សារព័ត៌មានរ៉យទ័រ នៅទីក្រុងប៉េកាំងបានរាយការណ៍ថាក្រសួងការបរទេសចិន បាននិយាយនៅថ្ងៃព្រហស្បតិ៍កណ្ដាលសប្ដាហ៍ថា កិច្ចប្រជុំរវាងរដ្ឋមន្ត្រីការបរទេសចិនលោក វ៉ាងយី (Wang Yi) និងសមភាគីជប៉ុនរបស់លោកគឺរដ្ឋមន្ត្រីការបរទេសជប៉ុនលោកYoshimasa Hayashi នៅក្រៅកិច្ចប្រជុំអាស៊ាន នៅកម្ពុជា ត្រូវបានលុបចោល។
លោកស្រី Hua Chunying អ្នកនាំពាក្យរបស់ក្រសួង បាននិយាយនៅក្នុងសន្និសីទសារព័ត៌មានជាទៀងទាត់ថាភាគីចិនមានការមិនពេញចិត្តជាខ្លាំង ចំពោះសេចក្តីថ្លែងការណ៍រួម ដែលដាក់ចេញដោយក្រុមប្រទេសអភិវឌ្ឍន៍សេដ្ឋកិច្ចទាំង៧ (G7) ទាក់ទិននឹងកោះតៃវ៉ាន់ដែលលោកស្រីប្រធានសភាអាមេរិកទើបបញ្ចប់ទស្សនកិច្ចកាលពីថ្ងៃពុធ។
យោងតាមព័ត៌មានរ៉យទ័ររដ្ឋមន្ត្រីការបរទេសនៃប្រទេស G7 រួមទាំងប្រទេសជប៉ុនបានអំពាវនាវដល់ប្រទេសចិន កាលពីថ្ងៃពុធនោះឱ្យដោះស្រាយភាពតានតឹងជុំវិញច្រកសមុទ្រតៃវ៉ាន់ដោយសន្តិវិធី។
សេចក្តីថ្លែងការណ៍របស់រដ្ឋមន្ត្រីការបរទេស G7 ដែលមានប្រទេសកាណាដាបារាំងអាល្លឺម៉ង់អ៊ីតាលីជប៉ុនចក្រភពអង់គ្លេសសហរដ្ឋអាមេរិក និងតំណាងជាន់ខ្ពស់នៃសហភាពអឺរ៉ុបបង្ហាញនូវការប្តេជ្ញាចិត្តរួមគ្នា ក្នុងការរក្សានូវសណ្តាប់ធ្នាប់អន្តរជាតិ ដោយផ្អែកលើច្បាប់សន្តិភាពនិងស្ថិរភាព នៅទូទាំងច្រកសមុទ្រតៃវ៉ាន់និងលើសពីនេះ។
G7 លើកឡើងក្នុងសេចក្តីថ្លែងការណ៍ថា៖ «យើងមានការព្រួយបារម្ភ ចំពោះសកម្មភាពគំរាមកំហែងថ្មីៗ និងដែលត្រូវបានប្រកាសដោយសាធារណរដ្ឋប្រជាមានិតចិន (PRC) ជាពិសេសសមយុទ្ធបាញ់គ្រាប់ពិត និងការបង្ខិតបង្ខំសេដ្ឋកិច្ចដែលមានភាពប្រថុយប្រថាននឹងការកើនឡើងដែលមិនចាំបាច់»។
G7 បានបន្ថែមថា៖ «មិនមានហេតុផលណាមួយ ក្នុងការប្រើដំណើរទស្សនកិច្ចជាលេស សម្រាប់សកម្មភាពយោធាឈ្លានពាន នៅក្នុងច្រកសមុទ្រតៃវ៉ាន់នោះទេ។ វាជារឿងធម្មតានិងជាទម្លាប់សម្រាប់សមាជិកសភាមកពីប្រទេសរបស់យើង ក្នុងការធ្វើដំណើរអន្តរជាតិ។ ការឆ្លើយតប ដែលកើនឡើងរបស់ PRC ធ្វើឱ្យមានហានិភ័យនៃភាពតានតឹងកើនឡើង និងធ្វើឱ្យតំបន់មាននូវអស្ថិរភាព»៕