.jpg)
មេធាវីដើមចោទលោក Thomas Walther និយាយទៅកាន់អ្នកសារព័ត៌មាន បន្ទាប់ពីស្ដាប់សាលក្រមក្នុងសវនាការកាត់ទោសអតីតឆ្មាំណាហ្ស៊ីកាលពីថ្ងៃទី ២៨ ខែមិថុនា។
តុលាការអាល្លឺម៉ង់កាលពីថ្ងៃអង្គារដើមសប្ដាហ៍នេះបានកាត់ទោសបុរសជាអតីតឆ្មាំជំរំ SS វ័យ ១០១ ឆ្នាំម្នាក់ឱ្យជាប់ពន្ធនាគាររយៈពេល ៥ ឆ្នាំពីបទផ្ដល់ជំនួយក្នុងឃាតកម្មលើមនុស្សប្រហែល ៣ ៥០០ នាក់នៅជំរំប្រមូលផ្ដុំ Sachsenhausen កាលពី ៨០ ឆ្នាំមុន ដែលជាការកាត់ក្ដីចុងក្រោយលើសំណុំរឿងណាហ្ស៊ីអាល្លឺម៉ង់។
រដ្ឋអាជ្ញាអាល្លឺម៉ង់និយាយថា លោក យូសែហ្វ អេស (Josef S.) ដែលជាសមាជិកឆ្មាំនៃក្រុមការពារ SS របស់បក្សណាហ្ស៊ីបានជួយបញ្ជូនមនុស្សចំនួន ៣ ៥១៨ នាក់ទៅជំរំដាក់អ្នកទោសនយោបាយ Sachsenhausen នាភាគខាងជើងនៃទីក្រុងប៊ែរឡាំង ដោយឈរយាមជាប្រចាំនៅចន្លោះឆ្នាំ ១៩៤២ និងឆ្នាំ ១៩៤៥។
មនុស្សជាង ២០០ ០០០ នាក់ដែលភាគច្រើនជាអ្នកទោសនយោបាយមកពីទូទាំងទ្វីបអឺរ៉ុបរួមនឹងអ្នកទោសសង្គ្រាមសូវៀត និងជនជាតិជ្វីហ្វមួយចំនួនត្រូវបានឃុំខ្លួន នៅជំរំ Sachsenhausen ចន្លោះពីឆ្នាំ ១៩៣៦ ដល់ឆ្នាំ ១៩៤៥។
អ្នកទោសរាប់ម៉ឺននាក់បានស្លាប់ដោយសារការអត់ឃ្លាន ជំងឺ ការបង្ខំឱ្យធ្វើការ និងមូលហេតុផ្សេងទៀតក៏ដូចជាតាមរយៈការពិសោធវេជ្ជសាស្ត្រ និងប្រតិបត្តិការសម្លាប់ជាប្រព័ន្ធពីពួកឆ្មាំ SS រួមទាំងការបាញ់ប្រហារ ការព្យួរក និងបំពុលដោយឧស្ម័ន។ មនុស្សមួយចំនួនត្រូវបានគេសម្លាប់ ដោយប្រើឧស្ម័នពុល Zyklon-B ជាឧស្ម័នប្រើក្នុងការសម្លាប់រង្គាលយ៉ាងឃោរឃៅនៅជំរំផ្សេងៗទៀត ដែលជនជាតិជ្វីហ្វអឺរ៉ុបរាប់លាននាក់ត្រូវបានសម្លាប់ក្នុងសម័យប្រល័យពូជសាសន៍ហូលូខឺសថ៍ (Holocaust)។
មានការចោទប្រកាន់ជាច្រើនចំពោះអតីតឆ្មាំជំរំប្រមូលផ្តុំនៅក្នុងប៉ុន្មានឆ្នាំថ្មីៗនេះ ពាក់ព័ន្ធនឹងឧក្រិដ្ឋកម្មសង្គ្រាមលោកលើកទី ២ ប្រឆាំងនឹងមនុស្សជាតិ។ កាលពីខែកញ្ញា អតីតលេខាជំរំម្នាក់បានព្យាយាមរត់គេចនៅថ្ងៃកាត់ក្ដីរបស់ខ្លួន ប៉ុន្តែត្រូវបានប៉ូលិសចាប់បានវិញនៅប៉ុន្មានម៉ោងក្រោយមក។
សេចក្តីសម្រេចរបស់តុលាការឆ្នាំ ២០១១ បានត្រួសត្រាយផ្លូវ សម្រាប់ឱ្យមានការកាត់ទោសទាំងនេះ ដោយបញ្ជាក់ថា សូម្បីតែអ្នកដែលរួមចំណែកដោយប្រយោលដល់ការសម្លាប់មនុស្សក្នុងសម័យសង្គ្រាម ដោយមិនបញ្ចេញសកម្មភាព ឬចេញដីកាក៏អាចទទួលបន្ទុកព្រហ្មទណ្ឌបានដែរ។
មេធាវីការពារក្តីរបស់លោក Josef S. លោក Stefan Waterkamp និយាយថា កូនក្តីរបស់លោកនឹងប្តឹងឧទ្ធរណ៍ ចំពោះសេចក្តីសម្រេចកាលពីថ្ងៃអង្គារនេះ ហើយថាតុលាការជាន់ខ្ពស់នឹងសម្រេចថាតើ «ការដែលជាធម្មតា ដោយគ្មានការចូលរួមជាក់ស្តែង» បានផ្តល់ហេតុផលគ្រប់គ្រាន់ សម្រាប់សាលក្រមបែបនេះដែរឬយ៉ាងណា?៕
ហួន ឌីណា
វីដេអូ៖
