.jpg)
បុគ្គលិកសន្តិសុខម្នាក់ ឈរយាមនៅខាងក្រៅស្ថានីយប្រេងដែលអស់ ក្នុងទីក្រុងកូឡុំបូ កាលពីថ្ងៃទី ២៧ ខែមិថុនា។ AFP
ប្រទេសស្រីលង្កា ដែលកំពុងល្បីរន្ទឺក្នុងវិបត្តិចាក់ស្រែះ ដែលផ្តើមចេញពីវិបត្តិហិរញ្ញវត្ថុថាមពល រហូតដល់ម្ហូបអាហារ តាំងពីដើមឆ្នាំនេះ បានឈានដល់ការដាក់កំហិត ចំពោះការផ្គត់ផ្គង់ប្រេងឥន្ធនៈភ្លាមៗ ដោយប្រាប់ប្រជាជនឱ្យស្នាក់នៅផ្ទះ ដើម្បីបញ្ចៀសភាពចលាចលក្នុងប្រទេសកាន់តែខ្លាំងឡើងៗ ខណៈដែលរដ្ឋាភិបាលកំពុងប្រឹងប្រែងតស៊ូក្នុងការផ្តល់ទំនិញសំខាន់ៗ ដោយសារវិបត្តិបំណុលជាតិដ៏កម្សត់ ដែលបានអង្រួនប្រទេសអស់រយៈពេលជាច្រើនខែ។
លោក បានឌូឡា ហ្គូណាវ៉ាដេណា (Bandula Gunawardena) អ្នកនាំពាក្យរបស់នាយករដ្ឋមន្ត្រីស្រីលង្កាឱ្យដឹងនៅក្នុងសេចក្តីថ្លែងការណ៍ តាមទូរទស្សន៍ថា ខុទ្ទកាល័យគណៈរដ្ឋមន្ត្រីរបស់ប្រទេស បានសម្រេចកំណត់ការចែកចាយប្រេងឥន្ធនៈដល់សេវាកម្មសំខាន់ៗ រហូតដល់ថ្ងៃទី ១០ ខែកក្កដា ដោយបន្ថែមថា ការដឹកជញ្ជូនសាធារណៈអន្តរខេត្តទំនងជានឹងមានការផ្អាក។ នេះយោងតាមបណ្តាញព័ត៌មាន BLOOMBERG។
លោក ហ្គូណាវ៉ាដេណា បាននិយាយថា៖ «កំពង់ផែ សេវាសុខភាព ការដឹកជញ្ជូនម្ហូបអាហារ នឹងត្រូវបានផ្តល់ជូនប្រេងឥន្ធនៈ និងប្រេងម៉ាស៊ូត ខណៈវិស័យផ្សេងទៀត ត្រូវបានស្នើសុំឱ្យស្នាក់នៅផ្ទះ និងផ្តល់សេវាកម្មតាមអ៊ីនធឺណិត ក្នុងគ្រាដ៏លំបាកនេះ។ ប្រទេសរបស់យើងកំពុងប្រឈមមុខនឹងស្ថានភាពហិរញ្ញវត្ថុ និងវិបត្តិរូបិយប័ណ្ណបរទេសដែលមិនធ្លាប់មានពីមុនមក»។
ទីភ្នាក់ងារព័ត៌មានបារាំងបានផ្សាយថា ប្រទេសដែនកោះដែលមានប្រជាជនប្រមាណ ២២ លាននាក់ ស្ថិតនៅអាស៊ីខាងត្បូងនេះ បានធ្លាក់ចូលទៅក្នុងវិបត្តិជាបន្តបន្ទាប់ ចាប់តាំងពីវិបត្តិជំងឺកូវីដ ១៩ បានផ្ទុះឡើង ដោយប៉ះពាល់យ៉ាងធ្ងន់ធ្ងរដល់វិស័យទេសចរណ៍ដែលប្រទេសនេះពឹងផ្អែកលើ ដើម្បីបង្កើតរូបិយប័ណ្ណអន្តរជាតិ សម្រាប់បញ្ជាទិញឧស្ម័ន និងម្ហូបអាហារពីទីផ្សារអន្តរជាតិ។
សេដ្ឋកិច្ចរបស់ស្រីលង្កា បាន «ដួលរលំទាំងស្រុង» ហើយ។ នេះបើតាមការអះអាងរបស់នាយករដ្ឋមន្ត្រីស្រីលង្កា លោក រ៉ានីល វីកក្រេម៉េស៊ីងហេ (Ranil Wickremesinghe) ដែលថ្លែងប្រាប់សមាជិកសភា កាលពីសប្តាហ៍មុន ដែលចុះផ្សាយដោយ BLOOMBERG។
