ក្រសួងការពារជាតិរុស្ស៊ី បាននិយាយនៅក្រោយឧបទ្ទវហេតុ កាលពីថ្ងៃអង្គារថា «ការផ្ទុះឃ្លាំងផ្ទុកគ្រាប់រំសេវទ័ពអាកាសជាច្រើន» បង្កឱ្យមានការផ្ទុះនៅមូលដ្ឋានទ័ពអាកាស Saki នៅឆ្នេរសមុទ្រភាគខាងលិចនៃឧបទ្វីប ដែលរុស្ស៊ីកាត់យកពីអ៊ុយក្រែន ក្នុងឆ្នាំ ២០១៤។
ក្រសួងនិយាយថា វាមិនមែនកើតឡើងដោយសារតែការវាយប្រហាររបស់នរណាមួយនោះទេ ខណៈឧបករណ៍នៃទ័ពអាកាស ក៏មិនរងខូចខាត ហើយ «គ្មាននរណាម្នាក់រងគ្រោះ»។
តែនាយកដ្ឋានសុខាភិបាលនៅគ្រីមា និយាយថា ជនស៊ីវិលម្នាក់បានស្លាប់ និងមនុស្ស ៨ នាក់ទៀត រងរបួស។ តាមសាក្សី ដែលទីភ្នាក់ងារព័ត៌មានរ៉យទ័រ បានដកស្រង់សម្ដី ការផ្ទុះនោះ កើតឡើងសរុបចំនួន ១៣ ដងខ្លាំងៗ។
ទីប្រឹក្សាប្រធានាធិបតីរបស់អ៊ុយក្រែន លោក Mykhailo Podolyak ប្រាប់ថា ការផ្ទុះដ៏កក្រើកជាបន្តបន្ទាប់នៅទីនេះ អាចជាស្នាដៃរបស់អ្នកបំផ្លិចបំផ្លាញបក្ខពួក ខណៈក្រុងកៀវបដិសេធរាល់ការទទួលខុសត្រូវ ចំពោះការវាយប្រហារលើទឹកដី ដែលរុស្ស៊ីកាន់កាប់មួយនេះ។
លោក Podolyak ប្រាប់ថា អ៊ុយក្រែនមិនទទួលខុសត្រូវករណីនេះទេ ប៉ុន្តែថា ការអសមត្ថភាពរបស់រុស្ស៊ី អាចជាមូលហេតុនៃការផ្ទុះនេះ។ លោកបន្ថែមថា៖ «អ្នករស់នៅក្រោមការគ្រប់គ្រងគិតថា ការកាន់កាប់នេះ នឹងត្រូវបញ្ចប់»។
ចំណែកលោក វ៉ូឡូឌីមៀរ ហ្សេឡេនស្គី វិញ មិនបាននិយាយផ្ទាល់ពីការបំផ្ទុះ នៅមូលដ្ឋានទ័ពអាកាស Saki នេះទេ តែប្រាប់ថា វាជាការត្រឹមត្រូវ ដែលមនុស្សកំពុងផ្តោតលើតំបន់គ្រីមា ហើយ «យើងនឹងមិនបោះបង់ទេ។ តំបន់សមុទ្រខ្មៅមិនអាចមានសុវត្ថិភាពទេ ខណៈដែលគ្រីមា ត្រូវបាន (រុស្ស៊ី) កាន់កាប់»។
នៅលើបណ្តាញសង្គមផ្សេងៗទៀត មានការភ្ញាក់ផ្អើលជាមួយនឹងការសន្និដ្ឋានថា ជាការវាយប្រហាររបស់អ៊ុយក្រែន ដោយប្រើមីស៊ីលរយៈចម្ងាយឆ្ងាយ ខណៈកាសែតញូវយ៉កថែមស៍ ដកស្រង់សម្ដីពីប្រភពមន្ត្រីអ៊ុយក្រែន ដែលថា យោធារបស់ខ្លួនធ្វើការវាយប្រហារនេះ។
បើវាជាការវាយប្រហារដោយអ៊ុយក្រែនពិតមែន នោះវានឹងក្លាយជាការវាយប្រហាររបស់អ៊ុយក្រែនលើកដំបូងលើឧបទ្វីប និងភាពតានតឹងនៃជម្លោះ។
កាលពីខែមុន ទីស្នាក់ការកណ្តាលនៃកងនាវាចរសមុទ្រខ្មៅរុស្ស៊ី នៅកំពង់ផែគ្រីមា រងការវាយប្រហារដោយការផ្ទុះតូច ១ ពីដ្រូនដែលរុស្ស៊ីចោទអ៊ុយក្រែន។ ក្រុមមន្ត្រីទីក្រុងម៉ូស្គូ ព្រមានថា ការវាយប្រហារណាមួយលើគ្រីមា នឹងបង្កឱ្យមានការសងសឹកដ៏ធំ រួមទាំងការវាយប្រហារអគាររដ្ឋបាលសំខាន់ៗនៅក្រុងកៀវ៕
ហួន ឌីណា