ប្រធានាធិបតីស្វ៊ីស លោក អ៊ីហ្គណាហ្ស៊ីអូ កាស៊ីស (Ignazio Cassis) បានអះអាងអំពីផលអវិជ្ជមាននៃការសម្រេចចិត្តដែលអាចកើតមានក្នុងការប្រគល់ទ្រព្យសម្បត្តិរបស់ប្រទេសរុស្ស៊ី ដែលត្រូវបានបង្កកទៅឱ្យអ៊ុយក្រែន តាមការស្នើរបស់ភាគីអ៊ុយក្រែន ហើយសហរដ្ឋអាមេរិកក៏ធ្លាប់បានស្នើរឿងនេះក្នុងពេលកន្លងមកដែរ។
លោក កាស៊ីស បាននិយាយកាលពីថ្ងៃអង្គារ នាដើមសប្ដាហ៍នេះថា ប្រទេសស្វ៊ីស សូមដាស់តឿនដល់សហគមន៍អន្តរជាតិអំពីផលអវិជ្ជមាននៃការសម្រេចចិត្តដែលអាចកើតមាន ក្នុងការប្រគល់ទ្រព្យសម្បត្តិរបស់រុស្ស៊ីដែលបានបង្កកទៅឱ្យអ៊ុយក្រែន។ នេះតាមការចេញផ្សាយរបស់ទីភ្នាក់ងារព័ត៌មានរុស្ស៊ី TASS។
ការលើកឡើងរបស់លោកប្រធានាធិបតីស្វ៊ីសរូបនេះ បានធ្វើឡើងក្នុងសន្និសីទអន្តរជាតិស្តីពីការស្តារឡើងវិញរបស់អ៊ុយក្រែនដែលធ្វើឡើងនៅទីក្រុង Lugano របស់ប្រទេសស្វីស ហើយសារព័ត៌មានអង់គ្លេសយ៉ាងហោច ២គឺរ៉យទ័រ និង The Guardian ព្រមទាំងបណ្តាញព័ត៌មានស្វីស swissinfo.ch បានចុះផ្សាយការលើកឡើងនេះ។
លោក កាស៊ីស បាននិយាយថា ការសម្រេចចិត្តបែបនេះនឹងបង្កើតគំរូដ៏គ្រោះថ្នាក់ និងធ្វើឱ្យខូចដល់មូលដ្ឋានគ្រឹះនៃសណ្តាប់ធ្នាប់សេរី។
TASS បានដកស្រង់សម្តីរបស់លោកប្រធានាធិបតីស្វីសដូចដែលបានលើកឡើងថា៖ «សិទ្ធិនៃម្ចាស់កម្មសិទ្ធិ សិទ្ធិនៃទ្រព្យសម្បត្តិ គឺជាសិទ្ធិមូលដ្ឋាននៃសិទ្ធិមនុស្ស»។ លោកបន្ថែមថា សិទ្ធិទាំងនោះអាចត្រូវរំលោភបានលុះត្រាតែមានមូលដ្ឋានច្បាប់ត្រឹម ដែលត្រូវត្រូវបានបង្កើតឡើង ដូចករណីក្នុងអំឡុងការរីករាលដាលនៃជំងឺកូវីដ ១៩។
ប្រទេសលោកខាងលិចបានចាប់ផ្តើមដាក់ទណ្ឌកម្មដែលមិនធ្លាប់មានពីមុន ចំពោះរុស្ស៊ី ជុំវិញប្រតិបត្តិការយោធាពិសេសរបស់ប្រទេសនេះនៅអ៊ុយក្រែន កាលពីចុងខែកុម្ភៈឆ្នាំនេះ ក្នុងនោះមានរួមទាំងការបង្កកទ្រព្យសម្បត្តិបរទេសប្រហែល ៣០០ ពាន់លានដុល្លាររបស់ធនាគារកណ្តាលរុស្ស៊ី ក៏ដូចជាទ្រព្យសម្បត្តិក្រៅប្រទេសរបស់ធនាគារ និងក្រុមហ៊ុនរុស្ស៊ីផ្សេងទៀត។ នេះបើតាមការចេញផ្សាយរបស់ TASS។
ប៉ុន្តែបើតាមការលើកឡើងរបស់ The Guardian ប្រទេសអ៊ុយក្រែន មានផែនការស្នើសុំទ្រព្យសម្បត្តិច្រើនរហូតដល់ ៥០០ ពាន់លានដុល្លារ ដែលរឹបអូសពីរុស្ស៊ីដើម្បីផ្តល់មូលធិនិសម្រាប់ការស្តារប្រទេសអ៊ុយក្រែន ឡើងវិញ។
យោងតាម TASS អាមេរិកបានសម្រេចចិត្តមិនប្រគល់ទ្រព្យសម្បត្តិដែលរឹបអូសទៅឱ្យម្ចាស់ស្របច្បាប់របស់ពួកគេវិញនៅពេលអនាគតឡើយ ខណៈដែលសភាតំណាងរាស្ត្រអាមេរិកបានអនុម័តការសម្រេចចិត្តលក់ទ្រព្យសម្បត្តិរឹបអូសមួយចំនួនដើម្បីផ្តល់ជំនួយដល់ទីក្រុងកៀវ។
TASS បានបន្តថា រដ្ឋាភិបាលក្រុងវ៉ាស៊ីនតោនកំពុងប្រើទ្រព្យសកម្មដែលបង្កករបស់ធនាគារកណ្តាលរុស្ស៊ី ដើម្បីផ្តល់ជំនួយហិរញ្ញវត្ថុ និងយោធាដល់រដ្ឋាភិបាលក្រុងកៀវ។ ការសម្រេចនេះត្រូវបានគាំទ្រដោយលោក ចូសេព បូររែលល៍ (Josep Borrell) ឧត្តមស្នងការសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ។
យោងតាមអ្នកនាំពាក្យរបស់វិមានក្រឹមឡាំង លោក Dmitry Peskov ការរឹបអូសទ្រព្យសម្បត្តិរបស់រុស្ស៊ី «បង្វែរបទដ្ឋានច្បាប់ទាំងអស់» និងស្មើនឹង «ការដកហូតកម្មសិទ្ធិឯកជន»។ រដ្ឋមន្ត្រីការបរទេសរុស្ស៊ីលោក Sergey Lavrovបានពិពណ៌នាគំនិតផ្តួចផ្តើម ក្នុងការប្រគល់ទ្រព្យសម្បត្តិទាំងនោះទៅឱ្យអ៊ុយក្រែនថា ជា «ចោរកម្ម»៕
វីដេអូ៖