អត្ថបទរបស់ Wall Street Journal ថ្មីៗនេះ បានលាតត្រដាងថា សហរដ្ឋអាមេរិកបានសម្របសម្រួលកិច្ចប្រជុំសម្ងាត់១ នៅទីក្រុង Sharm El Sheikh ប្រទេសអេហ្ស៊ីប ជាមួយនឹងប្រមុខយោធាអ៊ីស្រាអែល និងអារ៉ាប់ ដើម្បីទប់ទល់ នឹងការគំរាមកំហែងរបស់អ៊ីរ៉ង់។
កិច្ចប្រជុំនេះ រួមមានមេទ័ពកំពូលមកពីសហរដ្ឋអាមេរិក អ៊ីស្រាអែល អារ៉ាប៊ីសាអ៊ូឌីត កាតា និងអេហ្ស៊ីប។ កិច្ចចរចាអាចធ្វើទៅរួច បន្ទាប់ពីប្រវតិ្តនៃអរិភាព រវាងអ៊ីស្រាអែល និងប្រទេសជិតខាងអារ៉ាប់ ក្នុងតំបន់ គឺជាផ្នែក១នៃគោលនយោបាយការបរទេស នៅមជ្ឈិមបូព៌ារបស់អតីតប្រធានាធិបតីលោក ដូណាល់ ត្រាំ ជាពិសេសកិច្ចព្រមព្រៀង Abraham ដែលបានធ្វើឱ្យប្រសើរឡើងនូវទំនាក់ទំនងអារ៉ាប់-អ៊ីស្រាអែល និងការសម្រេច ក្នុងការពង្រីកតំបន់គ្របដណ្តប់របស់បញ្ជាការកណ្តាល ដើម្បីរួមបញ្ចូលអ៊ីស្រាអែល។
កត្តា១ទៀតដែលជំរុញកិច្ចសហប្រតិបត្តិការនេះ ដូចដែល WSJ ពន្យល់នោះ គឺចំណាប់អារម្មណ៍របស់ប្រទេសអារ៉ាប់ ចំពោះបច្ចេកវិទ្យាការពារដែនអាកាសរបស់អ៊ីស្រាអែល «នៅពេលដែលអាមេរិកកំពុងផ្លាស់ប្តូរអាទិភាពយោធារបស់ខ្លួនឆ្ពោះទៅរកការប្រឆាំងចិន និងរុស្ស៊ី»។
ការវិវឌ្ឍចុងក្រោយបង្អស់ នៅក្នុងកិច្ចសហប្រតិបត្តិការអ៊ីស្រាអែល-អារ៉ាប់ ដែលមានភាពប្រសើរឡើង គឺជាសញ្ញា១ផ្សេងទៀតនៃសម្ព័ន្ធមជ្ឈិមបូព៌ាថ្មី ប្រឆាំងនឹងអ៊ីរ៉ង់ ដែលនឹងមានសារៈសំខាន់ ក្នុងការរក្សាស្ថិរភាពក្នុងតំបន់។
ក្រុមចម្រុះ បានពង្រឹងសម្ព័ន្ធភាពនៅមជ្ឈិមបូព៌ា និងរវាងសហរដ្ឋអាមេរិក និងប្រទេសក្នុងតំបន់។ កាលពីអតីតកាល សហរដ្ឋអាមេរិកត្រូវបានបង្ខំធ្វើឱ្យមានតុល្យភាពផលប្រយោជន៍របស់ប្រទេសអារ៉ាប់ប្រឆាំងនឹងផលប្រយោជន៍របស់អ៊ីស្រាអែល ដោយសារទំនាក់ទំនងជាមួយប្រទេសនីមួយៗ មានផលប៉ះពាល់ភូមិសាស្ត្រនយោបាយ និងសេដ្ឋកិច្ចសំខាន់ៗ សម្រាប់អាមេរិក។
នៅក្នុងទិដ្ឋភាពថ្មីនៃកិច្ចសហប្រតិបត្តិការមជ្ឈិមបូព៌ា កាន់តែធំនេះ សហរដ្ឋអាមេរិកមានឱកាស ដើម្បីអភិវឌ្ឍបន្ថែមទៀតនូវសម្ព័ន្ធភាព ក្នុងតំបន់ដ៏រឹងមាំ និងដែលមិននឹកស្មានដល់ពីមុនមក។
ប៉ុន្តែយោងតាមការចេញផ្សាយរបស់ Al-Jazeera កាលពីថ្ងៃទី២៩ ខែមិថុនា រដ្ឋមន្ត្រីការបរទេសហ្ស៊កដានី លោក Ayman al-Safadi បានបដិសេធថា គ្មានការជជែករឿងការបង្កើតសម្ព័ន្ធភាពអារ៉ាប់ជាមួយអ៊ីស្រាអែលទេ៕
វីដេអូ៖