រុស្ស៊ីនិយាយកាលពីថ្ងៃពុធកណ្ដាលសប្ដាហ៍ថា លោកខាងលិចកំពុងផ្សព្វផ្សាយព័ត៌មានភូតកុហកអំពីមូលហេតុនៃវិបត្តិស្បៀងអាហារពិភពលោក ដែលទីក្រុងម៉ូស្គូ លើកឡើងថា ជាប់គាំងដោយសារតែទណ្ឌកម្មរបស់សហរដ្ឋអាមេរិក និងសហភាពអឺរ៉ុប ជុំវិញការលុកលុយអ៊ុយក្រែន។
ក្រៅពីការស្លាប់ និងការបំផ្លិចបំផ្លាញ ពីរុស្ស៊ី សង្រ្គាម និងការប៉ុនប៉ងរបស់បស្ចិមលោក ក្នុងការធ្វើឱ្យសេដ្ឋកិច្ចរុស្ស៊ីធ្លាក់ចុះ ដោយសារទណ្ឌកម្ម ធ្វើឱ្យតម្លៃគ្រាប់ធញ្ញជាតិ ប្រេងឆា ជី និងថាមពល កើនឡើង ដែលប៉ះពាល់ដល់កំណើនសេដ្ឋកិច្ចពិភពលោក។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova ប្រាប់អ្នកយកព័ត៌មាន នៅទីក្រុងម៉ូស្គូថា លោកស្រីមានការស្រងាកចិត្តចំពោះសេចក្តីថ្លែងការណ៍របស់លោកខាងលិចម្តងហើយម្តងទៀត ដែលថា រុស្ស៊ីជាដើមហេតុនៃវិបត្តិស្បៀងអាហារពិភពលោក។
លោកស្រី Zakharova និយាយថា៖ «វាគឺជាការកុហក។ ការចោទប្រកាន់បែបនេះ គឺជាការកុហកទាំងស្រុង។ ដូច្នេះ លោកខាងលិចអាចផ្គត់ផ្គង់អាវុធទាំងអស់ទៅឱ្យអ៊ុយក្រែន ប៉ុន្តែសម្រាប់ហេតុផលមួយចំនួន គ្មានអ្វីកើតចេញពីអ៊ុយក្រែនទេ។»
សហរដ្ឋអាមេរិក និងសមាជិកសហភាពអឺរ៉ុប ដែលផ្គត់ផ្គង់សព្វាវុធដល់អ៊ុយក្រែន ចោទប្រកាន់រុស្ស៊ីពីបទបង្កឱ្យមានវិបត្តិស្បៀងអាហារជុំវិញការបិទការនាំចេញគ្រាប់ធញ្ញជាតិរបស់អ៊ុយក្រែនទៅក្រៅ ខណៈប្រទេសនេះជាអ្នកនាំចេញស្រូវសាលី ១/១០ របស់ពិភពលោក។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី ព្រមានកាលពីដើមខែថា មនុស្សរាប់លាននាក់អាចអត់ឃ្លាន ដោយសារតែការបិទខ្ទប់របស់រុស្ស៊ីនៅកំពង់ផែសមុទ្រខ្មៅរបស់អ៊ុយក្រែន។
រុស្ស៊ី និងអ៊ុយក្រែន គឺជាអ្នកផលិតទំនិញកសិកម្មដ៏សំខាន់បំផុត ២ នៅលើពិភពលោក។ រុស្ស៊ីជាប្រទេសនាំចេញស្រូវសាលីធំជាងគេរបស់ពិភពលោកបន្ទាប់ពីសហភាពអឺរ៉ុប ខណៈអ៊ុយក្រែនជាអ្នកនាំចេញគ្រាប់ផ្កាឈូករ័ត្នលំដាប់ពិភពលោក។ ប្រទេសទាំង ២ ដើរតួនាទីយ៉ាងសំខាន់លើទីផ្សារស្រូវបាឡេ ពោត និងស្រូវសាលី ខណៈរុស្ស៊ីគឺជាប្រទេសនាំចេញជីដ៏ធំមួយរបស់ពិភពលោក។
លោកស្រី Zakharova និយាយថា ទណ្ឌកម្មរបស់លោកខាងលិចធ្វើឱ្យទីផ្សារកសិកម្មឆ្ពោះទៅរកភាពមហន្តរាយ ដោយរំខានដល់ប្រព័ន្ធទូទាត់ការដឹកជញ្ជូន ការធានារ៉ាប់រង ដែលរារាំងការនាំចេញអាហារ និងជីរបស់រុស្ស៊ីជាច្រើន។
ប្រទេសអេរីត្រេ អាមេនី ម៉ុងហ្គោលី អាស៊ែបៃហ្សង់ ហ្សកហ្ស៊ី សូម៉ាលី បេឡារុស តួកគី កោះម៉ាដាហ្គាស្ការ លីបង់ អេហ្ស៊ីប និងប៉ាគីស្ថាន ពឹងលើរុស្ស៊ី ឬអ៊ុយក្រែនជាង ៧០% នៃការនាំចូលស្រូវសាលីរបស់ខ្លួន ក្នុងឆ្នាំ ២០២១។ នេះបើយោងតាមទិន្នន័យរបស់អង្គការសហប្រជាជាតិ។
ទិន្នន័យដដែល ឱ្យដឹងថា ម៉ុងហ្គោលី កាហ្សាក់ស្ថាន សា.ម៉ុលដាវី ស៊ែប៊ី ហុងឌូរ៉ាស និងហ្គាណា ពឹងផ្អែកលើប្រទេសរុស្ស៊ី សម្រាប់ការនាំចូលជីរបស់ពួកគេចំនួន ៥០% ឬច្រើនជាងនេះ ក្នុងឆ្នាំ ២០២១៕
ហួន ឌីណា
វីដេអូ៖