The Phnom Penh Post Search

Search form




Logo of Phnom Penh Post newspaper Phnom Penh Post - មនុស្ស ១៦ នាក់​ ត្រូវ​បាន​សម្លាប់​ពី​ការ​វាយ​ប្រហារ​ដោយ​មីស៊ីល​របស់​រុស្ស៊ី​ នៅ​អ៊ុយក្រែន

មនុស្ស ១៦ នាក់​ ត្រូវ​បាន​សម្លាប់​ពី​ការ​វាយ​ប្រហារ​ដោយ​មីស៊ីល​របស់​រុស្ស៊ី​ នៅ​អ៊ុយក្រែន

Content image - Phnom Penh Post
មនុស្ស ១៦ នាក់​ ត្រូវ​បាន​សម្លាប់​ពី​ការ​វាយ​ប្រហារ​ដោយ​មីស៊ីល​របស់​រុស្ស៊ី​ ទៅ​លើ​កន្លែង​ទំនិញ​ ១ នៅ​កណ្ដាល​ទីក្រុង​ក្រឹមមិនឆូក។ រូបថត AFP

មនុស្ស ១៦ នាក់​ ត្រូវ​បាន​សម្លាប់​ពី​ការ​វាយ​ប្រហារ​ដោយ​មីស៊ីល​របស់​រុស្ស៊ី​ នៅ​អ៊ុយក្រែន

ក្រុម​មន្ត្រី​អ៊ុយក្រែន​ប្រាប់​ថា មីស៊ីល​របស់​រុស្ស៊ី​ចំនួន ២ បាន​វាយ​ប្រហារ​​ទៅ​លើ​កន្លែង​ទំនិញ​ ១ នៅ​កណ្ដាល​ទីក្រុង​ក្រឹមមិនឆូក (Kremenchuk) នៃ​ភាគ​កណ្ដាល​ប្រទេស កាល​ពី​ថ្ងៃ​ចន្ទ ដោយ​សម្លាប់​មនុស្ស​យ៉ាង​ហោច​ណាស់ ១៦ ​នាក់ និង​របួស ៥៩ ​នាក់។

ប្រធានាធិបតី​អ៊ុយក្រែន លោក វ៉ូឡូឌីមៀរ ហ្សេលេនស្គី និយាយ​ថា ​​មនុស្ស​ជាង ១ ពាន់​នាក់ ស្ថិត​នៅ​ក្នុង​​អគារ​ផ្សារ ពេល​មីស៊ីល​វាយ​ប្រហារ។ វីដេអូ​ដែល​ចែកចាយ​លើ​បណ្ដាញ​សង្គម ក្រោយ​ការ​វាយ​ប្រហារ​បង្ហាញ​ពី​ភ្លើង​ឆាបឆេះ​សន្ធោសន្ធៅ​ និង​មាន​ផ្សែង​ខ្មៅ​ហុយ​ទ្រលោម​ទៅ​លើ​មេឃ​។

សេវា​សង្គ្រោះ​បន្ទាន់​អ៊ុយក្រែន​ឱ្យ​ដឹង​ថា​ មនុស្ស​យ៉ាង​ហោចណាស់ ១៦ ​នាក់ ត្រូវ​ស្លាប់ ខណៈ ៥៩ ​នាក់​ផ្សេង​ទៀត​រងរបួស​។ នេះ​បើតាម​ការ​ចុះផ្សាយ​របស់​ទីភ្នាក់ងារ​ព័ត៌មាន​រ៉យទ័រ​។

លោក​ ហ្សេលេនស្គី​ សរសេរ​នៅ​លើ​កម្មវិធី​ផ្ញើ​សារ​តេឡេក្រាម​ថា៖ «​វា​មិន​អាច​​ទៅ​រួច​ទេ ក្នុង​ការ​ស្រមៃ​មើល​ចំនួន​ជន​រងគ្រោះ​។ វា​គ្មាន​ប្រយោជន៍​ទេ ក្នុង​ការ​សង្ឃឹម​ពី​ភាព​សមរម្យ និង​ភាព​ជា​​មនុស្ស​ជាតិ​ពី​រុស្ស៊ី​»។

