ភាពតានតឹងកាន់តែខ្លាំងឡើង រវាងសាធារណរដ្ឋប្រជាធិបតេយ្យកុងហ្គោ និងប្រទេសជិតខាង រ្វ៉ាន់ដា ដែលនៅខាងកើតកំពុងគំរាមបង្កឱ្យកើតសង្គ្រាម នៅតំបន់បឹង Great Lakes របស់អាហ្វ្រិក។
ទោះយ៉ាងណាក៏ដោយ មិនដូចជាវិបត្តិផ្សេងទៀត នៅក្នុងទ្វីបអាហ្វ្រិក ដូចជាទុរភិក្ស គ្រោះរាំងស្ងួត រដ្ឋប្រហារ និងអំពើហិង្សាជនជាតិភាគតិច ភាពតានតឹងនេះ ទទួលបានការចាប់អារម្មណ៍ ពីអន្តរជាតិតិចតួច ជាពិសេសក្រោយសង្គ្រាមឈ្លានពានអ៊ុយក្រែនរបស់រុស្ស៊ី ផ្ទុះឡើង។
អស់រយៈពេលច្រើនសប្តាហ៍ កុងហ្គោចោទប្រកាន់រ្វ៉ាន់ដាថា បានគាំទ្រក្រុមឧទ្ទាម M23 ដែលបានសម្លាប់ជនស៊ីវិល ក្នុងការវាយប្រហារថ្មីៗ ដោយបានដណ្តើមកាន់កាប់ទីក្រុងពាណិជ្ជកម្ម Goma ដែលបណ្តាលឱ្យមនុស្សជាង ២៥ ០០០ នាក់ ត្រូវភៀសខ្លួន ហើយទំនងជាបាញ់ទម្លាក់ឧទ្ធម្ភាគចក្ររបស់អង្គការសហប្រជាជាតិ (UN) ដោយបានសម្លាប់កងរក្សាសន្តិភាព ៨ នាក់ នៅលើយន្តហោះ។
ប្រទេសរ្វ៉ាន់ដា បានបដិសេធការចោទនោះ ប៉ុន្តែទំនាក់ទំនង រវាងប្រទេសទាំង ២ នៅតែមានភាពតានតឹង។ លើសពីនេះ មន្ត្រីកុងហ្គោម្នាក់ ថែមទាំងបានប្រកាសថា បើរ្វ៉ាន់ដាចង់ធ្វើសង្គ្រាមនោះ សង្គ្រាមនឹងកើតមានឡើង។
កាលពីពាក់កណ្តាលខែមិថុនា ប្រធានាធិបតីកុងហ្គោលោក Felix Tshisekedi បានផ្អាកកិច្ចព្រមព្រៀងទ្វេភាគី ជាមួយរ្វ៉ាន់ដា ដោយចោទប្រទេសនេះថា ចង់កាន់កាប់ដីរបស់កុងហ្គោ ដើម្បីទាញយកផលចំណេញពីទ្រព្យសម្បត្តិរ៉ែដ៏ធំ។ លោកលើកឡើងថា៖ «ជនស៊ីវិលកុងហ្គោភាគខាងកើត គឺជាជនស្លូតត្រង់រស់នៅក្រោមការវាយប្រហារដ៏ឃោរឃៅពីប្រទេសជិតខាង»។
ផ្ទុយទៅវិញ រ្វ៉ាន់ដាបានចោទប្រកាន់កុងហ្គោថា វាយប្រហារព្រំដែនរបស់ខ្លួន។ ភាគីនីមួយៗ បានចោទគ្នាទៅវិញទៅមកថា បានបាញ់រ៉ុក្កែតឆ្លងព្រំដែនរៀងខ្លួន។ កាលពីពាក់កណ្ដាលខែមិថុនាដូចគ្នា កុងហ្គោបានបិទព្រំដែនរបស់ខ្លួន បន្ទាប់ពីមន្ត្រីប៉ូលិសរ្វ៉ាន់ដាម្នាក់ សម្លាប់ទាហានកុងហ្គោម្នាក់ ដែលត្រូវបានចោទថា ជាអ្នកបាញ់ និងធ្វើឱ្យកងកម្លាំងសន្តិសុខមានរបួស ក្នុងទឹកដីរបស់ខ្លួន។
អំពើហិង្សាបង្កឱ្យមានការតវ៉ាពីជនជាតិកុងហ្គោរាប់ពាន់នាក់ នៅក្រុង Goma ភាគខាងកើតប្រទេស ដើម្បីប្រឆាំងប្រធានាធិបតីរ្វ៉ាន់ដា និងអ្វីដែលខ្លួនហៅថា ជា «ការឈ្លានពានរបស់រ្វ៉ាន់ដា»។ អ្វីដែលជាការព្រួយបារម្ភដែរនោះ UN បានព្រមានអំពីការកើនឡើងនៃការស្អប់ខ្ពើម និងការរើសអើង ក្នុងតំបន់ប្រឆាំងនឹងអ្នកនិយាយភាសា Kinyarwanda ដែលជាភាសាផ្លូវការរបស់រ្វ៉ាន់ដា។
