ខណៈសំណុំរឿងរបស់ស៊ុយអែត និងហ្វាំងឡង់ ដែលដាក់ពាក្យចូលជាសមាជិករបស់អង្គការសន្ធិសញ្ញាអាត្លង់ទិកខាងជើង (NATO) កំពុងស្ថិតក្នុងសភាពក្តៅគគុកនៅឡើយ មន្ត្រីអនុវត្តច្បាប់នៃសាធារណរដ្ឋប្រជាមានិតដូណិតស្ក៍ (Donetsk People’s Republic) ដែលត្រូវបានទទួលស្គាល់ដោយប្រទេសរុស្ស៊ីតែ ១គត់នោះ បានធ្វើការចោទប្រកាន់ ចំពោះជនជាតិស៊ុយអែត ដែលចុះចូលទាហានរុស្ស៊ី ក្នុងការឡោមព័ទ្ធទីក្រុង Mariupol ថា «ជាទាហានស៊ីឈ្នួល»។
ស៊ុយអែត និងហ្វាំងឡង់ដែលមានព្រំដែនជាប់ជាមួយរុស្ស៊ី ដែលលើកទ័ពឈ្លានពានអ៊ុយក្រែន បានដាក់ពាក្យសុំចូលជាសមាជិករបស់ NATO ក្នុងកិច្ចប្រជុំកំពូលមេដឹកនាំរបស់អង្គការយោធានេះ កាលពីចុងខែឧសភា ព្រោះបើមានការឈ្លានពានរបស់រុស្ស៊ី ក្នុងថ្ងៃណា ១ នោះនឹងទទួលបានជំនួយការការពារពី NATO។
តាមការចេញផ្សាយរបស់ទីភ្នាក់ងារព័ត៌មានរុស្ស៊ី ហៅកាត់ថា «TASS» កាលពីថ្ងៃទី ៥ ខែមិថុនា មន្ត្រីអនុវត្តច្បាប់ បានប្រាប់ទីភ្នាក់ងារព័ត៌មាននេះ កាលពីថ្ងៃអង្គារថា ក្រុមអ្នកស៊ើបអង្កេត នៅសា.ប្រជាមានិតដូណិតស្ក៍ ដែលទទួលបានការគាំទ្រ ពីរុស្ស៊ី ដោយមានក្រុមទាមទារផ្តាច់ខ្លួន នៅអ៊ុយក្រែន បានចោទប្រកាន់ជនជាតិស៊ុយអែត ដែលបានចុះចាញ់នៅរោងចក្រដែក Azovstal ក្នុងទីក្រុង Mariupol ថា ជាសកម្មភាពស៊ីឈ្នួលក្នុងប្រទេសអ៊ុយក្រែន។
ទោះបីយ៉ាងណា ប្រភពបាននិយាយដោយមិនបញ្ចេញឈ្មោះនៃជនជាតិស៊ុយអែត ដែលរងការចោទប្រកាន់ជាទាហានស៊ីឈ្នួលបរទេសនោះ ក្នុងហេតុផលប្រយោជន៍នៃការស៊ើបអង្កេតតទៅមុខទៀត។
TASS បានដកស្រង់ការអះអាងរបស់ប្រភពនោះ ដែលបាននិយាយថា៖ «សំណុំរឿងព្រហ្មទណ្ឌ១ត្រូវបានធ្វើឡើងប្រឆាំងនឹងជនជាតិស៊ុយអែត។ វិធានការស៊ើបអង្កេតពាក់ព័ន្ធនឹងចុងចោទ កំពុងត្រូវបានរៀបចំ»។
យោងតាមការផ្សាយរបស់ CNN កាលពីថ្ងៃទី ១ ខែមិថុនា ដោយផ្អែកតាមទីភ្នាក់ងារព័ត៌មាន Donetsk ក្រុមអ្នកស៊ើបអង្កេត ដែលគាំទ្ររុស្ស៊ីនៅក្នុងសាធារណរដ្ឋប្រជាមានិតដូណិតស្ក៍ (DPR) ដែលប្រកាសដោយខ្លួនឯង កាលពីថ្ងៃសុក្រ បាននិយាយថា ពួកគេបានចោទប្រកាន់ពលរដ្ឋអង់គ្លេស ២ នាក់ទៀតថាជា «ទាហានស៊ីឈ្នួល»។
CNN ដកស្រង់ពីសេចក្តីរាយការណ៍ពីតំបន់ដូណិតស្ក៍ឱ្យដឹងថា៖ «ឥឡូវនេះការស៊ើបអង្កេតកំពុងដំណើរការប្រឆាំងនឹងទាហានស៊ីឈ្នួលអង់គ្លេស Dylan Healy និង Andrew Hill។ ពួកគេត្រូវបានចោទប្រកាន់ក្រោមមាត្រាដូចគ្នានឹងទាហានស៊ីឈ្នួល ៣ នាក់ ដែលត្រូវបានកាត់ទោសពីមុន។ ការស៊ើបអង្កេតកំពុងដំណើរការ ហើយការចោទប្រកាន់ ត្រូវបានអនុវត្តឡើង»។
ការិយាល័យការបរទេសរបស់ចក្រភពអង់គ្លេស បានថ្កោលទោស «ការកេងប្រវ័ញ្ច» អ្នកទោសសម្រាប់គោលបំណងនយោបាយ ហើយបាននិយាយថា ខ្លួនបានលើកឡើងបញ្ហានេះជាមួយរដ្ឋាភិបាលរុស្ស៊ី។
អ្នកនាំពាក្យ បានបន្ថែមថា៖ «យើងកំពុងទាក់ទងជាប្រចាំជាមួយរដ្ឋាភិបាលអ៊ុយក្រែនលើករណីរបស់ពួកគេ ហើយគាំទ្រយ៉ាងពេញទំហឹងដល់អ៊ុយក្រែនក្នុងកិច្ចខិតខំប្រឹងប្រែងរបស់ពួកគេ ក្នុងការដោះលែងអ្នកត្រូវបានចោទនោះ»។
សមរភូមិ Mariupol បានចាប់ផ្តើម នៅថ្ងៃទី២៥ ខែកុម្ភៈ ហើយនៅថ្ងៃទី ២០ ខែឧសភា អ្នកនាំពាក្យក្រសួងការពារជាតិរុស្ស៊ី Igor Konashenkov បាននិយាយថា យោធារុស្ស៊ី បានរំដោះទឹកដីនៃរោងចក្រ Azovstal ទាំងស្រុងពីកងកម្លាំងអ៊ុយក្រែន។ នេះបើតាម TASS៕
វីដេអូ៖