អស់រយៈពេលមិនតិចជាង ១ ទសវត្សរ៍ លោកហ៊ូសេន តាអ៊ីប (Hossein Taeb) មានវត្តមានដ៏អស្ចារ្យ ក្នុងជួររដ្ឋាភិបាលអ៊ីរ៉ង់ ក្នុងនាមជាអធិបតីលើអង្គភាពចារកិច្ចរបស់ប្រទេស ដោយលោកបានបំបាក់គូប្រជែងនយោបាយ និងអ្នកប្រឆាំងក្នុងស្រុក ហើយពង្រីកប្រតិបត្តិការសម្ងាត់ហួសពីព្រំដែនរបស់អ៊ីរ៉ង់ ដើម្បីកំណត់គោលដៅលើសំឡេងរិះគន់ និងសត្រូវនៅបរទេស។
ក្នុងវ័យ ៥៩ ឆ្នាំ លោក តាអ៊ីប ដែលជាប្រធានផ្នែកស៊ើបការណ៍សម្ងាត់របស់កងឆ្មាំបដិវត្តន៍អ៊ិស្លាមអ៊ីរ៉ង់ (IRGC) ដ៏មានឥទ្ធិពល ត្រូវកាសែតញូវយ៉កថាមស៍រាយការណ៍ថា គឺជាអ្នកខ្លាំង ដែលមើលទៅដូចគ្មាននរណាអាចប្រៀបបានឡើយ។ តែកាលពី ២ សប្ដាហ៍មុន លោកត្រូវបានគេដកពីតំណែងយ៉ាងតក់ក្រហល់។
ការរបូតតំណែងនេះ ត្រូវបានមើលឃើញថា ជាលទ្ធផល ១ នៃយុទ្ធនាការរបស់អ៊ីស្រាអែល ក្នុងការធ្វើឱ្យខូចសន្តិសុខរបស់អ៊ីរ៉ង់ តាមរយៈការកំណត់គោលដៅលើមន្ត្រី និងទីតាំងយោធារបស់ប្រទេសនេះ។ នេះបើយោងតាមមន្ត្រី និងអ្នកវិភាគនៃប្រទេសទាំង ២។
ការដកតំណែងរបស់លោក តាអ៊ីប ធ្វើឡើងប៉ុន្មានថ្ងៃ បន្ទាប់ពីប្រព័ន្ធផ្សព្វផ្សាយអ៊ីស្រាអែល រាយការណ៍ពីការចោទប្រកាន់ដែលថា លោកនៅពីក្រោយផែនការរបស់អ៊ីរ៉ង់ ក្នុងការសម្លាប់ ឬចាប់ពង្រត់ជនជាតិអ៊ីស្រាអែល នៅប្រទេសតួកគី ដែលជាសម្ព័ន្ធមិត្ត ក្នុងតំបន់របស់ក្រុងតេអេរ៉ង់។
វាជាការទទួលស្គាល់ដោយក្រុងតេអេរ៉ង់ថា ការប្រឈមនឹងការគំរាមកំហែងពីអ៊ីស្រាអែល ទាមទារឱ្យមានអ្នកដឹកនាំថ្មី និងការកំណត់យុទ្ធសាស្ត្រឡើងវិញ។ នេះបើយោងតាមលោក Mohammad Ali Abtahi ដែលជាអតីតអនុប្រធានាធិបតីអ៊ីរ៉ង់ ដែលពួកអភិរក្សនិយមបណ្តេញចេញ ក្នុងឆ្នាំ ២០០៩។
លោក Abtahi ដែលនៅតែមានទំនាក់ទំនងជាមួយមន្ត្រីកំពូលៗអ៊ីរ៉ង់ និយាយប្រាប់កាសែតញូវយ៉កថាមស៍ថា៖ «ការរំលោភបំពានសន្តិសុខនៅអ៊ីរ៉ង់ និងវិសាលភាពដ៏ធំនៃប្រតិបត្តិការរបស់អ៊ីស្រាអែល ពិតជាធ្វើឱ្យខូចដល់អង្គភាពស៊ើបការណ៍ដ៏មានឥទ្ធិពលបំផុតរបស់យើង។ កម្លាំងនៃសន្តិសុខរបស់យើង តែងតែជាមូលដ្ឋានគ្រឹះនៃសាធារណរដ្ឋអ៊ិស្លាម ហើយត្រូវខូចខាត នៅឆ្នាំចុងក្រោយនេះ»។
