The Phnom Penh Post Search

Search form




Logo of Phnom Penh Post newspaper Phnom Penh Post - ស៊ុយអែត និង​ហ្វាំងឡង់ កាន់​តែកៀក​​ក្នុងការ​ក្លាយជា​សមាជិក​អង្គការ​ណាតូ

ស៊ុយអែត និង​ហ្វាំងឡង់ កាន់​តែកៀក​​ក្នុងការ​ក្លាយជា​សមាជិក​អង្គការ​ណាតូ

Content image - Phnom Penh Post
លោក​បៃដិន (កណ្ដាល) ធ្វើដំណើរ​ជាមួយ​នាយក​រដ្ឋមន្ត្រី​ស៊ុយអែត លោកស្រី Magdalena Andersson និង​ប្រធានាធិបតី​ហ្វាំងឡង់ លោក Sauli Niinistö ក្នុង​ក្រុង​វ៉ាស៊ីនតោន កាល​ពីថ្ងៃ​ទី ១៩ ខែ​ឧសភា។ AFP

ស៊ុយអែត និង​ហ្វាំងឡង់ កាន់​តែកៀក​​ក្នុងការ​ក្លាយជា​សមាជិក​អង្គការ​ណាតូ

ព្រឹទ្ធសភា​អាមេរិក និង​សភាអ៊ីតាលី ដែល​ជា​រដ្ឋ​សមាជិក ២ របស់​ណាតូ កាល​ពី​ថ្ងៃ​ពុធ បាន​អនុម័ត​លើ​ការ​ចូល​ជា​សមាជិក​អង្គការ​សន្ធិសញ្ញា​អាត្លង់ទិក​ខាងជើង (NATO) របស់​ប្រទេស​ហ្វាំងឡង់ និង​ស៊ុយអែត ដែល​ព្រួយបារម្ភ​ពី​សន្តិសុខ​ជាតិ បន្ទាប់​ពី​ប្រទេស​រុស្ស៊ី​បើកការ​ឈ្លានពាន​លើ​អ៊ុយក្រែន។

ការវិវឌ្ឍ​ចុងក្រោយ​នេះ គឺ​ជា​ជំហាន​ដ៏​គួរឱ្យ​សម្គាល់ ១ ក្នុង​ចំណោម​រដ្ឋ​ទាំង ៣០ របស់​សម្ព័ន្ធភាព ដែល​ប្រកាន់​ខ្ជាប់​លើ​គោលការណ៍ «វាយ ១ ​ស្មើ​នឹង​វាយ​ទាំងអស់»។

ជាមួយ​នឹង​លទ្ធផល​គាំទ្រ​ដ៏លើស​លប់ ៩៥ សំឡេង ទល់នឹង ១ សំឡេង ក្នុង​ការ​គាំទ្រ​បេក្ខភាព​ហ្វាំងឡង់ និង​ស៊ុយអែត នៅ​ក្នុង​ព្រឹទ្ធសភា​អាមេរិក លោក​ប្រធានា​ធិបតី ចូ បៃដិន បាន​និយាយ​ថា​៖ «ការ​បោះឆ្នោត​ជា​ប្រវត្តិសាស្ត្រ​នេះ បញ្ជូន​សញ្ញា​ដ៏សំខាន់ ១ នៃ​ការ​ប្តេជ្ញា​ចិត្ត​ទ្វេភាគី​របស់​អាមេរិក ដែល​មាន​និរន្តរភាព ចំពោះ​អង្គការ​ណាតូ ហើយ​ដើម្បី​ធានា​ថា​ សម្ព័ន្ធភាព​របស់​យើង​ត្រៀម ដើម្បី​តទល់​នឹង​បញ្ហា​ប្រឈម​នៅ​ពេល​នេះ និង​នៅថ្ងៃ​ខាងមុខ»។

លោក​បន្ត​ថា៖ «ខ្ញុំ​ទន្ទឹងរង់ចាំ​ការ​ចុះ​ហត្ថលេខា​លើ​ពិធីសារ​ចូលជា​ធរមាន និង​ស្វាគមន៍​ស៊ុយអែត និង​ហ្វាំងឡង់​ដែល​ជា​ប្រទេស​ប្រជាធិបតេយ្យ​ខ្លាំង ២ ដែល​កងកម្លាំង​យោធា​របស់​ពួកគេ​មាន​សមត្ថភាព​ខ្ពស់​ចូល​ទៅ​ក្នុង​សម្ព័ន្ធ​ការពារ​ដ៏អស្ចារ្យ​បំផុត ក្នុង​ប្រវត្តិសាស្ត្រ»។

