.jpg)
លោក ពូទីន ថ្លែងក្នុងជំនួបមួយកាលពីថ្ងៃទី ១៥ សីហា។ AFP
ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃចន្ទថា ទីក្រុងម៉ូស្គូឱ្យតម្លៃលើទំនាក់ទំនងរបស់ខ្លួនជាមួយបណ្តាប្រទេសនៅអាមេរិកឡាទីន អាស៊ី និងអាហ្រ្វិក ហើយថា រុស្ស៊ីត្រៀមខ្លួនជាស្រេច ក្នុងការលក់អាវុធទំនើប «ដែលល្អអស្ចារ្យជាងរបស់គូប្រជែងបរទេស» ដល់សម្ព័ន្ធមិត្តរបស់ខ្លួន។
លោក ពូទីន និយាយក្នុងពិធីបើកវេទិកា«កងទ័ព-២០២២» នៅជិតទីក្រុងម៉ូស្គូថា៖ «[យើង] បានត្រៀមខ្លួនរួចជាស្រេចក្នុងការផ្តល់ជូនសម្ព័ន្ធមិត្តរបស់យើងនូវប្រភេទអាវុធទំនើបបំផុត ចាប់ពីអាវុធធុនតូច រហូតដល់រថពាសដែក និងកាំភ្លើងធំ ដើម្បីប្រយុទ្ធប្រឆាំងនឹងការវាយប្រហារតាមអាកាស ក៏ដូចជា ដ្រូន»។
ការថ្លែងបែបរបស់លោក ពូទីន ធ្វើឡើង ខណៈដែលរុស្ស៊ីរងការវាយបកវិញ ក្នុងការប្រយុទ្ធរបស់ខ្លួននៅតំបន់ដុនបាសនៃប្រទេសអ៊ុយក្រែន ដែលទទួលបានជំនួយសព្វាវុធទំនើបៗពីលោកខាងលិច ដែលបិទការនាំចេញទៅរុស្ស៊ីនូវបច្ចេកវិទ្យាជាន់ខ្ពស់ បម្រើឱ្យផលិតកម្មលើវិស័យយោធារបស់ប្រទេសនេះ។
លោក ពូទីន បានបន្តថា សឹងតែទាំងអស់នៃអាវុធដែលនឹងផ្គត់ផ្គង់ឱ្យសម្ព័ន្ធមិត្តរុស្ស៊ី «ត្រូវបានប្រើលើស ពីម្តងក្នុងប្រតិបត្តិការប្រយុទ្ធជាក់ស្ដែងផ្សេងៗ»។ លោកថា៖ «យើងនិយាយអំពីអាវុធ និងគ្រឿងយន្ត ដែលមានភាពច្បាស់លាស់ខ្ពស់និងអំពីប្រព័ន្ធប្រយុទ្ធ ដោយផ្អែកលើគោលការណ៍រូបវន្តថ្មី។ អាវុធទាំងនោះភាគច្រើនដើរមុនរបស់ពួកដៃគូប្រជែងបរទេសរាប់ឆ្នាំ ខ្លះរហូតដល់ទសវត្សរ៍ ហើយបើនិយាយពីលក្ខណៈមធ្យោបាយ និងបច្ចេកទេស គឺទំនើបអស្ចារ្យជាងមុន»។
យ៉ាងណាមិញ អ្នកវិភាគយោធាលោកខាងលិច បាននិយាយថា ប្រតិបត្តិការខ្សោយរបស់កងទ័ពរុស្ស៊ីនិងសព្វាវុធ អាចធ្វើឱ្យការនាំចេញអាវុធរបស់ប្រទេសនេះ មិនសូវទាក់ទាញដល់អ្នកទិញ ដែលមានសក្តានុពល ដូចជាឥណ្ឌា ដែលពឹងផ្អែកខ្លាំងលើបច្ចេកវិទ្យាចាស់ៗរបស់រុស្ស៊ី។
នៅពេលនេះ អ៊ុយក្រែនប្រើប្រាស់សព្វាវុធដែលផ្គត់ផ្គង់ដោយសហរដ្ឋអាមេរិក ប្រកបដោយប្រសិទ្ធភាព ជាពិសេសប្រព័ន្ធបាញ់រ៉ុក្កែតកាំភ្លើងធំជាន់ខ្ពស់ (HIMARS) ដែលធ្វើឱ្យការវាយលុករបស់រុស្ស៊ី ត្រូវរុលបកក្រោយ ខណៈខាតបង់កងកម្លាំង និងសព្វាវុធយ៉ាងមហាសាល។ យ៉ាងណាក៏ដោយ លោក ពូទីន និយាយថា កងកម្លាំងរុស្ស៊ី និងពួកប្រូកស៊ីរបស់ខ្លួនក្នុងតំបន់ដុនបាស កំពុងប្រព្រឹត្តទៅតាមដំណើរការរបស់ខ្លួន។
ការលើកឡើងចុងក្រោយរបស់លោក ពូទីន ធ្វើឡើងក្នុងវោហារមួយ ដែលត្រូវបានគេនិយាយថា ស្របគ្នាទៅនឹងអ្វីដែលរុស្ស៊ីធ្លាប់និយាយក្រោយការឈ្លានពានអ៊ុយក្រែនថា រុស្ស៊ីមានសក្តានុពលក្នុងការសហការជាមួយសម្ព័ន្ធមិត្តដូចជាចិន ឥណ្ឌា អ៊ីរ៉ង់ និងប្រទេសដទៃទៀត ដើម្បីកសាងអន្តរជាតិថ្មីមួយ ដោយគ្មានការក្អេងក្អាងរបស់សហរដ្ឋអាមេរិក។
បន្ទាប់ពីសហរដ្ឋអាមេរិក រុស្ស៊ីជាប់ចំណាត់ថ្នាក់លេខ២លើការផ្គត់ផ្គត់ទីផ្សារអាវុធជិត ១/៥ របស់ពិភពលោក ដែលរកចំណូលពីវិស័យនេះរហូតដល់ ១៥ ប៊ីលានដុល្លារ ក្នុង ១ ឆ្នាំ។ យោងតាមវិទ្យាស្ថានស្រាវជ្រាវសន្តិភាពអន្តរជាតិStockholm ចន្លោះពីឆ្នាំ ២០១៧-២០២១ ប្រទេសនេះលក់អាវុធប្រហែល ៧៣ ភាគរយទៅឱ្យប្រទេសចំនួន ៤ គឺឥណ្ឌា ចិន អេហ្ស៊ីប និងអាល់ហ្ស៊េរី៕
ហួន ឌីណា
វីដេអូ៖
