ត្រឹមតែរយៈពេល ១០ ថ្ងៃប៉ុណ្ណោះ នៃការបញ្ចប់ទស្សនកិច្ចរបស់រដ្ឋមន្ត្រីការបរទេសរុស្ស៊ី ដែលបានលើកទ័ពចូលឈ្លានពានអ៊ុយក្រែន ទៅកាន់ប្រទេស ៤ ក្នុងទ្វីបអាហ្វ្រិក ឥឡូវនេះ ប្រមុខការទូតអាមេរិក គឺលោករដ្ឋមន្ត្រីការបរទេស អាន់ថូនី ប្ល៊ីនកែន (Antony Blinken) ជាអ្នកទៅជាន់ទឹកដីនេះម្ដង ដែលសកម្មភាពនេះ ត្រូវបានគេជឿថា ជា «បេសកកម្មការទូត ដែលធ្វើឡើង ដើម្បីទប់ទល់នឹងឥទ្ធិពលរបស់រុស្ស៊ី នៅលើទ្វីបនេះ»។
ដោយផ្តើមចុះចតដំបូងបង្អស់ នៅអាហ្វ្រិកខាងត្បូង ដែលជាប្រទេសធំទី៩ នៅទ្វីបអាហ្វ្រិក និងជាសមាជិករបស់ក្រុមប្រទេសក្នុងប្លុក BRICS ដោយមានរុស្ស៊ី និងចិនជាសមាជិកផងដែរ លោក ប្ល៊ីនកែន គ្រោងបំពេញទស្សនកិច្ចយ៉ាងហោចប្រទេស ២ ទៀត រួមមានសា.ប្រជាធិបតេយ្យកុងហ្គោ និងរ្វ៉ាន់ដា ដែលសុទ្ធសឹងជាប្រទេសមានឥទ្ធិពលលើវិស័យយោធាក្នុងតំបន់ ហើយគ្រោងបញ្ចប់ដំណើរទស្សនកិច្ចនៅថ្ងៃទី ១១ ខែសីហា។
បន្ទាប់ពីទស្សនកិច្ចនៅអាហ្វ្រិកខាងត្បូង លោករដ្ឋមន្ត្រីការបរទេស នឹងធ្វើដំណើរទៅកុងហ្គោ ពីថ្ងៃទី ៩ ដល់ថ្ងៃទី ១០ ជាពេលដែលលោកត្រូវបានរំពឹងថា នឹងថ្លែងការគាំទ្ររបស់អាមេរិក សម្រាប់កិច្ចខិតខំប្រឹងប្រែងរបស់តំបន់នេះ ដែលដឹកនាំដោយប្រទេសកេនយ៉ា និងអង់ហ្គោឡា ដើម្បីជំរុញឱ្យមានសន្តិភាព នៅភាគខាងកើតកុងហ្គោ និងតំបន់ Great Lakes របស់អាហ្វ្រិក។
កាលពីថ្ងៃចន្ទ រដ្ឋមន្ត្រីការបរទេសអាមេរិក បានពិពណ៌នាអំពីយុទ្ធសាស្ត្ររបស់អាមេរិក សម្រាប់អនុតំបន់សាហារ៉ាអាហ្វ្រិក ក្នុងសុន្ទរកថាគោលនយោបាយដ៏សំខាន់ ១ នៅសាកលវិទ្យាល័យ Pretoria នៃអាហ្វ្រិកខាងត្បូង។ នេះបើផ្អែកតាមការចេញផ្សាយរបស់បណ្តាញសារព័ត៌មាន Politico ដែលមានមូលដ្ឋាននៅសហរដ្ឋអាមេរិក។
តាមការផ្សាយដដែលនោះ តំបន់អាហ្វ្រិកទទួលរងផលប៉ះពាល់ធ្ងន់ធ្ងរពីឥទ្ធិពលនៃជំងឺរាតត្បាតសកលកូវីដ ១៩ និងការកើនឡើងតម្លៃអាហារ និងប្រេង ដែលបណ្តាលពីសង្គ្រាមរបស់រុស្ស៊ី នៅអ៊ុយក្រែន។