នៅ​ឯអ៊ីតាលី​វិញ​ក៏​ដូចគ្នា​លោកស្រី Giorgia Meloni ប្រធាន​បក្ស Brothers of Italy ដែល​ត្រូវ​បាន​គេ​ចាត់​ទុក​ថា កំពុង​នាំមុខ​លើ​សម្ទុះ​នៃ​ការ​គាំទ្រ ចំពោះ​ការ​បោះឆ្នោត​នៅ​ចុង​ខែ​ក្រោយ បាន​និយាយ​ថា​៖ «នៅ​ចំពោះ​មុខ​ការ​ឈ្លានពាន​របស់​រុស្ស៊ី​ ប្រឆាំង​នឹង​អ៊ុយក្រែន ការពង្រឹង​រណសិរ្ស​អឺរ៉ុប​នៃ​សម្ព័ន្ធភាព គឺ​ជា​ជំហាន​ដ៏សំខាន់ ១ ដែល​អាច​ដើរតួ ក្នុង​ការ​រារាំង​ដល់​ការ​គំរាម​កំហែង​ថ្មី​របស់​រុស្ស៊ី»។

ស៊ុយអែត និង​ហ្វាំងឡង់ បានដាក់​ពាក្យសុំ​ក្លាយជា​សមាជិក​ណាតូ នៅ​ខែ​ឧសភា ដោយ​កែប្រែ​នូវ​ជំហរ​យូរអង្វែង​របស់​ខ្លួន​នៃ​ការមិន​ចូលបក្ស​សម្ព័ន្ធ ទោះបី​ខ្លួន​ជា​ដៃគូ​របស់​ណាតូ​យ៉ាង​សំខាន់​ក្ដី​។ វាគឺ​ជាការ​ផ្លាស់ប្តូរ​ដ៏សំខាន់​នៃ​ការរៀបចំ​សន្តិ​សុខ សម្រាប់​ប្រទេស​​ទាំង ២ បន្ទាប់​ពី​ប្រទេស​​ជិត​ខាង​រុស្ស៊ី បាន​ចាប់ផ្តើម​ឈ្លាន​ពាន​អ៊ុយក្រែន កាល​ពី​ចុង​ខែ​កុម្ភៈ។

យ៉ាងណា​មិញ ដើម្បី​អាច​ឱ្យ​ហ្វាំងឡង់ និង​ស៊ុយអែត​ក្លាយជា​សមាជិក​នៃ​អង្គការ​ណាតូ រដ្ឋ​ទាំងអស់​របស់​សម្ព័ន្ធភាព​នេះ ត្រូវការ​ស្រុះស្រួល​មតិ​គ្នា ដោយ​មិន​ត្រូវ​មាន​សមាជិក​ណាមួយ​ជំទាស់​ឡើយ។ ដំណើរការ​នៃ​ការ​អនុញ្ញាត​ឱ្យចូលរួម ដោយ​ច្បាប់​ពី​រដ្ឋ​នីមួយៗ ត្រូវ​បាន​ចុះ​ហត្ថលេខា​រួមគ្នា កាលពី​ដើម​ខែ​មុន។ ដំណើរការ​នៃ​ការផ្ដល់​សិទ្ធិ​តាម​ច្បាប់​បែប​នេះ អាច​នឹង​ប្រើ​ពេល​យូរ​ខែ ប៉ុន្តែ​មាន​រដ្ឋ​ជា​សមាជិក​ចំនួន ២៣ ហើយ ដែល​បាន​អនុម័ត។

មុន​នឹងដំណើរការ​បែបនេះ​ត្រូវបាន​ចុះហត្ថលេខា តួកគី គឺជា​សមាជិក ១ ដែល​ប្រឆាំង​ជំទាស់​ដាច់​ខាត ដោយ​លើក​ឡើង​ពី​ការ​ព្រួយបារម្ភ​សន្តិសុខ​ជាតិ​របស់​ខ្លួន ហើយ​ចោទ​ប្រកាន់​ប្រទេស​ស៊ុយអែត និង​ហ្វាំងឡង់​ថា បានផ្ដល់​ជំនួយ​ដល់​គណបក្ស​ពលករ​ឃើដ (PPK) ដែល​ក្រុង​អង់ការ៉ា សហភាព​អឺរ៉ុប ក៏​ដូចជា​សហរដ្ឋអាមេរិក ចាត់​ទុកថា ជា​ក្រុម​ភេរវករ។

