.jpg)
លោក បៃដិន (កណ្ដាល) ប្រធានាធិបតីកូរ៉េខាងត្បូងលោក Yoon Suk-Yeol (ឆ្វេង) និងនាយករដ្ឋមន្ត្រីជប៉ុន Fumio Kishida (ស្ដាំ) ជួបគ្នាត្រីភាគីនៅក្រៅកិច្ចប្រជុំកំពូលណាតូ ក្នុងទីក្រុងម៉ាឌ្រីដ កាលពីថ្ងៃទី ២៩ ខែមិថុនា។
ទីភ្នាក់ងារព័ត៌មានរដ្ឋកូរ៉េខាងជើង KCNA បានឱ្យដឹងកាលពីថ្ងៃពុធថា ការធ្វើសមយុទ្ធរួមគ្នាត្រីភាគី ដែលមានសហរដ្ឋអាមេរិក កូរ៉េខាងត្បូង និងជប៉ុនមាន «គោលបំណងទុច្ចរិត» ដោយសំដៅឆ្ពោះទៅរកកូរ៉េខាងជើង ហើយជាផ្នែកមួយនៃការនាំមុខដ៏គ្រោះថ្នាក់ដល់ការបង្កើត «ទម្រង់ណាតូអាស៊ី» ខណៈពេលដែលអង្គការណាតូបានពង្រឹងទំនាក់ទំនងភាពជាដៃគូនៅអាស៊ី-ប៉ាស៊ីហ្វិក។
សេចក្តីរាយការណ៍របស់ KCNA បានកើតឡើងប៉ុន្មានម៉ោងមុនពេលមេដឹកនាំកូរ៉េខាងត្បូង និងជប៉ុនត្រូវចូលរួមកិច្ចប្រជុំកំពូលប្រចាំឆ្នាំរបស់ណាតូក្នុងនាមជាអ្នកសង្កេតការណ៍ជាលើកដំបូង។ ប្រទេសទាំង ២ ក៏នឹងជួបជាមួយប្រធានាធិបតីអាមេរិក លោក ចូ បៃដិន ដើម្បីពិភាក្សាអំពីកូរ៉េខាងជើង ដែលជាកិច្ចប្រជុំកំពូលត្រីភាគីលើកដំបូងចាប់តាំងពីឆ្នាំ ២០១៧ មក។ នេះតាមការចេញផ្សាយរបស់សារព័ត៌មាន រ៉យទ័រ។
យោងតាមគេហទំព័ររបស់អង្គការណាតូ ដែលផ្សព្វផ្សាយកាលពីថ្ងៃទី ១៧ ខែមិថុនា ណាតូកំពុងពង្រឹងទំនាក់ទំនងភាពជាដៃគូអាស៊ី-ប៉ាស៊ីហ្វិក ដែលមានប្រទេសអូស្ត្រាលី ជប៉ុន កូរ៉េខាងត្បូង និង នូវែលសេឡង់។ ណាតូ បានលើកឡើងថា ក្នុងបរិបទសន្តិសុខដ៏ស្មុគស្មាញនាពេលបច្ចុប្បន្ន ទំនាក់ទំនងជាមួយដៃគូ ដែលមានការយល់ឃើញប្រហាក់ប្រហែលនៅទូទាំងសកលលោកកាន់តែសំខាន់ ដើម្បីដោះស្រាយបញ្ហាសន្តិសុខឆ្លងដែន និង ការប្រឈមជាសកល ព្រមទាំងការពារសណ្តាប់ធ្នាប់អន្តរជាតិផ្អែកលើច្បាប់។ នេះជាមូលហេតុដែលការពង្រឹងទំនាក់ទំនងជាមួយដៃគូអាស៊ី-ប៉ាស៊ីហ្វិក បង្កើតទិដ្ឋភាពសំខាន់នៃរបៀបវារៈណាតូ ដល់ឆ្នាំ ២០៣០។
ប្រទេសទាំង ៣ ក៏នឹងធ្វើសមយុទ្ធបាញ់កាំជ្រួច និងតាមដានរួមគ្នានៅជិតកោះហាវ៉ៃក្នុងខែសីហា ដែលមានឈ្មោះថា «Pacific Dragon» (នាគប៉ាស៊ីហ្វិក)។