កាសែតញូវយ៉កថាមស៍ បានសរសេររៀបរាប់ថា មានបញ្ហាជាច្រើន ដែលធ្វើឱ្យមានភាពចលាចលជាច្រើន កើតឡើងនៅតំបន់ភាគខាងកើតកុងហ្គោ ដែលមានប្រជាជនជាង ១៦ លាននាក់ រស់នៅតាមភូមិរប៉ាត់រប៉ាយនៃទីជនបទ និងដែលភាគច្រើនប្រកបរបរជាកសិករ។ ហើយប្រជាជនទាំងនោះ គឺជាអ្នករងទុក្ខដោយសង្គ្រាមជាច្រើនទសវត្សរ៍។ មនុស្សរាប់លាន ត្រូវបានសម្លាប់ រំលោភ និងបណ្ដេញចេញពីផ្ទះ ដោយសារតែការវាយប្រហារហិង្សាផ្សេងៗជាច្រើនឆ្នាំមកនេះ។ ពេលមានអំពើហិង្សា តំបន់ដាច់ចេញពីរដ្ឋធានីនេះ ក៏គ្មានកម្លាំងប៉ូលិស ដែលគួរឱ្យទុកចិត្ត ឬដំណើរការពីតុលាការ ដើម្បីឃុំខ្លួនជនល្មើសនោះដែរ។
ពេលខ្លះ ប្រជាជនស្វែងរកការជ្រកកោននៅក្រុងមួយចំនួនក្នុងតំបន់ ប៉ុន្តែក៏មិនប្រាកដថា សុវត្ថិភាពដែរ។ ជាក់ស្ដែងយូរៗម្ដង ភ្នំភ្លើងនៅជិតក្រុង Goma ដែលជាទីរួមខេត្ត North Kivu បានផ្ទុះឡើង ដែលបំផ្លាញផ្ទះសំបែងអស់ជាច្រើនខ្នង នេះរាប់បញ្ចូលទាំងការផ្ទុះកាលពីឆ្នាំមុន ដែលកម្ទេចផ្ទះជាង ៥ ០០០ ខ្នងផងដែរ។ ក្នុងឆ្នាំ ២០១២ ក្រុង Goma ដែលជាមជ្ឈមណ្ឌលពាណិជ្ជកម្ម ក៏ត្រូវបានរឹបអូសដោយពួកឧទ្ទាម M23 ដែលជាកងជីវពលបង្កើតឫសគល់នៃភាពតានតឹងចុងក្រោយ រវាងកុងហ្គោ និងរ្វ៉ាន់ដា។
លើសពីនេះ បើយោងតាម Kivu Security Tracker ដែលជាអ្នកបង្កើតផែនទី ដើម្បីបង្ហាញពីអំពើហិង្សា និងការរំលោភបំពាន នៅភាគខាងកើតកុងហ្គោ ដោយរួមបញ្ចូលខេត្ត North Kivu ខេត្ត South Kivu និងខេត្ត Ituri ដែលមានក្រុមប្រដាប់អាវុធប្រហែល ១២០ ផ្សេងៗគ្នា។
ក្រុមដែលលេចធ្លោជាងគេ នាពេលបច្ចុប្បន្ននេះ រួមមានកងកម្លាំងប្រជាធិបតេយ្យសម្ព័ន្ធមិត្ត (ADF) ដែលជាក្រុមសាហាវបំផុត នៅតំបន់ ដែលត្រូវបានបង្កើតឡើង ក្នុងឆ្នាំ ១៩៩៥ ប្រឆាំងប្រធានាធិបតីនៃប្រទេសជិតខាងអ៊ូហ្គង់ដា លោក Yoweri Museveni។ ក្រៅពីនេះ ក៏មានក្រុមផ្សេងទៀត ដូចជា CODECO ដែលធ្វើការវាយប្រហាររាប់រយដង ចាប់តាំងពីឆ្នាំ ២០១៨ ខណៈដែលសូម្បីតែអាជ្ញាធរ ក៏ពិបាកបែងចែក ពួកគេពីជនស៊ីវិល។
បន្ទាប់មក គឺក្រុមឧទ្ទាម March 23 Movement ឬ M23 ដែលមានសមាជិកភាគច្រើនជាជនជាតិ Tutsis ពោលគឺជាជនជាតិតែ ១ ជាមួយប្រធានាធិបតីរ្វ៉ាន់ដា លោក Paul Kagame។ ការវាយប្រហាររបស់ក្រុមនេះទៅលើរដ្ឋាភិបាលកុងហ្គោ បានកើនឡើង ចាប់តាំងពីចុងឆ្នាំមុន បន្ទាប់ពីចោទប្រកាន់អាជ្ញាធរកុងហ្គោថា មិនគោរពតាមកិច្ចព្រមព្រៀងសន្តិភាពឆ្នាំ ២០០៩ ជាមួយក្រុមខ្លួន និងការរើសអើងប្រឆាំងអ្នកនិយាយភាសា Kinyarwanda។ កាលពីខែឧសភាកុងហ្គោក៏កំណត់ M23 ថាជាក្រុមភេរវករ។
