The Phnom Penh Post Search

Search form




Logo of Phnom Penh Post newspaper Phnom Penh Post - តួកគី​វាយតម្លៃ​ទោស​ប្រហារជីវិត​ឡើងវិញ ក្រោយ Erdogan និយាយ​ពី​ការកាត់ទោស​អ្នក​ដុត​ព្រៃ

តួកគី​វាយតម្លៃ​ទោស​ប្រហារជីវិត​ឡើងវិញ ក្រោយ Erdogan និយាយ​ពី​ការកាត់ទោស​អ្នក​ដុត​ព្រៃ

Content image - Phnom Penh Post
ឧទ្ធម្ភាគ​ចក្រទម្លាក់​ទឹក​ ដើម្បី​ពន្លត់​ភ្លើង​ឆេះ​ព្រៃ​ ក្នុង​ខេត្ត Mugla របស់​តួកគី កាល​ពី​ថ្ងៃទី​ ៦ ខែ ​សីហា ឆ្នាំ​ ២០២១។

តួកគី​វាយតម្លៃ​ទោស​ប្រហារជីវិត​ឡើងវិញ ក្រោយ Erdogan និយាយ​ពី​ការកាត់ទោស​អ្នក​ដុត​ព្រៃ

រដ្ឋមន្ត្រី​ក្រសួង​យុត្តិធម៌​តួកគី និយាយកាលពី​ថ្ងៃ​សៅរ៍​ថា តួកគី​នឹង​ពិចារណា​លើ​សេចក្តីសម្រេច​ឆ្នាំ​ ២០០៤ ក្នុងការ​លុបចោល​ការ​កាត់ទោស​ប្រហារជីវិត​ឡើងវិញ បន្ទាប់ពី​លោក​ប្រធានាធិបតី រេសិប តៃយីប អេរដូហ្គែន (Recep Tayyip Erdogan) លើកឡើង​ពី​ទោស​នេះ​ពាក់ព័ន្ធ​នឹង​មូលហេតុ​នៃ​ការឆេះ​ព្រៃ​។

ការកាត់ទោស​ប្រហារជីវិត ត្រូវបាន​ដក​ចេញពី​រដ្ឋ​ធម្មនុញ្ញ នៅ​ឆ្នាំដំបូងៗ​នៃ​ការ​ឡើង​កាន់អំណាច​របស់​លោក អេរដូហ្គែន។ ប៉ុន្តែ​ក្រោយ​មានការ​សង្ស័យ​ថា មាន​ភ្លើង​ឆេះ​ដោយ​ចេតនា ដែល​បំផ្លាញ​ព្រៃ​ឈើ នៅ​តំបន់ឆ្នេរ​សមុទ្រ Aegean ចំនួន ៤ ៥០០ ហិកតា នៅ​សប្ដាហ៍​កន្លង​ទៅ លោក​ប្រធានាធិបតី និយាយ​ថា ត្រូវការ​ភាព​យុត្តិ​ធម៌​ជាង​នេះ​។

អាជ្ញាធរ​តួកគី និយាយ​ថា ជន​សង្ស័យ​ម្នាក់​ដែល​ត្រូវបាន​ឃាត់ខ្លួន​ពាក់ព័ន្ធ​នឹង​ភ្លើង​ឆេះ​ព្រៃ​សារភាពថា គេ​ពិតជា​បង្ក​មែន។ បន្ទាប់ពី​ចុះ​ទៅ​ដល់​កន្លែង​កើតហេតុ កាលពី​ថ្ងៃ​សុក្រ លោក អេរដូហ្គែន និយាយ​ថា ការដាក់​ទណ្ឌកម្ម ចំពោះ​ការដុត​ព្រៃ​គួរតែ​ជា «ការបំភិត​បំភ័យ ហើយ​ប្រសិន​បើ​អាច​កាត់ទោស​ប្រហារ​ជីវិត នោះ​ត្រូវ​កាត់ទោស​ប្រហារជីវិត​»។

ថ្លែង​ទៅកាន់​អ្នកសារព័ត៌មាននៅ​ទីក្រុង Agri កាល​ពី​ថ្ងៃ​សៅរ៍ រដ្ឋមន្ត្រី​ក្រសួង​យុត្តិធម៌​លោក Bekir Bozdag និយាយថា ការអត្ថា​ធិប្បាយ​របស់​ប្រធានាធិបតី «គឺជា​ការណែនាំ​ដល់​ពួកយើង​»។

លោក Bozdag និយាយថា​៖ «យើង​ចាប់ផ្តើម​ធ្វើការ​លើ​វា ក្នុងនាម​ជា​ក្រសួង» ដោយ​បន្ថែម​ថា ការ​ដាក់​ទណ្ឌកម្ម​បច្ចុប្បន្ន សម្រាប់​ការបង្ក​ឱ្យ​ភ្លើង​ឆេះ​ព្រៃ គឺ​ត្រូវ​ជាប់គុក ១០ ឆ្នាំ ហើយ​អាច​ដល់​ការ​កាត់ទោស​ឱ្យ​ជាប់គុក ១​ ជីវិត បើ​វា​ជាការ​រៀបចំ​។

ភ្លើង​ឆេះ​ព្រៃ​ដ៏​ធំ​ដំបូង​នៃ​រដូវក្តៅ​របស់​តួកគី ដែល​ចាប់​ផ្តើមឡើង កាលពី​ថ្ងៃ​អង្គារ រំឭក​ពី​ការ​ចងចាំ​ដែល​ប្រទេស​នេះ​ជួបប្រទះ កាលពី​ឆ្នាំមុន ពេលដែល​ព្រៃ​ជាង ១៤០ ០០០ ហិកតា ត្រូវ​បាន​ឆេះ​បំផ្លិច​បំផ្លាញ ដែលជា​កំណត់ត្រា​អាក្រក់​បំផុត​របស់​ប្រទេស។ កាលពី​ថ្ងៃ​សុក្រ រដ្ឋមន្ត្រី​ក្រសួង​រុក្ខា​ប្រមាញ់​លោក Vahit Kirisci និយាយ​ថា ៨៨% នៃ​ភ្លើង​ឆេះ​ព្រៃ នៅ​តួកគី​បង្កឡើង​ដោយ​មនុស្ស​៕

ហួន ឌីណា

អត្ថបទគួរចាប់អារម្មណ៍