ប្រទេសចិន នៅដើមសប្ដាហ៍នេះ បានច្រានចោលការព្រមានពីប្រធានអង្គការណាសា ដែលថា ខ្លួននឹងអាចកាន់កាប់ឋានព្រះចន្ទ ដើម្បីជាផ្នែកមួយនៃកម្មវិធីយោធា ដោយនិយាយថា ខ្លួនតែងតែអំពាវនាវឱ្យមានការកសាងសហគមន៍នៃប្រជាជាតិ នៅអវកាសខាងក្រៅ។
អ្នកនាំពាក្យក្រសួងការបរទេសចិនលោក Zhao Lijian និយាយថា៖ «នេះមិនមែនជាលើកទី១ ទេ ដែលប្រធានរដ្ឋបាលអាកាសចរណ៍ និងអវកាសជាតិអាមេរិក មិនអើពើនឹងការពិត និងនិយាយដោយមិនទទួលខុសត្រូវ ចំពោះប្រទេសចិន»។
លោក Lijian បន្តថា៖ «ភាគីអាមេរិក បង្កើតយុទ្ធនាការលាបពណ៌ជានិច្ចប្រឆាំងនឹងការខិតខំប្រឹងប្រែងលម្ហអាកាសធម្មតា និងសមហេតុផលរបស់ចិន ហើយចិនប្រឆាំងយ៉ាងដាច់អហង្ការ ចំពោះការលើកឡើង ដែលមិនទទួលខុសត្រូវបែបនេះ»។ លោកបន្ថែមទៀតថា៖ «ចិនតែងតែជំរុញការកសាងអនាគតរួមគ្នា សម្រាប់មនុស្សជាតិ ក្នុងលម្ហអាកាស ហើយប្រឆាំងនឹងការបំពាក់អាវុធរបស់ខ្លួន និងការប្រណាំងសព្វាវុធណា ១ នៅក្នុងលម្ហ»។
ការជំទាស់របស់លោក Lijian ធ្វើឡើងបន្ទាប់ពីប្រធានអង្គការណាសា លោក Bill Nelson និយាយប្រាប់កាសែតអាល្លឺម៉ង់ Bild ក្នុងបទសម្ភាស ១ ដែលចេញផ្សាយ កាលពីថ្ងៃសៅរ៍ថា៖ «យើងត្រូវតែមានការព្រួយបារម្ភខ្លាំង ដែលចិនកំពុងចុះចតនៅលើឋានព្រះចន្ទ។ វាជារបស់យើង ហើយឥឡូវនេះ អ្នកត្រូវចេញ។ កម្មវិធីអវកាសរបស់ចិនមានជាយោធា ហើយចិនលួចគំនិត និងបច្ចេកវិទ្យាពីអ្នកដទៃ»។
ចិនបានបង្កើនល្បឿននៃកម្មវិធីអវកាសរបស់ខ្លួនក្នុងរយៈ ១ ទសវត្សរ៍កន្លងមកនេះ ដោយផ្ដោតក្នុងការរុករកលើឋានព្រះចន្ទជាចម្បង។ ចិនធ្វើការចុះចតយានគ្មានមនុស្សបើកនៅឋានព្រះចន្ទជាលើកដំបូង ក្នុងឆ្នាំ ២០១៣ ហើយរំពឹងថា នឹងបាញ់បង្ហោះរ៉ុក្កែត ដែលមានថាមពលគ្រប់គ្រាន់ ដើម្បីបញ្ជូនអវកាសយានិក នាចុងទសវត្សរ៍នេះ។
ក្រោមកម្មវិធី Artemis របស់ខ្លួនអង្គការណាសាគ្រោងនឹងបញ្ជូនបេសកកម្មនាវិកទៅកាន់គន្លងព្រះចន្ទ នៅឆ្នាំ ២០២៤ និងធ្វើការចុះចតនៅជិតប៉ូលខាងត្បូងរបស់ភពរណបនេះ ក្នុងឆ្នាំ ២០២៥ ។ ចិនក៏កំពុងរៀបចំផែនការបេសកកម្ម ដែលគ្មានមនុស្សទៅតំបន់ដូចគ្នានៃឋានព្រះចន្ទ ក្នុងពេលណា ១ នៅទសវត្សរ៍ដូចគ្នានេះ៕
ហួន ឌីណា