.jpg)
លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គុយតឺរេស។ AFP
ស្ថានទូតរុស្ស៊ីប្រចាំទីក្រុងវ៉ាស៊ីនតោន បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយនៅលើ Telegram កាលពីថ្ងៃចន្ទ ដោយចោទប្រកាន់សហរដ្ឋអាមេរិកដែលនៅតែបន្តធ្វើសកម្មភាពដោយមិនគិតពីសន្តិសុខនិងផលប្រយោជន៍របស់ប្រទេសដទៃដែលនាំឱ្យមានការកើនឡើងនៃហានិភ័យនុយក្លេអ៊ែរ។
ប្រទេសរុស្ស៊ី ប្រឈមមុខនឹងប្រទេសអាមេរិកកាន់តែខ្លាំងឡើងជាអន្តរជាតិ នៅពេលដែលខ្លួនបានលើកទ័ពចូលលុកលុយប្រទេសអ៊ុយក្រែន ដោយយកលេសពីការប៉ុនប៉ងចូលអង្គការសន្ធិ សញ្ញាអាត្លង់ទិកខាងជើង (NATO) ខណៈប្រទេសអាមេរិកជួយជ្រុមជ្រែងសព្វាវុធនានាដល់អ៊ុយក្រែន។
តាមការចេញផ្សាយរបស់ទីភ្នាក់ងារព័ត៌មានរុស្ស៊ី TASS អ្នកការទូតរុស្ស៊ីបានព្រមានថា៖ «ថ្ងៃនេះ សហរដ្ឋអាមេរិកនៅតែបន្តធ្វើសកម្មភាពដោយមិនគិតពីសន្តិសុខ និងផលប្រយោជន៍របស់ប្រទេសដទៃ ដែលរួមចំណែកដល់ការកើនឡើងនៃហានិភ័យនុយក្លេអ៊ែរ។ ជំហានរបស់សហរដ្ឋអាមេរិកដើម្បីចូលពាក់ព័ន្ធបន្ថែមទៀតនៅក្នុងការប្រឈមមុខដាក់គ្នាបែបកូនកាត់ (hybrid) ជាមួយរុស្ស៊ីក្នុងបរិបទនៃវិបត្តិអ៊ុយក្រែននាំមកជាមួយការកើនឡើងដែលមិនអាចទាយទុកជាមុនបាន និងការប៉ះទង្គិចយោធាដោយផ្ទាល់នៃមហាអំណាចនុយក្លេអ៊ែរ»។
ស្ថានទូតរុស្ស៊ីប្រចាំប្រទេសអាមេរិកបានអះអាងថា ការដកខ្លួនជាឯកតោភាគីរបស់ភាគីសហរដ្ឋអាមេរិកចេញពីសន្ធិសញ្ញាមិនរីកសាយភាយអាវុធនុយក្លេអ៊ែរជាអន្តរជាតិ (INF) និងប្រកាសដកខ្លួនពីសន្ធិសញ្ញាផ្សេងៗទៀត បានធ្វើឱ្យស្ថានភាពនេះប្រឈមមុខកាន់តែខ្លាំង។
TASS ដែលបានដកស្រង់ខ្លឹមសាររបស់សេចក្តីថ្លែងការណ៍ទូតរុស្ស៊ីដូចដែលបានអះអាងថា៖ «ប្រទេសរបស់យើងបំពេញកាតព្វកិច្ចរបស់ខ្លួនដោយស្មោះត្រង់ក្នុងឋានៈជារដ្ឋអាវុធនុយក្លេអ៊ែរ និងខិតខំប្រឹងប្រែងគ្រប់បែបយ៉ាងដើម្បីកាត់បន្ថយហានិភ័យនុយក្លេអ៊ែរ»។
ប្រមុខអង្គការសហប្រជាជាតិលោក អង់តូនីញ៉ូ ហ្គុយតឺរេស បានថ្លែងពីក្តីព្រួយបារម្ភពីជម្លោះនុយក្លេអ៊ែររវាងប្រទេសមហាអំណាចក្នុងពេលដែលលោកចូលរួមរំឭកខួប ៧៧ ឆ្នាំនៃការទម្លាក់គ្រាប់បែកបរមាណូនៅប្រទេសជប៉ុន កាលពីថ្ងៃទី ៦ ខែសីហា៕
វីដេអូ៖