មិន​បាន ១ ខែ​ផង ក្រោយ​តួកគី​លើក​សិទ្ធិ​វេតូ​របស់ខ្លួន ប្រធានា​ធិបតី​តួកគី លោក Recep Tayyip Erdoğan និយាយ​កាល​ពី​ពាក់​កណ្ដាល​ខែ​មុន​ថា លោក​នឹង​អាច​បង្កក​ឱ្យ​ស៊ុយអែត និង​ហ្វាំងឡង់ ពី​ការ​ចូលរួម​ជាមួយ​អង្គការ​ណាតូ​នេះ ប្រសិនបើ​ប្រទេស​ទាំង ២ មិន​ធ្វើតាម​កិច្ច​ព្រមព្រៀង​ប្រឆាំង​នឹង​ភេរវកម្ម ដែល​ភាគី​ទាំង ៣ ចុះ​ហត្ថលេខា ក្នុង​កិច្ចប្រជុំ​កំពូល​ណាតូ នៅ​ចុង​ខែ​មិថុនា។

ការ​ចូល​រួម​ណាតូ គឺ​ជា​ប្រធាន​​បទ​ក្ដៅ​គគុក​មួយ ដែល​ពុះ​កញ្ជ្រោល​ឡើង ក្រោយ​មាន​ការ​ឈ្លានពាន​អ៊ុយក្រែន​របស់​រុស្ស៊ី ដែល​និយាយ​ថា មហិច្ឆតា​នៃ​ការ​ពង្រីក​ខ្លួន​របស់​ណាតូ គឺជា​ការ​គំរាមកំហែង​ដល់​សន្តិសុខ​ជាតិ​របស់​ខ្លួន។ នៅ​ចុងខែ​មិថុនា ១ ថ្ងៃ​ក្រោយ​ពេល​តួកគី​លើក​វេតូ​ប្រឆាំង​នឹង​ស៊ុយអែត និង​ហ្វាំងឡង់​របស់​ខ្លួន ប្រធានាធិបតី វ៉្លាឌីមៀរ ពូទីន និយាយ​ថា ប្រទេស​ទាំង ២ គ្មាន​បញ្ហា​ជាមួយ​រុស្ស៊ី ដូច​ដែល​រុស្ស៊ី​មាន​បញ្ហា​ជាមួយ​អ៊ុយក្រែន​ទេ ដោយ​ប្រទេស​​ទាំង ២ មិន​បាន​បង្ក​ការ​គំរាម​កំហែង​ពី​មុនមក។

ប៉ុន្តែ​លោក ពូទីន ព្រមាន​ថា៖ «ប្រសិន​បើ​ណាតូ​ដាក់​ពង្រាយ​យោធា និង​ហេដ្ឋា​រចនា​សម្ព័ន្ធ នៅ​ទីនោះ (ហ្វាំងឡង់ និង​ស៊ុយអែត) យើង​នឹង​ឆ្លើយ​តប និង​បង្កើត​ការ​គំរាម​កំហែង ក្នុង​រូបភាព​ដូចគ្នា ដែល​គេ​ធ្វើ​មក​លើ​យើង»។

យ៉ាងណា​មិញ ការវិវឌ្ឍ​នៃ​បេក្ខភាព​របស់​ហ្វាំងឡង់ និង​ស៊ុយអែត កំពុង​ខិត​ទៅ​មុខ​កាន់​តែ​ខ្លាំង ខណៈ​ការ​ស្ទង់​មតិ​ផ្សេងៗ បង្ហាញ​ថា សម្ទុះ​នៃ​ការគាំទ្រ​សាធារណៈ​នៃ​ប្រទេស​ណ័រឌិក​ទាំង ២ ក៏​ហក់​ឡើង​មិន​ធ្លាប់​មាន​ពី​មុន​មក ដែល​ខុស​ពី​អ្វី​ដែល​លោក ពូទីន ទទូច​ចង់​បាន​ក្ដែងៗ​កន្លង​មក៕

ហួន ឌីណា

អត្ថបទគួរចាប់អារម្មណ៍