រដ្ឋាភិបាលលោកនាយករដ្ឋមន្រ្តីរូបនេះកំពុងពិភាក្សាជាមួយមូលនិធិរូបិយវត្ថុអន្តរជាតិ ក៏ដូចជាម្ចាស់បំណុលទ្វេភាគី ដូចជាឥណ្ឌា និងចិន សម្រាប់មូលនិធិថ្មីៗបន្ថែមទៀត ដើម្បីទូទាត់ការនាំចូល បន្ទាប់ពីខ្លួនខកខានទូទាត់បំណុលសញ្ញាបណ្ណប្រាក់ដុល្លាររបស់ខ្លួន កាលពីដើមឆ្នាំនេះ ហើយឃើញថា ទុនបម្រុងបរទេសធ្លាក់ចុះ។
រដ្ឋាភិបាលបានបិទសាលារៀនសាធារណៈរួចទៅហើយ និងស្នើឱ្យមន្ត្រីរាជការធ្វើការពីផ្ទះ ដើម្បីកាត់បន្ថយការដឹកជញ្ជូន ដោយធ្វើឱ្យផ្លូវជាច្រើនក្នុង និងជុំវិញរដ្ឋធានីកូឡុំបូ មានសភាពស្ងាត់ជ្រងំ ក្នុងរយៈពេលប៉ុន្មានថ្ងៃកន្លងទៅនេះ សូម្បីតែរថយន្តរាប់ពាន់គ្រឿង ដែលបានតម្រង់ជួររាប់គីឡូម៉ែត្រ ដើម្បីរង់ចាំចាក់ប្រេងនៅតាមស្ថានីយនានាក៏មិនមានដែរ។
ការខ្វះខាតឥន្ធនៈជំរុញឱ្យមានអតិផរណាទំនិញគ្រប់ប្រភេទ ជាពិសេសម្ហូបអាហារសម្រាប់បំពេញតម្រូវការក្នុងប្រទេស ហើយវាក៏បង្កឱ្យមានការតវ៉ាខ្លាំងក្នុងប្រទេសផងដែរ ដោយទាមទារទម្លាក់រដ្ឋាភិបាលដែលដឹកនាំដោយបងប្អូនរបស់លោកប្រធានាធិបតី ហ្គោតាបាយ៉ា រ៉ាចាប៉ាក្សា (Gotabaya Rajapaksa)។ ជាលទ្ធផល នាយករដ្ឋមន្ត្រី Mahinda Rajapaksa ដែលជាបងប្រុសរបស់ប្រធានាធិបតីក៏បានប្រកាសលាលែងពីតំណែង កាលពីដើមខែឧសភា។
វិបត្តិម្ហូបអាហារស្រីលង្កា ក៏កើតឡើងផងដែរ ពីគោលនយោបាយមិនត្រឹមត្រូវក្នុងវិស័យកសិកម្មដែលប្រទេសនេះមានបំណងប្រែក្លាយទៅជាប្រទេសផលិតផលិតកម្មសរីរាង្គ ១០០% ដំបូងគេបំផុតនៅលើពិភពលោក ដោយហាមឃាត់ការនាំចូលជីគីមី ដែលបម្រើដល់ការបង្កបង្កើនផលក្នុងស្រុក។
ផ្ទុយទៅវិញ កសិករជាច្រើនបាក់ទឹកចិត្ត ព្រមទាំងបោះបង់ចោលស្រែចម្ការ ដោយសារកសិកម្មរបស់ខ្លួនរងការបំផ្លិចបំផ្លាញពីសត្វល្អិត និងការទទួលបានទិន្នផលទាប។
កាសែត New York Times របស់អាមេរិក កាលពីថ្ងៃទី ២២ ខែមេសា បានចុះផ្សាយថា ដើម្បីធានាអនាគតនយោបាយរបស់គ្រួសារលោក ប្រធានាធិបតី ហ្គោតាបាយ៉ា វ័យ ៧២ ឆ្នាំ បានបំផ្លាញប្រព័ន្ធយុត្តិធម៌ព្រហ្មទណ្ឌចាប់អ្នកប្រឆាំងដាក់គុក និងកម្ចាត់បក្សប្រឆាំងក្នុងពេលកន្លងមក។
គាត់បានពង្រីកអំណាចប្រធានាធិបតីរបស់គាត់យ៉ាងខ្លាំង ដោយស្តុកទុករដ្ឋាភិបាលជាមួយសាច់ញាតិរបស់គាត់បុរសជាយោធា និងព្រះសង្ឃស្តាំនិយមដែលស្របនឹងគំនិត ច្បាប់ និងសណ្តាប់ធ្នាប់របស់គាត់។
តាំងពីមានវិបត្តិ រដ្ឋាភិបាលស្រីលង្កាខកខានបង់បំណុលបរទេស $៥១ ពាន់លាន របស់ខ្លួន ហើយកំពុងស្វែងរកជំនួយសង្គ្រោះពីមូលនិធិរូបិយវត្ថុអន្តរជាតិ។ នេះបើតាម AFP។
