ប្រធានាធិបតីអាមេរិកលោក ចូ បៃដិន សន្យាកាលពីថ្ងៃពុធកណ្ដាលសប្ដាហ៍ថា អាមេរិកនឹងបន្ថែមទាហានយន្តហោះចម្បាំង និងនាវាចម្បាំងទៅអឺរ៉ុប ខណៈអង្គការណាតូយល់ព្រមពង្រឹងការទប់ទល់ដ៏ធំបំផុតរបស់ខ្លួនចាប់តាំងពីសង្គ្រាមត្រជាក់ ដើម្បីជាការឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែន។
ការប្តេជ្ញាចិត្តរបស់លោក បៃដិន នៅកិច្ចប្រជុំកំពូលនាទីក្រុងម៉ាឌ្រីដ «ដើម្បីការពារគ្រប់អ៊ីញនៃទឹកដីសម្ព័ន្ធមិត្ត» ធ្វើឡើង ខណៈដែលសម្ព័ន្ធមិត្តយោធាដឹកនាំដោយសហរដ្ឋអាមេរិកដាក់ចេញនូវផែនការថ្មីមួយ ដើម្បីពង្រឹងរដ្ឋបាល់ទិក និងប៉ូឡូញ ប្រឆាំងនឹងការវាយប្រហារណាមួយរបស់រុស្ស៊ីនាពេលអនាគត។
ស្របពេលដែលកងទ័ពអាល្លឺម៉ង់អង់គ្លេស និងសម្ព័ន្ធមិត្តមានកាន់តែច្រើននឹងដាក់ពង្រាយឆ្ពោះទៅភាគខាងកើតសហរដ្ឋអាមេរិកក៏នឹងបន្ថែមកងកម្លាំងរហូតដល់ ១០០ ០០០ នាក់ នៅទ្វីបអឺរ៉ុបបញ្ជូននាវាចម្បាំងបន្ថែមទៅអេស្ប៉ាញយន្តហោះទៅអង់គ្លេសសព្វាវុធផ្សេងៗទៅបណ្ដាប្រទេសបាល់ទិក និងទាហានខ្លះទៅរ៉ូម៉ានី។ លោក បៃដិន និយាយថា៖ «យើងនិយាយមែនពេលយើងនិយាយថា ការវាយប្រហារប្រឆាំងនឹងអ្នកណាមួយគឺជាការវាយប្រហារប្រឆាំងទាំងអស់»។
អ្វីដែលអង្គការណាតូព្រមព្រៀងកាលពីថ្ងៃពុធគឺថា កងទ័ពសម្ព័ន្ធមិត្តនឹងមានកាន់តែច្រើននៅអេស្តូនីឡេតូនី និងលីទុយអានីហើយគ្រឿងសព្វាវុធ និងគ្រឿងផ្ទុះបន្ថែមទៀតនឹងត្រូវបញ្ជូនទៅកាន់តំបន់ និងបង្កើតប្រព័ន្ធនៃការពង្រឹងយ៉ាងឆាប់រហ័ស។
មេដឹកនាំណាតូបានយល់ព្រមឆ្ពោះទៅរកការពង្រាយកម្លាំងទ័ពប្រុងជើងការខ្ពស់ជាង ៣០០ ០០០ នាក់ ខណៈពីមុនសម្ព័ន្ធភាពយោធានេះពឹងផ្អែកលើកងទ័ពតែប្រហែល ៤០ ០០០ នាក់ប៉ុណ្ណេះ ដើម្បីឆ្លើយតបទៅនឹងការវាយប្រហារណាមួយរបស់រុស្ស៊ី ឬវិបត្តិផ្សេង។
អគ្គលេខាធិការអង្គការណាតូ លោក Jens Stoltenberg ប្រាប់នៅឯសន្និសីទសារព័ត៌មានមួយថា៖ «សង្គ្រាមរបស់ប្រធានាធិបតី វ្ល៉ាឌីមៀរ ពូទីន ប្រឆាំងនឹងអ៊ុយក្រែនបានបំផ្លាញសន្តិភាពនៅអឺរ៉ុប និងបង្កើតវិបត្តិសន្តិសុខដ៏ធំបំផុតនៅអឺរ៉ុបចាប់តាំងពីសង្គ្រាមលោកលើកទី២។ ណាតូបានឆ្លើយតបដោយកម្លាំងនិងការឯកភាព»។
ទន្ទឹមនឹងនោះសហរដ្ឋអាមេរិកក៏នឹងបង្កើតទីបញ្ជាការកងទ័ពអចិន្ត្រៃយ៍ថ្មី ១ នៅប្រទេសប៉ូឡូញ ផងដែរ ខណៈដែលក្រុងវ៉ាសូវីចង់បានបែបនេះយូរហើយ។
ក្រៅពីការបង្កើនសមត្ថភាពយោធាមេដឹកនាំទាំង ៣០ របស់ណាតូក៏អញ្ជើញហ្វាំងឡង់ និងស៊ុយអែតឱ្យចូលជាសមាជិកសម្ព័ន្ធភាព ខណៈតួកគីទម្លាក់ចោលនូវសិទ្ធិវេតូរបស់ខ្លួនប្រឆាំងនឹងសមាជិកភាពរបស់ប្រទេសទាំង ២ តាមរយៈកិច្ចព្រមព្រៀង ១ ដែលស៊ុយអែត និងហ្វាំងឡង់យល់ព្រមមិនគាំទ្រក្រុមសកម្មប្រយុទ្ធឃើដ។
ឆ្លើយតបនឹងការប្រកាសថ្មីលោក ពូទីន កាលពីថ្ងៃពុធបានថ្កោលទោសចំពោះ «មហិច្ឆតាចក្រពត្តិ»របស់ណាតូដោយចោទប្រកាន់សម្ព័ន្ធមិត្តយោធានេះថា កំពុងស្វែងរក «ឧត្តមភាព» របស់ខ្លួនតាមរយៈជម្លោះអ៊ុយក្រែន។ មេដឹកនាំរុស្ស៊ីថាលោកនឹងឆ្លើយតបក្នុងរូបភាពដូចគ្នាប្រសិនបើណាតូដាក់ពង្រាយកងទ័ព និងហេដ្ឋារចនាសម្ព័ន្ធនៅហ្វាំងឡង់ និងស៊ុយអែតនៅពេលប្រទេសណ័រឌិកទាំង ២ ក្លាយជាសមាជិកពេញលេញ៕
ហួន ឌីណា