.jpg)
លោករដ្ឋមន្ត្រីការបរទេសអ៊ីរ៉ង់ Hossein Amir Abdollahian (ស្តាំ) ជួបពិភាក្សាជាមួយឯកអគ្គរដ្ឋទូតកូវ៉ែតប្រចាំអ៊ីរ៉ង់ លោក Bader Abdullah Al-Munaikh។ AFP
ក្រសួងការបរទេសអ៊ីរ៉ង់បាននិយាយថា កិច្ចចរចាទីក្រុងវីយែនកាលពីដើមខែនេះ ដើម្បីស្តារកិច្ចព្រមព្រៀងនុយក្លេអ៊ែរឆ្នាំ ២០១៥ របស់ខ្លួន ទទួលបានលទ្ធផលវិជ្ជមាន ប៉ុន្តែមិនបានបំពេញតាមអ្វីដែលទីក្រុងតេអេរ៉ង់ចង់បាននោះទេ។
អ្នកនាំពាក្យក្រសួងការបរទេស លោក Nasser Kanani បានថ្លែងប្រាប់អ្នកសារព័ត៌មានកាលពីថ្ងៃចន្ទថា៖ «ការរីកចម្រើនគួរឱ្យចាប់អារម្មណ៍ត្រូវបានធ្វើឡើងក្នុងអំឡុងកិច្ចចរចា ៣-៤ ថ្ងៃ ដែលសម្របសម្រួលដោយសហភាពអឺរ៉ុប (EU) នៅក្នុងរដ្ឋធានីវីយែន»។
លោកបានលើកឡើងថា៖ «ការរីកចម្រើននេះ មិនទាន់បានបំំពេញតាមទាមទារតាមផ្លូវច្បាប់របស់ទីក្រុងតេអេរ៉ង់ឱ្យបានពេញលេញនោះទេ ហើយយើងមានក្តីរំពឹងផ្សេងទៀតចេញពីភាគីដទៃទៀតដែលយើងចាំបាច់គេត្រូវគេផ្តល់ឱ្យ»។
លោក Kanan បានបន្តទៀតថា កិច្ចព្រមព្រៀងមួយ នឹងអាចត្រូវសម្រេចបាននៅពេលអនាគតឱ្យតែភាគីដទៃទៀតជាពិសេសអាមេរិកពិចារណាលើខ្សែបន្ទាត់ក្រហមរបស់អ៊ីរ៉ង់ហើយធានាថា ប្រទេសនេះ ទទួលបានផលប្រយោជន៍ដូចដែលខ្លួនបានកិច្ចសន្យា នៅក្រោមផែនការសកម្មភាពទូលំទូលាយរួម (JCPOA) ខណៈកិច្ចព្រមព្រៀងនេះ ត្រូវបានគេទទួលស្គាល់ជាផ្លូវការនោះ។
អ្នកនាំពាក្យរូបនេះ បានបន្ថែមទៀតថា កិច្ចពិភាក្សាផ្ទៃក្នុង កំពុងបន្តធ្វើនៅទីក្រុងតេអេរ៉ង់ក្នុងកម្រិតខ្ពស់បំផុត ហើយការទំនាក់ទំនងត្រូវបន្តជាមួយនឹងប្លុកអឺរ៉ុប។
ក្រោយពីកិច្ចចរចាជុំថ្មីបំផុតដែលត្រូវបានបញ្ចប់កាលពីថ្ងៃទី ៨ ខែសីហា EU ផ្សព្វផ្សាយនូវអ្វីដែលខ្លួនបានហៅថា ជាលក្ខខណ្ឌចុងក្រោយ និងបានស្នើដល់ភាគីទាំងអស់ ធ្វើការសម្រេចចិត្តផ្នែកនយោបាយដ៏ចាំបាច់ ដើម្បីបញ្ចប់កិច្ចព្រមព្រៀងមួយ។
ទីក្រុងវ៉ាស៊ីនតោន បានយល់ស្របតាមលក្ខខណ្ឌនោះ ប៉ុន្តែទីក្រុងតេអេរ៉ង់ បានបង្ហាញថា ខ្លួនមានការពិចារណាផ្សេងទៀត។
រដ្ឋមន្ត្រីការបរទេសអ៊ីរ៉ង់បានថ្លែងប្រាប់អ្នកកាសែតកាលពីថ្ងៃចន្ទថា នឹងនាំយកគំនិតចុងក្រោយរបស់ខ្លួនទៅលើលក្ខខណ្ឌរបស់អឺរ៉ុបទៅដល់ប្លុកនេះត្រឹមថ្ងៃនេះ (ថ្ងៃចន្ទ)។
លោក Hossein Amirabdollahian បានបញ្ជាក់ថា៖ «យើងមានកិច្ចព្រមព្រៀងល្អ រឹងមាំ និងប្រកបដោយនិរន្តភាព ប៉ុន្តែប្រសិនបើភាគីផ្សេងនិយាយដល់ផែនការ B យើងក៏មានផែនការ B ដែរ ដោយបានបន្ថែមថា អ៊ីរ៉ង់កំពុងរង់ចាំភាពបត់បែនរបស់អាមេរិកទៅលើការចេញការធានាទទួលខុសត្រូវនានា»។
លោក Hossein Amirabdollahian ត្រូវបានដកស្រង់សម្តីដោយទីភ្នាក់ងារព័ត៌មាន IRNA ថា ភាគីអាមេរិកបានទទួលយកការទាមទារ ២ ចំណុចពីអ៊ីរ៉ង់ ដោយមិនបានបញ្ជាក់ថាតើការទាមទារទាំងនោះ ជាអ្វីនោះទេ។
ចំណុចសំខាន់នៅពេលនេះ ទំនងជាការស៊ើបអង្កេតទៅលើកម្មវិធីនុយក្លេអ៊ែររបស់អ៊ីរ៉ង់ដោយទីភ្នាក់ងារថាមពលអាតូមិកអន្តរជាតិ (IAEA) ដែលទីក្រុងតេអេរ៉ង់ចង់បិទរហូត មុននឹង JCPOA ត្រូវបានគេស្តារឡើងវិញ៕
វីដេអូ៖