ការរាយការណ៍ដដែលពីកាសែតញូវយ៉កថែមស៍ ដែលស្រង់សម្ដីប្រភពជិតស្និទ្ធនឹងមន្ត្រីកំពូលអ៊ីរ៉ង់ម្នាក់និយាយថា ការអំពាវនាវសុំឱ្យដកតំណែងលោក តាអ៊ីប លេចឡើងនៅពេលមានកំណើននៃការមិនទុកចិត្តគ្នា ក្នុងជួរមេដឹកនាំរបស់រដ្ឋាភិបាលអ៊ីរ៉ង់ បន្ទាប់ពីមេបញ្ជាការជាន់ខ្ពស់ ក្នុងអង្គភាពការពារព័ត៌មានរបស់ឆ្មាំបដិវត្តន៍ លោកឧត្តមសេនីយ៍ Ali Nasiri ត្រូវបានចាប់ខ្លួនដោយសម្ងាត់លើការចោទពីបទធ្វើចារកម្មឱ្យអ៊ីស្រាអែល។
ហើយប្រភពពីមន្ត្រីអ៊ីរ៉ង់ ដែលសុំមិនបញ្ចេញឈ្មោះម្នាក់ទៀត បានឱ្យដឹងថា ការចាប់ខ្លួនលោក Ali Nasiri ធ្វើឡើងត្រឹមតែ ២ ខែ បន្ទាប់ពីបុគ្គលិកជាច្រើននាក់នៃកម្មវិធីអភិវឌ្ឍន៍មីស៊ីលរបស់ក្រសួងការពារជាតិ ត្រូវចាប់ខ្លួនក្រោមការសង្ស័យថា ធ្វើឱ្យបែកធ្លាយព័ត៌មានសម្ងាត់យោធា រួមទាំងការរចនាប្លង់មីស៊ីល តម្រង់ទៅអ៊ីស្រាអែល។
នៅប៉ុន្មានឆ្នាំចុងក្រោយនេះ អ៊ីស្រាអែលបង្កើនវិសាលភាព និងការវាយប្រហាររបស់ខ្លួនយ៉ាងញឹកញាប់ ក្នុងប្រទេសអ៊ីរ៉ង់ រួមទាំងនៅលើទីតាំងនុយក្លេអ៊ែរ និងយោធា ដែលអង្គភាពរបស់លោក តាអ៊ីប ជាអ្នកទទួលបន្ទុកការពារ។
មន្ត្រីអ៊ីស្រាអែលម្នាក់បាននិយាយថា ផ្នែក ១ នៃយុទ្ធសាស្ត្រនោះ ត្រូវការការបរាជ័យរបស់ឆ្មាំបដិវត្តន៍ ក្នុងសង្គ្រាមមិនចេញមុខជាមួយអ៊ីស្រាអែល ដោយអ៊ីស្រាអែលនឹងបង្កើតជម្លោះ រវាងមេដឹកនាំនយោបាយអ៊ីរ៉ង់ និងការបង្កើតផ្នែកការពារជាតិ និងស៊ើបការណ៍។
មន្ត្រីអ៊ីរ៉ង់បានទទួលស្គាល់ថា បណ្តាញចារកម្មរបស់អ៊ីស្រាអែល បានជ្រៀតចូលយ៉ាងជ្រៅទៅក្នុងជួររង្វង់នៃមន្ត្រីសន្តិសុខរបស់ខ្លួន ដោយអតីតរដ្ឋមន្ត្រីស៊ើបការណ៍សម្ងាត់របស់ប្រទេស ព្រមានកាលពីឆ្នាំមុនថា មន្ត្រីគួរតែភ័យខ្លាចដល់អាយុជីវិតរបស់ខ្លួន។ នេះបើយោងតាមការរាយការណ៍ពីប្រព័ន្ធផ្សព្វផ្សាយរបស់អ៊ីរ៉ង់នានា។
ក្នុងរយៈពេលចុងក្រោយនេះភ្នាក់ងារអ៊ីស្រាអែល បានធ្វើឃាតមន្ត្រី ឬមនុស្សរបស់អ៊ីរ៉ង់ជាច្រើននាក់តាមរយៈរ៉ូបូតបញ្ជាពីចម្ងាយ ឬឃាតករបាញ់កាំភ្លើងជិះលើម៉ូតូ។ ទន្ទឹមនឹងនោះ ក៏មានការវាយប្រហារផ្សេងៗ ដូចជាការបង្ហ្រោះដូនចូលទៅកន្លែងផលិតមីស៊ីល និងនុយក្លេអ៊ែរ ព្រមទាំងចាប់ពង្រត់ និងសួរចម្លើយភ្នាក់ងាររបស់ឆ្មាំបដិវត្តន៍អ៊ីរ៉ង់ជាដើម។ ហើយកាលពីខែឧសភា អ៊ីរ៉ង់ក៏សង្ស័យថា អ៊ីស្រាអែលស្ថិតនៅពីក្រោយនៃការស្លាប់របស់អ្នកវិទ្យាសាស្ត្ររបស់ខ្លួន ២ នាក់ផងដែរ។
