កងទ័ពនៃប្រទេសកូរ៉េខាងត្បូង អូស្ត្រាលី កាណាដា ជប៉ុន និងសហរដ្ឋអាមេរិក នឹងចូលរួមក្នុងសមយុទ្ធពហុភាគី ដែលឱ្យឈ្មោះថា «Pacific Dragon» (នាគប៉ាស៊ីហ្វិក) នៅពាក់កណ្តាលខែសីហានេះ ដើម្បីត្រៀមទប់ទល់ជាយថាហេតុពីការកូរ៉េខាងជើង។
កូរ៉េខាងត្បូង សហរដ្ឋអាមេរិក និងជប៉ុន គ្រោងនឹងធ្វើសមយុទ្ធការពារកាំជ្រួចផ្លោង ដើម្បីបង្កើនអន្តរប្រតិបត្តិការយោធា និងការត្រៀមខ្លួនប្រឆាំងនឹងការកើនឡើងនៃការគំរាមកំហែងពីកូរ៉េខាងជើង។ នេះបើយោងតាមការចេញផ្សាយរបស់បណ្តាញព័ត៌មាន Korea Herald។
យោធាកូរ៉េខាងត្បូងបានបញ្ជាក់ កាលពីថ្ងៃអាទិត្យថា សមយុទ្ធការពារ មីស៊ីលផ្លោង «Pacific Dragon» ដែលដឹកនាំដោយកងនាវាចរប៉ាស៊ីហ្វិករបស់អាមេរិក នឹងធ្វើឡើងរយៈពេល ២សប្តាហ៍ ដោយចាប់ពីថ្ងៃចន្ទ រហូតដល់ថ្ងៃទី១៤ ខែសីហា នៅឯឆ្នេរសមុទ្រហាវ៉ៃ។
ប្រទេសសរុបចំនួន៥ រួមមានកូរ៉េខាងត្បូង អូស្ត្រាលី កាណាដា ជប៉ុន និងសហរដ្ឋអាមេរិក នឹងចូលរួមក្នុងសមយុទ្ធពហុភាគីនេះ។ កងទ័ពជើងទឹកកូរ៉េខាងត្បូង គ្រោងនឹងបញ្ជូននាវាពិឃាត Sejong ទម្ងន់ ៧ ៦០០តោន ប្រភេទ Aegis ដែលបំពាក់ដោយកាំជ្រួច SM-2។
សមយុទ្ធ «Pacific Dragon» មានគោលបំណងធ្វើឱ្យប្រសើរឡើងនូវអន្តរប្រតិបត្តិការ និងការសម្របសម្រួលយុទ្ធវិធី និងបច្ចេកទេស ក្នុងចំណោមអ្នកចូលរួម ដើម្បីស្វែងរក តាមដាន រាយការណ៍ និងវាយតម្លៃគោលដៅផ្លោង។
ក្នុងអំឡុងពេលសមយុទ្ធនេះ ប្រទេសទាំង៥ នឹងអនុវត្តការរកឃើញ តាមដាន និងចែករំលែកព័ត៌មានអំពីគ្រាប់ផ្លោង ដែលបាញ់ដោយកងទ័ពជើងទឹកអាមេរិក។ នេះបើយោងតាមយោធាកូរ៉េខាងត្បូង។ កងទ័ពជើងទឹកអាមេរិក ក៏នឹងស្ទាក់ចាប់គ្រាប់មិនពិត ជាមួយនឹងមីស៊ីលនាំផ្លូវផងដែរ។
ទោះបីជាសមយុទ្ធនេះ ត្រូវបានរៀបចំឡើងរៀងរាល់ ២ឆ្នាំម្តង ក្នុងឱកាសនៃសមយុទ្ធ Rim of the Pacific ឬ RIMPAC ដែលដឹកនាំដោយសហរដ្ឋអាមេរិកក៏ដោយ ក៏សមយុទ្ធនេះ មិនត្រូវបានបើកចំហ នៅក្នុងឆ្នាំ២០១៨ និងឆ្នាំ២០២០ ដើម្បីកុំឱ្យមានការបង្កហេតុដល់កូរ៉េខាងជើង។
ប៉ុន្តែការបញ្ជាក់របស់យោធាកូរ៉េខាងត្បូង បានកើតឡើងបន្ទាប់ពីប្រមុខការពារជាតិកូរ៉េខាងត្បូង អាមេរិក និងជប៉ុន បានជួបប្រជុំគ្នាកាលពីខែមិថុនា ហើយបានយល់ព្រមធ្វើឱ្យទៀងទាត់ និងផ្សព្វផ្សាយសមយុទ្ធការពារមីស៊ីលត្រីភាគី ដើម្បីទប់ស្កាត់ការគំរាមកំហែងមីស៊ីលផ្លោងរបស់កូរ៉េខាងជើង៕
វីដេអូ៖