កាលពីចុងខែកក្កដា ក្នុងទស្សនកិច្ចនៅតំបន់អាហ្វ្រិក ដោយធ្វើដំណើរទៅកាន់ប្រទេសយ៉ាងហោច ៤ ដូចជាអេហ្ស៊ីប អេត្យូពី អ៊ូហ្គង់ដា និងកុងហ្គោ ក្នុងនោះក៏មានការជួបជាមួយប្រមុខដឹកនាំនៃប្រទេសមួយចំនួនផងដែរ រដ្ឋមន្ត្រីការបរទេសរុស្ស៊ី លោក ស៊ែហ្គេយ៍ ឡាវរ៉ូវ (Sergey Lavrov) បានរៀបចំសុន្ទរកថាដ៏វែងអន្លាយ ដើម្បីពន្យល់មូលហេតុដល់តំណាងអចិន្ត្រៃយ៍នៃប្រទេសសមាជិកសហភាពអាហ្វ្រិក និងស្ថាប័នការទូត នៅទីក្រុងអាឌីសអាបេបារបស់ប្រទេសអេត្យូពី កាលពីថ្ងៃទី ២៧ ខែ កក្កដា ឆ្នាំ ២០២២។ ស្ថានទូតរុស្ស៊ីប្រចាំនៅអេត្យូពី នាពេលនោះបានអញ្ជើញប្រមុខការទូតនៃប្រទេសមួយចំនួន នៅក្នុងតំបន់ ដើម្បីចូលរួមស្តាប់ការថ្លែងរបស់ប្រមុខការទូតរុស្ស៊ី។
វត្តមានទស្សនកិច្ចរបស់លោក ប្ល៊ីនកែន ក៏ជាការបង្ហាញឱ្យឃើញពីការប្រឆាំងនឹងសកម្មភាព «អាក្រក់» របស់រុស្ស៊ី ដែលប្រឹងពង្រីកឥទ្ធិពលយ៉ាងខ្លាំងនៅតំបន់នោះ។ នេះបើតាមលោក Douglas Yates អ្នកវិទ្យាសាស្ត្រនយោបាយជំនាញខាងនយោបាយអាហ្វ្រិក ដែលបង្រៀននៅសាលា American Graduate School ក្នុងក្រុងប៉ារីស។ បណ្តាញព័ត៌មានបារាំង France24 បានដកស្រង់ការយល់ដឹងរបស់អ្នកវិភាគរូបនេះ មកចុះផ្សាយថា គោលបំណងនៃការធ្វើដំណើរលើកទី២ របស់លោក ប្ល៊ីនកែន ទៅកាន់អាហ្វ្រិក គឺដើម្បី«បង្កើតយុទ្ធសាស្ត្រជាមួយដៃគូអាហ្វ្រិក ក្នុងគោលបំណងប្រឆាំងនឹងចេតនារបស់រុស្ស៊ី ដែលចង់ធ្វើឱ្យខូចលទ្ធិប្រជាធិបតេយ្យ» នៅទ្វីបនេះ។
តាមអ្នកវិភាគដដែល លោក ប្ល៊ីនកែន ត្រូវបានផ្តល់ការអនុញ្ញាតសម្រាប់បេសកកម្មបែបនេះដោយច្បាប់ H.R. 7311 ដែលកំណត់ឱ្យក្រសួងការបរទេសអាមេរិកធ្វើ «សកម្មភាពប្រឆាំងចំពោះសកម្មភាពអាក្រក់របស់រុស្ស៊ីនៅអាហ្វ្រិក» ដែលសភាអាមេរិកបានអនុម័ត កាលពីថ្ងៃទី ២៧ ខែ មេសា ឆ្នាំ ២០២២។ អ្វីដែលគេហៅថា សកម្មភាពអាក្រក់របស់រុស្ស៊ីរួមមានការប្រើប្រាស់អំណាចរឹង និងទន់ ដើម្បីពង្រីកឥទ្ធិពលរបស់ទីក្រុងម៉ូស្គូ នៅលើទ្វីបនេះ។
France24 បានឱ្យដឹងទៀតថា រុស្ស៊ីមានអំណាចខ្លាំងលើក្រុមទាហានស៊ីឈ្នួល «Wagner Group» ដែលមានទំនាក់ទំនងច្បាស់លាស់ ជាមួយក្រុងម៉ូស្គូ និងមានវត្តមាននៅក្នុងប្រទេសជាច្រើន រួមទាំងសា.អាហ្វ្រិកកណ្តាល ស៊ូដង់ និងម៉ាលី។ ក្រុមនេះត្រូវបានសហភាពអឺរ៉ុបដាក់ទណ្ឌកម្ម ជុំវិញការបង្កអំពើហិង្សា លួចធនធានធម្មជាតិ និងបំភិតបំភ័យជនស៊ីវិល។ អំណាចទន់របស់រុស្សី រួមមានការប្រើប្រាស់ប្រព័ន្ធផ្សព្វផ្សាយសង្គម និងផ្លូវការ ដើម្បីផ្សព្វផ្សាយការឃោសនាប្រឆាំងលោកខាងលិច និងប្រឆាំងលទ្ធិប្រជាធិបតេយ្យ។
