ប្រទេសបារាំង ដែលដឹកនាំដោយប្រធានាធិបតី លោក Emmanuel Macron កាលពីថ្ងៃសៅរ៍ បានចុះហត្ថលេខាលើពិធីសារស្តីពីការចូលជាសមាជិករបស់អង្គការណាតូ សម្រាប់ប្រទេសហ្វាំងឡង់ និងស៊ុយអែត ដែលមានព្រំដែនជាប់ប្រទេសរុស្ស៊ី។ នេះបើយោងតាមទីភ្នាក់ងារព័ត៌មាន AFP។
AFP បានរាយការណ៍ ដោយយោងតាមវិមាន Elysee របស់ប្រធានាធិបតីបារាំងថា៖ «ជម្រើសអធិបតេយ្យភាព ដោយប្រទេសហ្វាំងឡង់ និងស៊ុយអែតនេះ នឹងពង្រឹងសន្តិសុខរបស់ពួកគេ ក្នុងការប្រឈមនឹងការគំរាមកំហែង ដែលមានស្រាប់នៅក្នុងតំបន់ភ្លាមៗ ហើយនឹងរួមចំណែកយ៉ាងសំខាន់ដល់ជំហររួម និងសន្តិសុខអឺរ៉ុបរបស់យើង»។
កាលពីថ្ងៃទី ៣ ខែសីហា សភាជាន់ទាបបារាំង បានផ្តល់សច្ចាប័នលើពិធីសារស្តីពីការចូលជាសមាជិករបស់ហ្វាំងឡង់ និងស៊ុយអែត ទៅកាន់អង្គការណាតូ។ ការសុំចូលជាសមាជិកនេះ ត្រូវតែទទួលបានការផ្តល់សច្ចាប័នដោយសមាជិកទាំងអស់នៃប្លុកនេះ។ រហូតមកដល់ពេលនេះ មានប្រទេសជាង ២០ ក្នុងចំណោមប្រទេសទាំង ៣០ ដែលបង្កើតជាសម្ព័ន្ធភាពយោធានេះ បានសម្រេចអនុម័តរួចហើយ។
នៅថ្ងៃទី ១៨ ខែឧសភា ហ្វាំងឡង់ និងស៊ុយអែត បានដាក់ពាក្យចូលជាសមាជិករបស់ណាតូ ប៉ុន្តែតួកគី រាំងស្ទះការចូលជាសមាជិកនេះភ្លាមៗ ដោយទាមទារឱ្យប្រទេសណ័រឌិកទាំង ២ ប្រកាសថា អង្គការឃើដជាភេរវករ ធ្វើបត្យាប័នអ្នកដែលត្រូវបានចោទប្រកាន់ពីបទភេរវកម្ម ឬចូលរួមក្នុងការប៉ុនប៉ងធ្វើរដ្ឋប្រហារ កាលពីឆ្នាំ ២០១៦ ទៅក្រុងអង់ការ៉ា ព្រមទាំងលុបចោលការហាមឃាត់នូវការផ្គត់ផ្គង់អាវុធដល់តួកគី។
ទីភ្នាក់ងារព័ត៌មានរុស្ស៊ី TASS បានអះអាងថា ជាង ១ ខែក្រោយមក រដ្ឋមន្ត្រីការបរទេសតួកគី ស៊ុយអែត និងហ្វាំងឡង់ បានចុះហត្ថលេខាលើអនុស្សរណៈ ដែលលុបបំបាត់ឧបសគ្គចំពោះការចូលជាសមាជិកនេះ។
ប្រទេសសមាជិកអង្គការណាតូចាស់ចំនួន ៧ ដែលមិនទាន់ផ្តល់សច្ចាប័ន រួមមានព័រទុយហ្គាល់ អេស្ប៉ាញ សា.ឆែក ស្លូវ៉ាគី ហុងគ្រី ក្រិក និងតួកគី ចំណែកអាមេរិកក្លាយជាប្រទេសទី២៣ ដែលអនុម័តលើការផ្តល់សច្ចាប័ននេះ។ នេះបើតាម Atlantic Council៕