុត្តិធម៌​នៅ​ក្រោម​ច្បាប់​អន្តរជាតិ ដោយសារ​វា​ត្រូវ​បាន​គេ​ចាត់​ចូល​ជា​ករណី​ពិសេស​ជាក់​ស្ដែង។ ផ្ទុយ​ទៅ​វិញ រដ្ឋមន្ត្រី​ការបរទេស Liz Truss ​បន្ទោស​សហភាព​អឺរ៉ុប​វិញ ចំពោះ​ការ​រារាំង​​ដំណោះ​ស្រាយ ដែល​បាន​ចរចា​រួចរាល់​ហើយ​។ គណៈកម្មការ​អឺរ៉ុប​បាន​និយាយ​ថា ខ្លួន​អាច​ចាត់​វិធានការ​ផ្លូវ​ច្បាប់​ប្រឆាំង​នឹង​ចក្រភព​អង់គ្លេស​។

អនុប្រធាន​គណៈកម្មការ​អឺរ៉ុប លោក Maros Sefcovic ​ប្រាប់​ថា៖ «ច្បាប់​ពាណិជ្ជកម្ម ដែល​មាន​ស្រាប់​ នឹង​ផ្តល់​ឱ្យ​ប្រតិបត្តិករ​អាជីវកម្ម​នៅ​អៀរឡង់​​ខាង​​ជើង ដឹក​ទំនិញ​ទៅ​ទីផ្សារ​តែ ១ របស់​សហភាព​អឺរ៉ុប​។ វិធីសាស្ត្រ​របស់​ចក្រភព​អង់គ្លេស ធ្វើ​ឱ្យ​ដំណើរការ​នេះ និង​ឱកាស​ដែល​ពាក់ព័ន្ធ​ស្ថិត​ក្នុង​ហានិភ័យ»។

នៅ​ប្រទេស​អៀរឡង់ នាយក​រដ្ឋមន្ត្រី Micheal Martin បាន​លើក​ឡើង​ថា វា​ជា​រឿង​គួរ​ឱ្យ​សោកស្តាយ​ណាស់ សម្រាប់​ប្រទេស​មួយ ដូចជា​ចក្រភព​អង់គ្លេស ដែល​សម្លឹង​ដល់​សងសឹក​លើ​សន្ធិសញ្ញា​អន្តរជាតិ​បែប​នេះ​។ អធិការបតី​អាល្លឺម៉ង់ លោក Olaf Scholz ក៏​បាន​​បន្ទរ​ថែម​ថា មិន​មាន​ហេតុផល​សម្រាប់​ចក្រភព​អង់គ្លេស​ឱ្យ​សរសេរ​ច្បាប់​ថ្មី​ឡើង​វិញ​បែប​នេះ​ទេ​។

លោក Scholz បាន​ប្រាប់​ថា៖ «វា​ជាការ​ច្រានចោល​នូវ​រាល់​កិច្ច​ព្រមព្រៀង ដែល​យើង​ព្រម​ព្រៀង​គ្នា​រវាង​សហភាព​អឺរ៉ុប និង​ចក្រភព​អង់គ្លេស។ សហភាព​អឺរ៉ុប នឹង​ប្រតិកម្ម​ចំពោះ​បញ្ហា​នេះ ព្រោះ​ផែនការ​ទាំង​មូល​របស់​សហភាព​នឹង​ត្រូវ​បោះចោល​»​។

លោក Johnson ​​ប្រាប់​អ្នក​យកព័ត៌មាន​ដោយ​មិន​ខ្វល់​ពី​ការ​រិះគន់​របស់​សហភាព​​អឺរ៉ុប​ថា អ្វី​ដែល​បាន​ស្នើ​ឡើង វា​គឺ​ជា​រឿង​ធម្មតា។ លោក​និយាយ​​ទៅ​កាន់​វិទ្យុ LBC Radio ថា៖ «និយាយ​ដោយ​ត្រង់​ទៅ វា​គឺ​ជា​ការ​​កែ​សម្រួល​តិចតួច ដែល​ទាក់ទង​នៅ​ក្នុង​គ្រោង​ការ​ធំ​»។

លោក​បាន​បន្ថែម​ទៀត​ថា៖ «ការ​ប្តេជ្ញា​ចិត្ត​ផ្លូវ​ច្បាប់​កាន់​តែ​ខ្ពស់​ពី​​រដ្ឋាភិបាលរ​បស់​គាត់ ចំពោះ​កិច្ច​ព្រមព្រៀង Good Friday ឆ្នាំ​ ១៩៩៨ នាំ​មក​នូវ​សន្តិភាព និង​ស្ថិរភាព​ដល់​អៀរឡង់​ខាង​ជើង»។