រដ្ឋមន្ត្រីការបរទេសអាមេរិក បានជ្រើសរើសប្រទេស ៣ ដែលលោកនឹងទៅទស្សនាយ៉ាងប្រយ័ត្នប្រយែង «លើកលែងតែអាហ្វ្រិកខាងត្បូង ពួកគេ (កុងហ្គោ និងរ្វ៉ាន់ដា មិនត្រូវបានចាត់ទុកថា ជាគំរូនៃលទ្ធិប្រជាធិបតេយ្យ ហើយអាមេរិកចង់ធ្វើឱ្យប្រាកដថា ប្រទេសទាំងនេះនៅខាងពួកគេ ដោយសារពួកគេមានសមត្ថភាពយោធា។ លោក Yates និយាយថា ពួកគេអាចប្រើ ដើម្បីទប់ទល់នឹងឥទ្ធិពលរបស់ក្រុងម៉ូស្គូ។
អាហ្វ្រិកខាងត្បូង ក៏ដូចប្រទេសអាហ្វ្រិក ១៦ ផ្សេងទៀត បានបដិសេធក្នុងការបោះឆ្នោតលើសេចក្តីសម្រេចរបស់អង្គការសហប្រជាជាតិ ដែលថ្កោលទោសការឈ្លានពានពីរុស្ស៊ីលើអ៊ុយក្រែន ខណៈកុងហ្គោ និងរ្វ៉ាន់ដា បោះឆ្នោតគាំទ្រ។ ប្រធានាធិបតីអាហ្វ្រិកខាងត្បូង លោក Cyril Ramaphosa មិនធ្វើការថ្កោលទោសចំពោះការឈ្លានពាននេះទេ។
អាហ្វ្រិកខាងត្បូង គឺជាផ្នែក ១ នៃក្រុម BRICS រួមជាមួយប្រេស៊ីល រុស្ស៊ី ឥណ្ឌា និងចិន ដោយត្រូវបានគេមើលឃើញថា ជាប្រទេសដែលមានសេដ្ឋកិច្ចទីផ្សារ កំពុងរីកចម្រើននាំមុខគេរបស់ពិភពលោក។
ខណៈពេលដែលការឈ្លានពានរបស់រុស្ស៊ី នៅថ្ងៃទី ២៤ ខែកុម្ភៈ បានបណ្តាលឱ្យមានការថ្កោលទោសយ៉ាងទូលំទូលាយពីបណ្តាប្រទេស G7 និងសម្ព័ន្ធមិត្តរបស់ពួកគេ មានតែប្រទេសប្រេស៊ីល ១ គត់ពីក្នុងក្រុម BRICS ដែលគាំទ្រដំណោះស្រាយរបស់ UN ខណៈប្រទេសអាហ្វ្រិកខាងត្បូង ចិន និងឥណ្ឌា បដិសេធ។
ក្នុងទស្សនកិច្ចរបស់ខ្លួន លោក ឡាវរ៉ូវ ព្យាយាមពន្យល់មេដឹកនាំអាហ្វ្រិកមួយចំនួន ដែលមានទំនាក់ទំនងការទូតស្អិតល្មួតជាមួយខ្លួន ពីដំណើរដើមទង ដែលនាំឱ្យមានសង្គ្រាមនៅទឹកដីអ៊ុយក្រែន និងមូលហេតុនៃវិបត្តិផ្សេងៗ ដូចជាថាមពល និងស្បៀងអាហារ ព្រមទាំងដំណោះស្រាយ នាអនាគតរបស់ប្រទេសរុស្ស៊ី។
លោកពញ្ញាក់អារម្មណ៍ ដល់សមាជិកក្នុងអង្គប្រជុំ ដោយពន្យល់ថា សង្គ្រាមរបស់អាមេរិក ក្នុងប្រទេសផ្សេងៗ ដូចជាអ៊ីរ៉ាក់ និងលីប៊ីជាដើម គ្មានហេតុផលប្រាប់នរណាឡើយ ហើយលោកដឹងដំណើរវិវឌ្ឍពី ១ ដំណាក់កាល ទៅ ១ដំណាក់កាល ដែលនិយាយទៅដល់ទំនាក់ទំនងជាមួយអង្គការណាតូ និងការហាមឃាត់ ចំពោះការអូសទាញអ៊ុយក្រែនចូលណាតូជាដើម៕
វីដេអូ៖