ទោះបីជាតំបន់ភាគខាងកើត មានកងរក្សាសន្តិភាពនៃ UN ជាង ១៨ ០០០ នាក់ក្ដី តែអំពើហិង្សាផ្សេងៗ បានធ្វើឱ្យមានការចោទសួរពីប្រសិទ្ធភាពនៃកងកម្លាំងនេះ។ អំពើហិង្សា បានចាប់ផ្ដើមឡើងជាមួយនឹងអំពើប្រល័យពូជសាសន៍រ្វ៉ាន់ដា ក្នុងឆ្នាំ ១៩៩៤ ពេលដែលមនុស្សជាង ១ លាននាក់នៃក្រុមជនជាតិភាគតិច Hutu បានភៀសខ្លួន ពីរ្វ៉ាន់ដាទៅកុងហ្គោ។ ក្នុងចំណោមពួក Hutu មានឧក្រិដ្ឋជនប្រល័យពូជសាសន៍ជាច្រើន ដែលទទួលខុសត្រូវលើការសម្លាប់ជនជាតិ Tutsis រាប់លាននាក់។
នៅឆ្នាំ ១៩៩៦ រ្វ៉ាន់ដាបានលុកលុយកុងហ្គោ ហើយគាំទ្រការបះបោរ ដែលនាំទៅដល់ការផ្ដួលរំលំរដ្ឋធានី Kinshasa របស់កុងហ្គោ រហូតដល់មេដឹកនាំយូរឆ្នាំរបស់ប្រទេស លោក Mobutu Sese Seko ដែលគាំទ្រដោយសហរដ្ឋអាមេរិកត្រូវបង្ខំនិរទេសខ្លួន។ ចាប់តាំងពីពេលនោះមក ភាគខាងកើតកុងហ្គោ គឺជាកន្លែងបង្ហូរឈាម សម្រាប់ក្រុមប្រដាប់អាវុធ។
ប្រវត្តិវិទូជនជាតិកុងហ្គោលោក Georges Nzongola-Ntalaja ដែលទើបត្រូវបានតែងតាំងជាតំណាងអចិន្រ្តៃយ៍ប្រចាំ UN បានលើកឡើងថា៖ «ពិតណាស់ អំពើប្រល័យពូជសាសន៍ គឺជាកត្តាជំរុញ ១។ ប្រសិនបើអំពើប្រល័យពូជសាសន៍មិនកើតឡើង យើងប្រហែលជានឹងមិនប្រឈមនឹងបញ្ហាទាំងអស់នេះទេ»។
យ៉ាងណាមិញ ឫសគល់នៃវិបត្តិ កើតមានតាំងពីមុនអំពើប្រល័យពូជសាសន៍កើតឡើងម្ល៉េះ។ កុងហ្គោទទួលឯករាជ្យនៅឆ្នាំ ១៩៦០ ពីបែលហ្ស៊ិក។ ក្រោយពីនោះ បន្ទាប់ពីនាយករដ្ឋមន្ត្រីទី១ របស់កុងហ្គោត្រូវបានគេធ្វើឃាត ប្រទេសអាហ្វ្រិកមួយនេះ ត្រូវគ្រប់គ្រងដោយរដ្ឋាភិបាល ដែលមិនអាចនាំមកនូវសន្តិភាព និងវិបុលភាពជាបន្តបន្ទាប់។
ប៉ុន្តែលើសពីនេះ ក៏មានបញ្ហាជាប់ទាក់ទងនឹងការចោទប្រកាន់របស់កុងហ្គោលើកំណប់ទ្រព្យរ៉ែរបស់ខ្លួន ដែលរដ្ឋាភិបាលរ្វ៉ាន់ដាតែងបដិសេធ។ របាយការណ៍ឆ្នាំ ២០១៨ ដែលចេញផ្សាយដោយអ្នកជំនាញរបស់ UN ប្រចាំកុងហ្គោ បាននិយាយថា៖ «១ ភាគធំនៃមាស ដែលត្រូវជួញដូរដោយអ៊ូហ្គង់ដា និងរ្វ៉ាន់ដាត្រូវបានលួចបន្លំពីប្រទេសជិតខាង រួមទាំងសា.ប្រជាធិបតេយ្យកុងហ្គោផងដែរ»។
កាសែតញូវយ៉កថាមស៍ រាយការណ៍ដោយស្រង់របាយការណ៍ ១ ផ្សេងទៀតថា មាសពី ១០ ទៅ ២០ តោន ត្រូវបានរត់គេចពន្ធចេញពីកុងហ្គោរៀងរាល់ឆ្នាំ។ ភាគច្រើនវាត្រូវបាននាំចេញទៅកាន់ទីក្រុងឌូបៃ មុននឹងផលិតជាគ្រឿងអលង្ការលក់នៅជុំវិញពិភពលោក៕
ហួន ឌីណា