ទោះមានការអំពាវនាវឱ្យលោក ហ្គោតាបាយ៉ា លាលែងពីតំណែងប្រធានាធិបតី ដែលលោកចូលកាន់ក្នុងឆ្នាំ ២០១៩ ក៏ដោយ ក៏លោកទទួលបានការទុកចិត្តពីសភាស្រីលង្កា ហើយនៅតែបន្តកាន់កាប់តួនាទី និងប្តេជ្ញាបន្តរហូតចប់អាណត្តិ ដោយមិនធ្វើតាមការស្នើ ហើយរៀបចំការបោះឆ្នោតឡើងវិញនោះទេ។ នេះបើតាមការចេញផ្សាយរបស់ Bloomberg។
ការតវ៉ាដោយកើតមានអំពើហិង្សាបានផ្ទុះឡើងក្នុងខែឧសភា បន្ទាប់ពីបងប្រុសរបស់ប្រធានាធិបតី ហ្គោតាបាយ៉ា លាលែងពីតំណែងជានាយករដ្ឋមន្ត្រី ក្រោយមានការប៉ះទង្គិចគ្នា រវាងអ្នកគាំទ្ររដ្ឋាភិបាល និងក្រុមប្រឆាំង។ ទោះបីជាចាប់តាំងពីពេលនោះមកលោក បានការគាំទ្រនៅក្នុងសភា និងបានប្តេជ្ញាថា នឹងបម្រើរយៈពេល ២ ឆ្នាំចុងក្រោយ ក្នុងអាណត្តិរបស់គាត់ក៏ដោយ ក៏ភាពតានតឹងនៅតែមានកម្រិតខ្ពស់។
ប្រទេសស្រីលង្កា គ្រោងនឹងអនុញ្ញាតឱ្យក្រុមហ៊ុនបរទេសចែកចាយឥន្ធនៈក្នុងការដេញថ្លៃ ដើម្បីបន្ធូរបន្ថយការខ្វះខាតដែលធ្វើឱ្យសកម្មភាពសេដ្ឋកិច្ចភាគច្រើនធ្លាក់ពិការ។ នេះបើតាមរដ្ឋមន្ត្រីថាមពល Kanchana Wijesekera។
ការិយាល័យប្រធានាធិបតីឱ្យដឹងក្នុងសេចក្តីថ្លែងការណ៍ ១ កាលពីល្ងាចថ្ងៃចន្ទថា ទេសាភិបាលនៃធនាគារកណ្តាលរបស់ស្រីលង្កាបានយល់ព្រមបង់ថ្លៃសងដល់ក្រុមហ៊ុន សម្រាប់ការផ្គត់ផ្គង់ប្រេងឥន្ធនៈ «ជាមួយនឹងផែនការ»។ លោកប្រធានាធិបតី ហ្គោតាបាយ៉ា ក៏បានណែនាំដល់មន្ត្រីឱ្យចាត់វិធានការជាបន្ទាន់ ក្នុងការនាំចូលប្រេងឥន្ធនៈដោយប្រើមូលនិធិដែលមានស្រាប់រហូតដល់ពេលនោះ។
រដ្ឋាភិបាលកំពុងបញ្ជូនបេសកជនទៅកាន់ប្រទេសកាតា និងរុស្ស៊ី ក្នុងសប្តាហ៍នេះ ដើម្បីទទួលបានការផ្គត់ផ្គង់ថ្មី ហើយសង្ឃឹមថា នឹងមានការយល់ព្រមពីឥណ្ឌានូវខ្សែឥណទានចំនួន $៥០០ លាន សម្រាប់ការនាំចូលប្រេងឥន្ធនៈ។
ឧត្តមស្នងការស្រីលង្កាប្រចាំក្រុងញូវដេលី លោក Milinda Moragoda បានជួបជាមួយ លោក Hardeep Singh Puri រដ្ឋមន្ត្រីក្រសួងប្រេង និងឧស្ម័នធម្មជាតិរបស់ឥណ្ឌា និងកិច្ចការលំនៅឋាននៅក្រុងញូវដេលី កាលពីថ្ងៃចន្ទ ដើម្បីពិភាក្សាអំពីលទ្ធភាពនៃការធានាការផ្គត់ផ្គង់ប្រេងឥន្ធនៈ និងប្រេងម៉ាស៊ូត ដែលតម្រូវដោយប្រទេសកោះនេះផ្អែកលើមូលដ្ឋានបន្ទាន់។
ជាមួយគ្នានេះ លោក Moragoda ក៏ជម្រាបលោក Puri អំពី «បញ្ហាប្រឈមធ្ងន់ធ្ងរដែលស្រីលង្កាកំពុងជួបប្រទះនាពេលបច្ចុប្បន្ន ទាក់ទងនឹងការផ្គត់ផ្គង់ និងការចែកចាយផលិតផលប្រេង ព្រមទាំងការលំបាកផ្សេងៗទៀតផងដែរ»៕
វីដេអូ៖