KCNA បានលើកឡើងថា៖ «សហរដ្ឋអាមេរិកកំពុងបង្ហាញកិច្ចសហប្រតិបត្តិការយោធាជាមួយពួកទំនាស់របស់ខ្លួន ដោយមិនគិតលើតម្រូវការសន្តិសុខ និងការព្រួយបារម្ភជាចម្បងរបស់បណ្តាប្រទេសអាស៊ីប៉ាស៊ីហ្វិក»។
នៅក្នុងសេចក្តីថ្លែងការណ៍ស្រដៀងគ្នាមួយកាលពីចុងសប្តាហ៍ ក្រសួងការបរទេសកូរ៉េខាងជើងបាននិយាយថា សមយុទ្ធនេះបានបង្ហាញពីការលាក់ពុតនៃការផ្តល់ជូនរបស់សហរដ្ឋអាមេរិក ចំពោះការចូលរួមការទូត និងការសន្ទនា ដោយគ្មានលក្ខខណ្ឌជាមុន។
ប្រទេសកូរ៉េខាងជើងបានធ្វើការសាកល្បងកាំជ្រួចជាច្រើនក្នុងឆ្នាំនេះ រួមទាំងមីស៊ីលផ្លោងអន្តរទ្វីបដ៏ធំបំផុតរបស់ខ្លួន ហើយមានការព្រួយបារម្ភថា ខ្លួនអាចនឹងត្រៀមធ្វើតេស្តអាវុធនុយក្លេអ៊ែរជាលើកដំបូងចាប់តាំងពីឆ្នាំ ២០១៧ មក។
កូរ៉េខាងត្បូង និងជប៉ុន គឺជាសម្ព័ន្ធមិត្តរបស់សហរដ្ឋអាមេរិកទាំង ២ ប៉ុន្តែទំនាក់ទំនងរបស់ពួកគេជាមួយគ្នាទៅវិញទៅមក មានសភាពតានតឹង ដោយសារប្រវត្តិសាស្ត្រ ជុំវិញការកាន់កាប់របស់ជប៉ុនលើប្រទេសកូរ៉េពីឆ្នាំ ១៩១០ ដល់ឆ្នាំ ១៩៤៥។
ទីក្រុងវ៉ាស៊ីនតោនបានជំរុញទីក្រុងសេអ៊ូល និងតូក្យូឱ្យសហការគ្នាបន្ថែមទៀត ក្នុងការប្រឈមមុខនឹងការគំរាមកំហែងពីកូរ៉េខាងជើង ក៏ដូចជាដើម្បីទប់ទល់នឹងការកើនឡើងនៃឥទ្ធិពលរបស់ប្រទេសចិន។
រដ្ឋបាលថ្មីរបស់កូរ៉េខាងត្បូង ដែលកើតចេញចំពេលវិបត្តិសង្គ្រាមអ៊ុយក្រែន ដែលលុកលុយពីប្រទេសមហាអំណាចរុស្ស៊ី និងរងការគំរាមផ្នែកសម្ពាធពីសំណាក់កូរ៉េខាងជើងកំពុងបង្កើនកិច្ចខិតខំប្រឹងប្រែង ដើម្បីពង្រឹងទំនាក់ទំនងត្រីភាគីជាមួយសហរដ្ឋអាមេរិក និងជប៉ុន ដោយសើរើផ្តល់តម្លៃលើកិច្ចព្រមព្រៀងសន្តិសុខទូទៅនៃព័ត៌មានយោធា (GSOMIA)។
កូរ៉េខាងត្បូង និងជប៉ុនបានបង្កើតកិច្ចព្រមព្រៀងចែករំលែកព័ត៌មានសម្ងាត់ជាលើកដំបូងក្នុងឆ្នាំ ២០១៦ ដោយបើកបណ្តាញសម្រាប់ការផ្លាស់ប្តូរព័ត៌មានយោធាដោយផ្ទាល់ជាលើកដំបូង។ ពីមុនពួកគេម្នាក់ៗនឹងចែករំលែកព័ត៌មានសំខាន់ៗទាក់ទងនឹងសន្តិសុខតាមរយៈអាជ្ញាធរសហរដ្ឋអាមេរិក ដែលជាសម្ព័ន្ធមិត្តរួមរបស់ពួកគេ។ នេះបើយោងតាមព័ត៌មាន Korea Herald ដែលមានមូលដ្ឋាននៅកូរ៉េខាងត្បូង៕
វីដេអូ៖
