.jpg)
អ្នកនាំពាក្យក្រសួងការពារជាតិរុស្ស៊ី លោក Igor Konashenkov កំពុងធ្វើបទសម្ភាសខ្លី កាលពីថ្ងៃទី ១៤ ខែឧសភា។ AFP
មន្ត្រីចារកម្មរុស្ស៊ី បានអះអាងពីការរកឃើញភ័ស្តុតាង ដែលសហរដ្ឋអាមេរិកជ្រើសរើសសកម្មប្រយុទ្ធរដ្ឋអ៊ិស្លាម ដើម្បីចូលរួមក្នុងភាពប្រទូសរ៉ាយ នៅប្រទេសអ៊ុយក្រែន ក្នុងនាមជាទាហានស៊ីឈ្នួល។ នេះបើផ្អែកតាមសារព័ត៌មានរុស្ស៊ី និងអ៊ីរ៉ង់ ប៉ុន្តែមិនទាន់ឃើញមានការថ្លែងពីបស្ចិមប្រទេសនោះទេ។
ទីភ្នាក់ងារព័ត៌មានរុស្ស៊ី TASS កាលថ្ងៃទី ៤ ខែមិថុនា បានអះអាងថា នៅមុននេះ ប្រធានសេវាព័ត៌មានរបស់សេវាចារកម្មបរទេស លោក សឺហ្គេយ អ៊ីវ៉ា-ណូវ (Sergey Ivanov) បានប្រាប់ថា អាមេរិកកំពុងជ្រើសរើសជួលពួកសកម្មប្រយុទ្ធរដ្ឋអ៊ិស្លាម ដើម្បីចូលរួមក្នុងអរិភាព នៅប្រទេសអ៊ុយក្រែន។
ឯកអគ្គរដ្ឋទូតស៊ីរី ប្រចាំនៅរុស្ស៊ី លោក រីអាដ ហាដដាដ (Riad Haddad) បានប្រាប់ទីភ្នាក់ងារព័ត៌មានរុស្ស៊ី TASS ថា ប្រទេសលោកខាងលិច និងតួកគី បញ្ជូនអ្នកប្រយុទ្ធនៃក្រុមភេរវកររដ្ឋអ៊ិស្លាមទៅអ៊ុយក្រែន ដែលត្រូវបានហាមឃាត់ នៅក្នុងប្រទេសរុស្ស៊ី។
លោក រីអាដ ហាដដាដ បាននិយាយថា៖ «យើងមិនភ្ញាក់ផ្អើលទេ ដែលអាមេរិក បស្ចិមប្រទេស និងតួកគីបញ្ជូនក្រុមសកម្មប្រយុទ្ធអង្គការភេរវករ IS និង Jabhat al-Nusra ពីក្រុងនៅភាគពាយព្យស៊ីរី Idlib ទៅ អ៊ុយក្រែន។ ទោះពួកគេ ត្រូវបានហៅឈ្មោះខុសៗគ្នាក៏ដោយ ក៏ពួកគេជាឧបករណ៍ ដែលលោកខាងលិចប្រើប្រាស់ប្រឆាំងនឹងប្រជាជន និងសន្តិភាព»។
លោកបន្តថា៖ «នោះហើយជារបៀប ដែលពួកគេកំពុងប្រែក្លាយអ៊ុយក្រែនទៅជាមជ្ឈមណ្ឌល សម្រាប់ភេរវករ និងទាហានស៊ីឈ្នួល ដោយមិនដឹងពីផលអវិជ្ជមាន ដែលគោលនយោបាយបែបនេះនឹងប៉ះពាល់សន្តិសុខពិភពលោក»។
ទីភ្នាក់ងារព័ត៌មានអ៊ីរ៉ង់ farsnews បានបន្ថែមទម្ងន់លើការលើកឡើងនោះថា អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយថា លោកខាងលិចមានការស្ទាក់ស្ទើរ ក្នុងការឆ្លើយសំណួររបស់ក្រុងម៉ូស្គូពីទាហានស៊ីឈ្នួលនេះ។
ពាក់កណ្តាលខែមុន អ្នកនាំពាក្យក្រសួងការពារជាតិរុស្ស៊ី លោក Igor Konashenkov និយាយថា ទាហានស៊ីឈ្នួល និងអ្នកឯកទេសយោធាមកពីប្រទេស ៦៤ បានជាប់ពាក់ព័ន្ធក្នុងអរិភាពនៅអ៊ុយក្រែន ហើយថា បើតាមស្មាន ទាហានស៊ីឈ្នួលបរទេស ២ ពាន់នាក់ ត្រូវបានដឹងថា បានស្លាប់។
ផ្ទុយពីការអះអាងនេះ បស្ចិមលោក ចោទរុស្ស៊ីថា បានជួលក្រុមស៊ីឈ្នួលចូលទៅប្រយុទ្ធនៅអ៊ុយក្រែន តែមិនទាន់មានការនិយាយពាក់ព័ន្ធការលើកឡើងពីមន្ត្រីស៊ីរីនេះទេ៕
