លោក ហ្គុយតឺរ៉េស (ឆ្វេង) ចាប់ដៃជាមួយរដ្ឋមន្ត្រីការបរទេសកូរ៉េខាងត្បូង លោក Park Jin មុនកិច្ចប្រជុំរបស់ពួកគេ ក្នុងទីក្រុងសេអ៊ូល កាលថ្ងៃទី ១២ ខែសីហា។
ក្រសួងការបរទេសកូរ៉េខាងជើង កាលពីថ្ងៃអាទិត្យ រិះគន់ការអត្ថាធិប្បាយថ្មីៗរបស់អគ្គលេខាធិការអង្គការសហប្រជាជាតិលើការគាំទ្ររបស់លោក ចំពោះការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង ដោយហៅការលើកឡើងនេះថា មានភាពលម្អៀង និងខ្វះភាពយុត្តិធម៌។
ទីភ្នាក់ងារព័ត៌មានរដ្ឋកូរ៉េខាងជើង KCNA ចេញសេចក្តីថ្លែងការណ៍ ១ ពីក្រសួងការបរទេសរបស់ខ្លួន បន្ទាប់ពីអគ្គលេខាធិការអង្គការសហប្រជាជាតិ (UN) លោក អង់តូនីញ៉ូ ហ្គុយតឺរ៉េស (António Guterres) កាលពីថ្ងៃសុក្រ និយាយថា លោកគាំទ្រយ៉ាងពេញទំហឹង ចំពោះកិច្ចខិតខំប្រឹងប្រែង ក្នុងការលុបបំបាត់នុយក្លេអ៊ែរទាំងស្រុងរបស់កូរ៉េខាងជើង ក្នុងអំឡុងជួបជាមួយប្រធានាធិបតីកូរ៉េខាងត្បូងលោក យូន ស៊ុកយ៉ល (Yoon Suk-yeol)។
លោក Kim Son Gyong អនុរដ្ឋមន្ត្រីទទួលបន្ទុកកិច្ចការអន្តរជាតិ នៃក្រសួងការបរទេសកូរ៉េខាងជើង និយាយក្នុងសេចក្ដីថ្លែងការណ៍នោះថា៖ «ខ្ញុំពិតជាសោកស្ដាយយ៉ាងខ្លាំង ចំពោះការលើកឡើងរបស់អគ្គលេខាធិការ UN ដែលមានភាពលម្អៀង និងខ្វះភាពយុត្តិធម៌ទាំងស្រុង ហើយប្រឆាំងនឹងកាតព្វកិច្ចរបស់លោក ដែលបានបញ្ជាក់នៅក្នុងធម្មនុញ្ញ UN ទាក់ទងនឹងបញ្ហាឧបទ្វីបកូរ៉េ»។
លោក Kim បានបន្ថែមថា អគ្គលេខាធិការ UN មិនគួរស្នើសុំ ឬទទួលបញ្ជាពីរដ្ឋាភិបាលនៃប្រទេសជាក់លាក់ណាមួយឡើយ ប៉ុន្តែត្រូវចៀសវាងទង្វើណាមួយ ដែលអាចធ្វើឱ្យខូចមុខតំណែងជាមន្ត្រីអន្តរជាតិ ដែលទទួលខុសត្រូវ ចំពោះ UN តែប៉ុណ្ណោះ។
លោក Kim ថា ការរំសាយអាវុធនុយក្លេអ៊ែរទាំងស្រុង គឺជា «ការរំលោភលើអធិបតេយ្យភាពរបស់កូរ៉េខាងជើង» ដោយវាទាមទារឱ្យមានការរំសាយអាវុធឯកតោភាគី។ លោកបន្តថា អគ្គលេខាធិការ លោកហ្គុយតឺរ៉េស ប្រហែលជាដឹងយ៉ាងច្បាស់ថា កូរ៉េខាងជើងច្រានចោលទាំងស្រុង ដោយគ្មានការលើកលែង ហើយលោកគួរតែប្រុងប្រយ័ត្ន ពេលនិយាយពាក្យដ៏គ្រោះថ្នាក់នេះ នៅឧបទ្វីបកូរ៉េ។
យ៉ាងណាមិញ លោក ហ្គុយតឺរ៉េស និយាយនៅកូរ៉េខាងត្បូង កាលពីថ្ងៃសុក្រថា គោលបំណងនៃការរំសាយអាវុធនុយក្លេអ៊ែរនោះ ដោយសារវា «មានសារៈសំខាន់ជាមូលដ្ឋាន សម្រាប់យើង ក្នុងការសម្រេចបាននូវសន្តិសុខ សន្តិភាព និងស្ថិរភាព ក្នុងតំបន់»។
កូរ៉េខាងជើង បានបាញ់សាកល្បងមីស៊ីលជាច្រើនគ្រាប់ នៅឆ្នាំនេះ ហើយមន្ត្រីនៅទីក្រុងសេអ៊ូល និងវ៉ាស៊ីនតោន និយាយថា ប្រទេសនេះហាក់ដូចជាកំពុងរៀបចំសាកល្បងអាវុធនុយក្លេអ៊ែរជាលើកដំបូង ចាប់តាំងពីឆ្នាំ ២០១៧ ចំពេលមានការជាប់គាំងកិច្ចពិភាក្សា ស្តីពីការលុបបំបាត់អាវុធនុយក្លេអ៊ែរ៕
ហួន ឌីណា
វីដេអូ៖