ជាផ្នែក ១ នៃប្រសិទ្ធភាព ក្នុងយុទ្ធនាការរបស់ប្រទេសអ៊ីស្រាអែល លោក តាអ៊ីប រងនូវសម្ពាធយ៉ាងធ្ងន់ ក្នុងការលុបបំបាត់បណ្តាញចារកម្មរបស់អ៊ីស្រាអែល នៅអ៊ីរ៉ង់ ឬវាយប្រហារបកវិញ។ នេះបើយោងតាមទីប្រឹក្សារដ្ឋាភិបាល និងបុគ្គលម្នាក់ទៀត ដែលមានទំនាក់ទំនង ជាមួយនឹងកងឆ្មាំបដិវត្តន៍។
លោកឧត្តមសេនីយ៍ Nasiri ដែលត្រូវបានចាប់ខ្លួន កាលពីខែមិថុនានោះ មានតួនាទីជាមេបញ្ជាការជាន់ខ្ពស់ ក្នុងអង្គភាពការពារព័ត៌មានរបស់ឆ្មាំបដិវត្តន៍ ដែលទទួលបន្ទុកត្រួតពិនិត្យការងាររបស់អង្គការ។ ការចាប់ខ្លួនរបស់លោក រួមជាមួយនឹងការវាយប្រហារម្តងហើយម្តងទៀត ពីសំណាក់អ៊ីស្រាអែល ពិតជាបានធ្វើឱ្យមានភាពរកាំរកូសដល់ភាពជាអ្នកដឹកនាំ នៅក្នុងក្រុងតេអេរ៉ង់ រហូតដល់មានការអំពាវនាវឱ្យលោកតាអ៊ីប ចុះពីតំណែងស្ងាត់ៗ។ នេះបើយោងតាមមន្ត្រីអ៊ីរ៉ង់ ដែលបានដឹងពីស្ថានភាពនេះ។
សម្ពាធដ៏កាន់តែធ្ងន់ ១ ទៀត នៅពេលដែលលោក តាអ៊ីប ត្រូវបានគេរាយការណ៍ថា នៅពីក្រោយផែនការចាប់ពង្រត់ ឬសម្លាប់អ្នកទេសចរជនជាតិអ៊ីស្រាអែល នៅប្រទេសតួកគី ដើម្បីជាការសងសឹក ចំពោះឃាតកម្មលើលោក Sayad Khodayee ដែលជាមេបញ្ជាការរងនៃអង្គភាពឆ្មាំបដិវត្តន៍សម្ងាត់ ដោយអ៊ីរ៉ង់បានចោទប្រកាន់អ៊ីស្រាអែលថា ជាអ្នកប្រព្រឹត្តរឿងនេះ។
លោក Saeed Khatibzadeh អ្នកនាំពាក្យក្រសួងការបរទេសអ៊ីរ៉ង់ ឱ្យដឹងកាលពីចុងខែមិថុនាថា៖ «ការចោទប្រកាន់របស់អ៊ីស្រាអែលដែលថា ក្រុងតេអេរ៉ង់មានផែនការវាយប្រហារ ចំពោះជនជាតិអ៊ីស្រាអែលនៅតួកគី គឺជារឿងគួរឱ្យអស់សំណើច និងជាសេណារីយោ ដែលរៀបចំទុកជាមុន ដើម្បីធ្វើឱ្យខូចទំនាក់ទំនងនៃប្រទេសមូស្លីមទាំង ២ (អ៊ីរ៉ង និងតួកគី)»។
ប៉ុន្តែប្រព័ន្ធផ្សព្វផ្សាយនៅប្រទេសតួកគី បានធ្វើសេចក្ដីរាយការណ៍ថា អាជ្ញាធររបស់ប្រទេសបានចាប់ខ្លួនជនជាតិអ៊ីរ៉ង់ ៥ នាក់ និងជនជាតិតួកគី ៣ នាក់ ដែលត្រូវបានសង្ស័យថា ជាប់ពាក់ព័ន្ធក្នុងផែនការនេះ ដោយដកហូតកាំភ្លើងខ្លីចំនួន ២ ដើម ឧបករណ៍បំបិទសំឡេងចំនួន ២ គ្រឿង រួមទាំងឯកសារ និងសម្ភារឌីជីថល ដែលមានអត្តសញ្ញាណ និងអាសយដ្ឋានរបស់បុគ្គលក្នុងបញ្ជីគោលដៅ៕
ហួន ឌីណា