រុស្ស៊ីចោទប្រកាន់ន័រវែសពីបទរារាំងទំនិញ ដែលផ្គត់ផ្គង់សម្រាប់ប្រជាជនរុស្ស៊ីនៅលើប្រជុំកោះ Svalbard នៅមហាសមុទ្រអាក់ទិក ហើយគំរាមចេញ «វិធានការសងសឹក» មិនបញ្ជាក់ច្បាស់លាស់ ប្រសិនបើរដ្ឋាភិបាលក្រុងអូស្លូមិនដោះស្រាយបញ្ហានេះទេ។
ប្រជុំកោះ Svalbard ដែលស្ថិតនៅចំកណ្តាល រវាងឆ្នេរភាគខាងជើងរបស់ន័រវែស និងប៉ូលខាងជើង គឺជាផ្នែកមួយនៃប្រទេសន័រវែស ប៉ុន្តែប្រទេសរុស្ស៊ីមានសិទ្ធិ ក្នុងការទាញយកធនធានធម្មជាតិលើប្រជុំកោះ ក្រោមសន្ធិសញ្ញាឆ្នាំ ១៩២០ ហើយប្រជាជនដែលតាំងទីលំនៅនៅទីនោះភាគច្រើនជាជនជាតិរុស្ស៊ី។
ប្រទេសន័រវែស ដែលមិនមែនជាសហភាពអឺរ៉ុប ប៉ុន្តែចូលរួមអនុវត្តទណ្ឌកម្មជាមួយប្លុក ដើម្បីប្រឆាំងនឹងរុស្ស៊ី បានឱ្យដឹងថា ទណ្ឌកម្មនឹងមិនប៉ះពាល់ដល់ការដឹកជញ្ជូនទំនិញតាមកប៉ាល់ទៅកាន់កោះ Svalbard នោះទេ។ ប៉ុន្តែការដឹកជញ្ជូនទំនិញភាគច្រើនទៅកោះត្រូវឆ្លងកាត់មុនគេតាមរយៈប៉ុស្តិ៍ត្រួតពិនិត្យ ១ ក្នុងប្រទេសន័រវែសដីគោក ដែលបិទទំនិញរុស្ស៊ី។
ក្រសួងការបរទេសរុស្ស៊ី និយាយកាលពីថ្ងៃពុធថា៖ «យើងទាមទារឱ្យភាគីន័រវែសដោះស្រាយបញ្ហានេះឱ្យបានឆាប់តាមដែលអាចធ្វើទៅបាន»។ ក្រសួងថា៖ «យើងបានបង្ហាញថា សកម្មភាពអមិត្តប្រឆាំងរុស្ស៊ី នឹងចៀសមិនរួចពីវិធានការសងសឹកសមស្របនោះទេ»។
ក្រសួងនិយាយទៀតថា ការរឹតបន្តឹងរបស់ន័រវែស បានរំខានដល់ការងាររបស់អគ្គកុងស៊ុលរុស្ស៊ី នៅលើកោះ Spitsbergen ដែលជាកោះដ៏ធំបំផុតនៃប្រជុំកោះ Svalbard និងជាកន្លែងជីកយករ៉ែធ្យូងថ្មរបស់រុស្ស៊ី នៅទីនោះ។ យោងតាមរុស្ស៊ីរថយន្តដឹកស្បៀងអាហារ និងគ្រឿងផ្គត់ផ្គង់វេជ្ជសាស្ដ្រទៅកាន់កោះ Spitsbergen បានជាប់គាំងនៅតាមព្រំដែន។
រដ្ឋមន្ត្រីការបរទេសន័រវែសលោកស្រី Anniken Huitfeldt ប្រាប់ទីភ្នាក់ងារព័ត៌មាន AFP កាលពីថ្ងៃពុធថាន័រវែសមិនបំពានលើសន្ធិសញ្ញា ដោយការរារាំងទំនិញរបស់រុស្ស៊ីទៅកាន់កោះនោះទេ។ អ្នកស្រីថា ការបញ្ឈប់ការដឹកជញ្ជូន នៅព្រំដែនន័រវែស-រុស្ស៊ី «ឈរលើមូលដ្ឋាននៃទណ្ឌកម្ម ដែលហាមឃាត់ក្រុមហ៊ុនដឹកជញ្ជូនតាមផ្លូវគោករុស្ស៊ីពីការដឹកជញ្ជូនទំនិញនៅលើទឹកដីន័រវែស»។
ចាប់តាំងពីការឈ្លានពានអ៊ុយក្រែន កាលពីខែកុម្ភៈមក រុស្ស៊ីរងការវាយប្រហារ ដោយការដាក់ទណ្ឌកម្មរឹតបន្តឹងការដឹកជញ្ជូនទំនិញរបស់ខ្លួនតាមរយៈអឺរ៉ុប។ នៅដើមខែនេះ លីទុយអានីចាប់ផ្តើមអនុវត្តការរឹតបន្តឹងលើទំនិញមួយចំនួន ដែលដឹកជញ្ជូនតាមរថភ្លើងទៅកាន់តំបន់ដាច់ពីគេរបស់រុស្ស៊ី កាលីនីនក្រាដ។ រុស្ស៊ីនិយាយថា ការរឹតបន្តឹងលើទំនិញរបស់លីទុយអានី គឺជា«ការរារាំង» ហើយសន្យាថា នឹងសងសឹកដោយមិនបានបញ្ជាក់ថា បែបណាដូចគ្នា៕
ហួន ឌីណា
វីដេអូ៖