ក្រឹមមិនឆូក​ គឺ​ជា​ទីក្រុង​ឧស្សាហកម្ម​ដែល​មាន​ប្រជាជន​ចំនួន ២១៧ ០០០ ​នាក់ មុន​ការ​ចាប់​ផ្ដើម​ការ​វាយ​លុក​របស់​រុស្ស៊ី កាល​ពី​ចុង​ខែ​កុម្ភៈ​។ ទីក្រុង​ភាគ​កណ្ដាល​មួយ​នេះ ស្ថិត​នៅ​លើ​ទន្លេ Dnipro ក្នុង​តំបន់​ប៉ូលតាវ៉ា (Poltava) និង​ជាទី​តាំង​នៃ​រោងចក្រ​ចម្រាញ់​ប្រេង​ដ៏​ធំ​បំផុត​របស់​អ៊ុយក្រែន។

លោក ឌ្មីត្រូ លូនីន (Dmytro Lunin) អភិបាល​តំបន់​ប៉ូលតាវ៉ា​ភាគ​កណ្តាល​សរសេរ​នៅ​លើ​តេឡេក្រាម​ថា វា​ឆាប់​ពេក​ក្នុង​ការ​និយាយ​ពី​ចំនួន​អ្នក​ស្លាប់​ចុង​ក្រោយ ខណៈ​ក្រុម​អ្នក​ជួយសង្គ្រោះ​បន្ត​ប្រតិបត្តិការ​របស់​ខ្លួន​តាម​គំនរ​បាក់បែក​។ លោក​និយាយ​ដាច់​ដោយ​ឡែក​ថា៖ «វា​ជា​អំពើ​ភេរវកម្ម​ប្រឆាំង​នឹង​ជន​ស៊ីវិល​» ដោយ​លើក​ឡើង​ថា គ្មាន​គោលដៅ​យោធា​ណា​នៅ​ទីនោះ​ដែល​រុស្ស៊ី​ត្រូវ​វាយ​ប្រហារ​ទេ​។

បញ្ជាការ​កងទ័ព​អាកាស​អ៊ុយក្រែន​និយាយ​ថា អាវុធ​ដែល​យក​ធ្វើ​ការ​វាយ​ប្រហារ​កន្លែង​ទិញ​ទំនិញ​ទាំង ២ ​គ្រាប់​ គឺ​ជា​មីស៊ីល X-22 រយៈ​ចម្ងាយ​ឆ្ងាយ​ដែល​បាញ់​ចេញ​ពី​យន្តហោះ​ទម្លាក់​គ្រាប់បែក Tu-22M3 ដែល​ហោះ​ចេញពី​អាកាសយានដ្ឋាន​ Shaykovka ក្នុង​តំបន់​កាលូហ្គា​របស់​រុស្ស៊ី​។

ឯកអគ្គរដ្ឋទូត​រង​របស់​រុស្ស៊ី​ប្រចាំ​អង្គការ​សហប្រជាជាតិ លោក ឌ្មីទ្រី ប៉ូលយ៉ានស្គី (Dmitry Polyanskiy) សរសេរ​នៅ​លើ​ធ្វីតធើរ ដោយ​មិន​បញ្ជាក់​ពី​ភ័ស្តុតាង​ថា ការ​វាយប្រហារ​នេះ​ គឺ​ជា​ការ​បង្ក​ហេតុ​របស់​អ៊ុយក្រែន។

រុស្ស៊ី​ដែល​ចោទ​អ៊ុយក្រែន​ថា យក​ជន​ស៊ីវិល​ជា​ខែល​ តែង​វាយ​ប្រហារ​ដោយ​មីស៊ីល​ជារឿយៗ​លើ​អគារ​រស់នៅ​​របស់​ប្រជាជន​តាំង​ពី​មាន​ការ​ឈ្លានពាន​ ដោយ​និយាយ​ថា មាន​គោលដៅ​​យោធា​នៅ​ទីនោះ​ ហើយ​ថា ​ខ្លួន​​មិន​ដាក់​គោលដៅ​លើ​ជន​ស៊ីវិល​ទេ សូម្បី​តែ​ការ​ទម្លាក់​គ្រាប់​បែក​លើ​សាលារៀន​ដែល​មាន​ជន​ស៊ីវិល​ជ្រក​កោន​ក្ដី​៕

ហួន ឌីណា

វីដេអូ៖

អត្ថបទគួរចាប់អារម្មណ៍