ការ​រៀបចំ​សម្រាប់​អៀរឡង់​ខាងជើង ជា​ផ្នែក​តែ ១ ​គត់​របស់​ចក្រភព​អង់គ្លេស ​ដែល​មាន​​ព្រំ​ប្រទល់​ដី​ជាមួយ​ប្រជាជាតិ​សហភាព​អឺរ៉ុប ដោយ​បាន​បង្ហាញ​​ពី​​បញ្ហា​ដ៏​ធ្ងន់ធ្ងរ​បំផុត ក្នុង​ការ​ផ្ដាច់​ខ្លួន​របស់​ចក្រភព​អង់គ្លេស​ពី​ប្លុក​នេះ ក្នុង​ចុង​ឆ្នាំ​ ២០២០​។ ចំណុច​កណ្តាល​​នៃ​ជម្លោះ គឺ​ស្ថិត​នៅ​ត្រង់​ពិធីសារ​របស់​អៀរ​ឡង់​ខាងជើង ដែល​​ឥឡូវ​នេះ​ ជា​កន្លែង​ទំនាក់ទំនង​ពាណិជ្ជកម្ម​ រវាង​អៀរ​ឡង់​ខាង​ជើង​​ផង ជា​ផ្នែក ១ ​នៃ​ចក្រភព​អង់គ្លេស​ផង និង​ជា​ផ្នែក​​សាធារណរដ្ឋ​អៀរឡង់ ដែល​នៅ​ក្នុង​សហភាព​អឺរ៉ុប​ផង។

ចក្រភព​អង់គ្លេស និង​សហភាព​​អឺរ៉ុប បាន​ស្រុះស្រួល​គ្នា​ក្នុង​កិច្ច​ព្រមព្រៀង Brexit របស់​ពួក​គេ​ថា ព្រំដែន​ទឹក​អៀរ​ឡង់ នឹង​ត្រូវ​រក្សា​ទុក ដោយ​សេរី​ពី​ប៉ុស្តិ៍​គយ និង​ការ​ត្រួត​ពិនិត្យ​ផ្សេង​ទៀត ព្រោះ​ព្រំដែន​បើក​ចំហ គឺ​ជា​សសរស្តម្ភ​សំខាន់​នៃ​ដំណើរការ​សន្តិភាព ដែល​បញ្ចប់​អំពើហិង្សា​រាប់​ទសវត្សរ៍ នៅ​អៀរឡង់​ខាងជើង។

ជំនួស​មក​វិញ ដើម្បី​ការពារ​ទីផ្សារ​តែ​ ១ របស់​សហភាព​អឺរ៉ុប​គេ​ឃើញ​មាន​ការ​ត្រួត​ពិនិត្យ​លើ​ទំនិញ​មួយ​ចំនួន ដូចជា​សាច់ និង​ស៊ុត ដែល​នាំ​ចូល​អៀរ​ឡង់​ខាង​ជើង​ ពី​តំបន់​​ផ្សេងៗ​​របស់​​ចក្រភព​អង់គ្លេស។

ប៉ុន្តែ​ការ​រៀបចំ​នេះ បង្ហាញ​ពី​ការ​ខូចខាត​ផ្នែក​នយោបាយ​សម្រាប់​​លោក Johnson ព្រោះ​ពិធីការ​សម្រាប់​អៀរ​ឡង់​ខាង​ជើង មាន​លក្ខណៈ​ខុសគ្នា​ពី​ចក្រភព​អង់គ្លេស។ គណបក្ស​សហភាព​ប្រជាធិបតេយ្យ​របស់​អៀរឡង់​ខាង​ជើង ​បដិសេធ​ក្នុង​ការ​ត្រឡប់​ទៅ​កាន់​រដ្ឋាភិបាល​បែង​ចែក​អំណាច​របស់​​តំបន់​វិញ​ លុះត្រា​ពិធីការ​អយុត្តិធម៌​នេះ ត្រូវ​បាន​លុប​ចោល ឬ​មាន​ការ​ផ្លាស់​ប្តូរ​គួរ​ឱ្យ​កត់​សម្គាល់​។

យ៉ាងណាមិញ សេចក្តី​ព្រាង​ច្បាប់ ដើម្បី​បដិសេធ​ការ​រៀបចំ​នោះ ត្រូវ​បាន​ក្រុម​អ្នក​រិះគន់​និយាយ​ថា ជា​ការ​ផ្លាស់​ប្ដូរ​ជា​ឯកតោភាគី និង​ខុស​ច្បាប់ ហើយ​អាច​នឹង​ធ្វើ​ឱ្យ​ខូច​ដល់​ជំហរ​របស់​ចក្រភព​អង់គ្លេស​ជាមួយ​នឹង​ប្រទេស​ដទៃ​ទៀត ព្រោះ​វា​ជា​ផ្នែក​មួយ​នៃ​សន្ធិសញ្ញា ដែល​ត្រូវ​បាន​ចាត់​ទុក​ថា ស្ថិតនៅ​ក្រោម​ច្បាប់​អន្តរជាតិ។

នៅ​ទីក្រុង​ប្រ៊ុចសែល លោក Sefcovic ​និយាយ​ថា ពិធីសារ គឺ​ជា​ដំណោះស្រាយ​តែ ១ ​គត់ ដែល​យើង​អាច​រក​បាន​រួមគ្នា ដើម្បី​ការពារ​​ប្រយោជន៍ ដែល​រក​បាន​​ដោយ​លំបាក​នៃ​ដំណើរការ​​សន្តិភាព​នៅ​អៀរ​ឡង់​ខាង​ជើង។ លោក​បាន​បន្ថែម​ថា អឺរ៉ុប​នៅ​តែ​បើកចំហ​ក្នុង​ការ​ពិភាក្សា​ជាមួយ​រដ្ឋាភិបាល​អង់គ្លេស ដើម្បី​ស្វែងរក​ដំណោះស្រាយ​ចំពោះ​ជម្លោះ​នេះ៕

វីដេអូ៖

អត្ថបទគួរចាប់អារម្មណ៍