ប្រទេសអ៊ុយក្រែន បានអំពាវនាវឱ្យអង្គការសហប្រជាជាតិ (UN) និងកាកបាទក្រហមអន្តរជាតិ (ICRC) ស៊ើបអង្កេត ចំពោះការស្លាប់របស់ជនជាតិអ៊ុយក្រែនជាង ៥០ នាក់ ពីការវាយប្រហារលើពន្ធនាគារក្នុងតំបន់ Olenivka ដែលរុស្ស៊ីប្រើជាកន្លែង សម្រាប់ឃុំឃាំងឈ្លើយសឹកអ៊ុយក្រែន។
ដោយជាក់ស្ដែង ហេតុការណ៍ដែលបានកើតឡើង ក្នុងកន្លែងឃុំឃាំងនៅ Olenivka ក្រោមការគ្រប់គ្រងរបស់សាធារណរដ្ឋប្រជាមានិត Donetsk (DNR) នេះ នៅតែមិនទាន់ច្បាស់លាស់នោះទេថា ជាស្នាដៃរបស់ភាគីខាងណា ខណៈដែលអ៊ុយក្រែន និងរុស្ស៊ី បានព្យាយាមទម្លាក់កំហុសដាក់គ្នាទៅវិញទៅមក ចំពោះការវាយប្រហារនេះ។
អ៊ុយក្រែនបាននិយាយថា អ្នកទោសដែលជាប់ឃុំខ្លួន ក្នុងពន្ធនាគារនេះ ត្រូវបានធ្វើទារុណកម្ម ហើយបន្ថែមទៀតថា ទីនេះជាគោលដៅនៃការវាយប្រហាររបស់រុស្ស៊ី ដែលចង់បំផ្លាញភ័ស្តុតាងនៃការធ្វើទារុណកម្ម និងការសម្លាប់អ្នកទោស ដោយប្រធានាធិបតីអ៊ុយក្រែន លោក Volodymyr Zelensky បានលើកឡើងថា ការវាយប្រហារនេះ គឺជាឧក្រិដ្ឋកម្មសង្គ្រាម ដោយចេតនារបស់រុស្ស៊ី។
ខាងភាគីរុស្ស៊ីបានប្រាប់ថា ទីកន្លែងនេះ ត្រូវបានវាយប្រហារដោយគ្រាប់រ៉ុក្កែតចម្ងាយឆ្ងាយរបស់អ៊ុយក្រែន ដោយក្រសួងការពារជាតិរុស្ស៊ីបង្ហើបឱ្យដឹងថា ការវាយប្រហារលើពន្ធនាគារនៅ Olenifka ត្រូវបានធ្វើឡើងជាមួយនឹងគ្រាប់រ៉ុក្កែត HIMARS ដែលផលិតនៅសហរដ្ឋអាមេរិក ហើយចោទអ៊ុយក្រែន ពីបទបង្កហេតុដោយចេតនា ខណៈទូរទស្សន៍ Russia 1 របស់រដ្ឋាភិបាលរុស្ស៊ី បានចេញវីដេអូឃ្លីប ១ បង្ហាញពីផ្នែកខាងក្នុងនៃមន្ទីរឃុំឃាំង ក្រោយការវាយប្រហារ ដោយឃើញគ្រែ ២ ជាន់ បាក់ខ្ទេចខ្ទី និងសាកសពឆេះខ្លោចមើលមិនយល់។
តែអ៊ុយក្រែនបានបដិសេធថា មិនមានការវាយប្រហារណា ១ ដោយគ្រាប់រ៉ុក្កែត ឬកាំភ្លើងធំរបស់ខ្លួននោះឡើយ ហើយបានអំពាវនាវឱ្យ UN និង ICRC បើកការស៊ើបអង្កេត ចំពោះហេតុការណ៍នេះ។ ដោយបន្ទាប់ពីការវាយប្រហារនោះ អ៊ុយក្រែនបានអំពាវនាវ តាមរយៈការបង្ហោះតាមបណ្ដាញសង្គមថា UN និង ICRC គួរចាត់វិធានការបន្ទាន់លើបញ្ហានេះ ដ្បិតអង្គការទាំង ២ បានធានាថា អ្នកទោសសង្គ្រាម (ឈ្លើយសឹក) នៅពន្ធនាគារនេះ នឹងមានសុវត្ថិភាព។
ជាមួយគ្នានេះ ខាង ICRC បានបង្ហើបប្រាប់ថា អង្គការកំពុងព្យាយាមចូលទៅកាន់ទីតាំងនេះ ដើម្បីផ្តល់ជាជំនួយ ក្នុងការជម្លៀស និងព្យាបាលអ្នករបួស ដោយ ICRC ឱ្យដឹងក្នុងសេចក្តីថ្លែងការណ៍របស់ខ្លួនថា៖ «អាទិភាពរបស់យើងនាពេលនេះ គឺការធ្វើឱ្យប្រាកដថា អ្នករបួសទទួលបានការព្យាបាល ហើយសាកសពត្រូវបានចាត់ចែងយ៉ាងសមរម្យ»។
យ៉ាងណាក្ដី មនុស្សជាច្រើនបានដឹងថា ឈ្លើយសឹក ដែលត្រូវឃុំឃាំង ក្នុងពន្ធនាគារនេះ មានរួមទាំងសមាជិកនៃកងវរសេនាតូច Azov ដែលត្រូវបានចាប់ខ្លួន នៅពេលពួកគេប្រយុទ្ធការពារក្រុង Mariupol ភាគខាងត្បូង កាលពីខែឧសភាផងដែរ ដោយរុស្ស៊ីចោទមនុស្សទាំងនេះថា ជាពួកណាហ្ស៊ីថ្មី និងឧក្រិដ្ឋជនសង្គ្រាម។
កាលពីថ្ងៃសុក្រ ចុងសប្ដាហ៍កន្លងទៅ បន្ទាប់ពីមានការវាយប្រហារនោះ ស្ថានទូតរុស្ស៊ីប្រចាំចក្រភពអង់គ្លេស បានសរសេរលើបណ្ដាញសង្គមធ្វីតធើរថា៖ «ក្រុមប្រដាប់អាវុធ Azov សមទទួលទោសប្រហារជីវិត តែមិនមែនដោយការបាញ់ប្រហារបែបនេះនោះទេ ពោលគឺការព្យួរក ដោយសារពួកគេមិនមែនជាទាហានពិត ដូច្នេះពួកគេសមនឹងទទួលការស្លាប់យ៉ាងអាម៉ាស់»។
មុនខែកុម្ភៈ ឆ្នាំនេះ ពន្ធនាគារមួយនេះ នៅទទេស្អាត និងមិនត្រូវបានប្រើប្រាស់ឡើយ រហូតដល់មានការឈ្លានពានរបស់រុស្ស៊ី ទើបត្រូវបានយកមកធ្វើជាកន្លែងឃុំឃាំងឈ្លើយសឹក និងជនស៊ីវិល ដែលឆ្លងមិនផុតពីការត្រួតពិនិត្យតាមរយៈប្រព័ន្ធ ដែលរុស្ស៊ីប្រើ ដើម្បីសួរចម្លើយជនជាតិអ៊ុយក្រែន ដែលត្រូវចាប់ខ្លួនមុននឹងសម្រេចថា តើត្រូវបញ្ជូនពួកគេទៅណា៕
វីដេអូ៖