ប្រេសិតលោកខាងលិច នៅចិនកាលពីថ្ងៃចន្ទដើមសប្ដាហ៍ បានរិះគន់រុស្ស៊ី ចំពោះការលុកលុយអ៊ុយក្រែន ដោយឯកអគ្គរដ្ឋទូតអាមេរិក បាននិយាយថា ចិនមិនគួរផ្សព្វផ្សាយ«ការឃោសនា» របស់រុស្ស៊ីក្នុងអំឡុងវេទិកាសាធារណៈដ៏ធំនោះទេ។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រ។
ថ្លែងក្នុងវេទិកាសន្តិភាពពិភពលោក ដែលរៀបចំដោយសាកលវិទ្យាល័យ Tsinghua ឯកអគ្គរដ្ឋទូតសហរដ្ឋអាមេរិកលោក Nicholas Burns បានហៅសង្គ្រាមរុស្ស៊ីប្រឆាំងនឹងអ៊ុយក្រែនថា ជា«ការគំរាមកំហែងដ៏ធំបំផុត ចំពោះសណ្តាប់ធ្នាប់ពិភពលោក»។
លោក Burns និយាយថា លោកសង្ឃឹមថា អ្នកនាំពាក្យក្រសួងការបរទេសចិន នឹងបញ្ឈប់ការនិយាយឡើងវិញនូវ «ការឃោសនារបស់រុស្ស៊ី» ដែលបន្ទោសអង្គការណាតូ ចំពោះសង្គ្រាម។ លោកបន្ថែមថា៖ «ខ្ញុំសង្ឃឹមថា អ្នកនាំពាក្យក្រសួងការបរទេស ក៏នឹងឈប់និយាយកុហកអំពីមន្ទីរពិសោធន៍ជីវអាវុធរបស់អាមេរិក ដែលគ្មាននៅអ៊ុយក្រែនសោះផងដែរ»។
លោក Burns អង្គុយនៅអមដោយឯកអគ្គរដ្ឋទូតអង់គ្លេស និងបារាំង ព្រមទាំងទីប្រឹក្សារដ្ឋាភិបាលចិន និងឯកអគ្គរដ្ឋទូតរុស្ស៊ី នៅខាងស្តាំរបស់លោក។ ការពិភាក្សា កាលពីថ្ងៃចន្ទនោះ ចង្អុលបង្ហាញខុសពីស្តង់ដារនៃវេទិកាសាធារណៈ នៅចិន ក្នុងប៉ុន្មានឆ្នាំថ្មីៗនេះ ខណៈការរិះគន់លើការឈ្លានពានរបស់រុស្ស៊ី ភាគច្រើនក៏អវត្តមានពីប្រព័ន្ធផ្សព្វផ្សាយ និងការនិយាយជាសាធារណៈ។
រុស្ស៊ីហៅសកម្មភាពរបស់ខ្លួន នៅអ៊ុយក្រែនថា ជា«ប្រតិបត្តិការយោធាពិសេស» ដើម្បីដកអាវុធក្រុងកៀវ និងពួកណាហ្ស៊ីនិយម។ អ៊ុយក្រែន និងលោកខាងលិចនិយាយថា ការចោទប្រកាន់ដែលថា ជាពួកណាហ្ស៊ីនិយមគ្មានមូលដ្ឋានច្បាស់លាសល់ ហើយថា ការបង្កសង្គ្រាមនេះ គឺជាទង្វើឈ្លានពាន ដែលចិនបដិសេធមិនហៅតាម។
ខណៈសម័យប្រជុំ គឺលើប្រធានបទទូលំទូលាយរបស់«អង្គការសហប្រជាជាតិ និងសណ្តាប់ធ្នាប់សកល» ឯកអគ្គរដ្ឋទូតលោកខាងលិចទាំង៣ រិះគន់រុស្ស៊ី ចំពោះអ្វីដែលខ្លួនហៅថា ជាការឈ្លានពានខុសច្បាប់លើអ៊ុយក្រែន។ ការរិះគន់បែបនេះត្រូវបានឯកអគ្គរដ្ឋទូតរុស្ស៊ីលោក Andrey Denisov បដិសេធ។
ឯកអគ្គរដ្ឋទូតលោកខាងលិចក៏រក្សាការរិះគន់ខ្លះ ចំពោះចិនផងដែរ។ ឯកអគ្គរដ្ឋទូតអង់គ្លេសលោកស្រី Caroline Wilson និងឯកអគ្គរដ្ឋទូតបារាំងលោក Laurent Bili ក៏ច្រានចោលការអះអាងរបស់ចិន ដែលថា ជំនួយសព្វាវុធរបស់អឺរ៉ុបដល់អ៊ុយក្រែន កំពុងនាំឱ្យសង្គ្រាមរកទីបញ្ចប់មិនឃើញ។
យ៉ាងណាមិញ អ្នកនាំពាក្យក្រសួងការបរទេសចិន លោក Zhao Lijian បានឆ្លើយតបនឹងការអត្ថាធិប្បាយរបស់លោក Burns ថា គឺភាគីអាមេរិកទេ ដែលគួរឱ្យព្រួយបារម្ភ ដោយ«កំពុងផ្សព្វផ្សាយព័ត៌មានមិនពិត និងភូតកុហក»៕
ហួន ឌីណា