.jpg)
ប្រធានាធិបតីរុស្ស៊ី លោក វ្ល៉ាឌីមៀរ ពូទីន (ឆ្វេង) ចាប់ដៃជាមួយនាយករដ្ឋមន្ត្រីឥណ្ឌា លោក Narendra Modi កាលពីខែធ្នូ ឆ្នាំ ២០២១។ រូបថត AFP
មេដឹកនាំរុស្ស៊ីដែលត្រូវការមិត្តបរទេសជាចាំបាច់ ក្នុងបរិបទដែលខ្លួន កំពុងប្រឈមនឹងការដាក់ទណ្ឌកម្មដ៏ធ្ងន់ធ្ងរពីប្រទេសលោកខាងលិច ដឹកនាំដោយសហរដ្ឋអាមេរិក ដោយសារតែការលុកលុយរបស់ខ្លួនលើអ៊ុយក្រែន បានអបអរសាទរសមភាគីឥណ្ឌារបស់លោក គឺលោកស្រីប្រធានាធិបតី Draupadi Murma និងនាយករដ្ឋមន្ត្រី Narendra Modi អំឡុងការប្រារព្ធខួបលើកទី៧៥ ឆ្នាំ នៃទិវាឯករាជ្យជាតិឥណ្ឌា។
តាមការចេញផ្សាយរបស់ទីភ្នាក់ងារព័ត៌មានរុស្ស៊ី TASS ប្រធានាធិបតីរុស្ស៊ី លោក វ្ល៉ាឌីមៀរ ពូទីន អបអរសាទរសមភាគីឥណ្ឌារបស់លោក លោកស្រី Draupadi Murma និងលោក Narendra Modi ក្នុងខួបលើកទី៧៥ នៃការទទួលបានឯករាជ្យរបស់ជាតិ។
វិមានក្រឹមឡាំង បានបង្ហោះសារនៅលើគេហទំព័ររបស់ខ្លួន ដោយរៀបរាប់ថា៖ «រយៈពេលជាច្រើនទសវត្សរ៍ ចាប់តាំងពីប្រទេសរបស់អ្នកទទួលបានឯករាជ្យ វាសម្រេចបាននូវការទទួលស្គាល់យ៉ាងទូលំទូលាយនូវវឌ្ឍនភាព ក្នុងវិស័យជាច្រើន រួមទាំងសេដ្ឋកិច្ច សង្គមកិច្ច វិទ្យាសាស្ត្រ និងបច្ចេកវិទ្យា។ ប្រទេសឥណ្ឌា ឈរលើភាពត្រឹមត្រូវ រីករាយគួរជាទីកត់សម្គាល់លើឆាកអន្តរជាតិ ដើរតួនាទីជាអ្នកស្ថាបនា ក្នុងការ-ដោះស្រាយបញ្ហាបន្ទាន់ ក្នុងរបៀបវារៈអន្តរជាតិ»។
លោក ពូទីន បន្តថា៖ «ទំនាក់ទំនងរុស្ស៊ី-ឥណ្ឌា កំពុងអភិវឌ្ឍក្នុងស្មារតីជាដៃគូយុទ្ធសាស្ត្រដ៏មានកិត្តិយស។ ទីក្រុងម៉ូស្គូ និងញូវដេលី កំពុងសហការដោយជោគជ័យលើវិស័យផ្សេងៗ និងធ្វើអន្តរកម្មដោយប្រសិទ្ធភាពជាផ្នែកនៃ UN (អង្គការសហប្រជាជាតិ), BRICS (ប្លុកប្រទេសសេដ្ឋកិច្ចលូតលាស់), SCO (អង្គការសហប្រតិបត្តិការសៀងហៃ) និងរចនាសម្ព័ន្ធពហុភាគីដទៃទៀត។ ខ្ញុំប្រាកដថា ការរួមគ្នារបស់យើង កិច្ចប្រឹងប្រែង នឹងធានាបាននូវការអភិវឌ្ឍ បន្តនៃសំណុំទាំងមូលនៃទំនាក់ទំនងរុស្ស៊ី-ឥណ្ឌា ប្រកបដោយផ្លែផ្កា ដែលជាប្រយោជន៍នៃប្រទេសយើងទាំង ២ និងការពង្រឹងសន្តិសុខ និងស្ថិរភាព ក្នុងតំបន់ និងសកលលោក»។
ក្រោយឯករាជ្យ នាយករដ្ឋមន្ត្រីទី១ លោក Jawaharlal Nehru លើកទង់ជាតិ ៣ ពណ៌ នៅបន្ទាយក្រហម ដែលក្លាយជានិមិត្តរូបនៃការដកអាណានិគមរបស់អង់គ្លេស កាលពីថ្ងៃទី ១៥ ខែ សីហា ឆ្នាំ ១៩៤៧។
ឥណ្ឌាជាប្រទេស ១ ដែលមិនត្រឹមតែមិនដាក់ទណ្ឌកម្មរុស្ស៊ីប៉ុណ្ណោះទេ តែថែមទាំងទិញឥន្ធនៈ និងផលិតផលជាច្រើនពីរុស្ស៊ីទៀតផង៕
