.jpg)
ប្រធានាធិបតីអាមេរិក លោក ចូ បៃដិន ក្នុងពិធីចុះហត្ថលេខា កាលពីម្សិលមិញ។ រូបថត AFP
លោកប្រធានាធិបតី ចូ បៃដិន ចុះហត្ថលេខាលើច្បាប់ស្តីពីការថែទាំសុខភាព ពន្ធ និងអាកាសធាតុ កាលពីថ្ងៃអង្គារ នៅសេតវិមាន ដែលនេះជាជ័យជម្នះដ៏សំខាន់ ១ សម្រាប់រដ្ឋបាលរបស់លោក និងគណបក្សប្រជាធិបតេយ្យ ដែលត្រៀមខ្លួន សម្រាប់ការបោះឆ្នោតពាក់កណ្ដាលអាណត្តិ នាខែវិច្ឆិកាខាងមុខ។
លោក បៃដិន និយាយក្នុងពិធីចុះហត្ថលេខាថា៖ «ក្នុងពេលវេលាជាប្រវត្តិសាស្ត្រនេះ គណបក្សប្រជាធិបតេយ្យ បានឈរខាងប្រជាជនអាមេរិក ខណៈរាល់សមាជិកនៃបក្សសាធារណរដ្ឋក្នុងសភា បានបោះឆ្នោតប្រឆាំងនឹងច្បាប់នេះ»។
ហត្ថលេខារបស់លោក បៃដិន សម្រេចបាននូវរបៀបវារៈច្បាប់សំខាន់ៗមួយចំនួនរបស់លោក លើការវិនិយោគក្នុងការប្រយុទ្ធប្រឆាំងបម្រែបម្រួលអាកាសធាតុ និងធ្វើឱ្យមានការផ្លាស់ប្តូរសំខាន់ៗ ចំពោះគោលនយោបាយ ក្នុងវិស័យសុខាភិបាល ដូចជាបញ្ចុះតម្លៃថ្នាំជាដើម។ ច្បាប់នេះនឹងកាត់បន្ថយឱនភាព ដោយយកពន្ធអប្បបរមា ១៥% លើសាជីវកម្មធំៗ និងពន្ធ ១% លើការទិញភាគហ៊ុនមកវិញ។
ច្បាប់ដដែលនឹងរៃប្រាក់ជាង $៧០០ ប៊ីលាន ក្នុងប្រាក់ចំណូលរបស់រដ្ឋាភិបាលរយៈពេល ១០ ឆ្នាំ ហើយចំណាយជាង $៤៣០ ប៊ីលាន ដើម្បីកាត់បន្ថយការបំភាយកាបូន និងពង្រីកការឧបត្ថម្ភធន សម្រាប់ការធានារ៉ាប់រងសុខាភិបាល ក្រោមច្បាប់ថែទាំ ដែលមានតម្លៃសមរម្យ ហើយប្រើប្រាស់ប្រាក់ចំណូលថ្មី ដែលនៅសល់ ដើម្បីកាត់បន្ថយឱនភាព។
អ្នកប្រជាធិបតេយ្យនិយាយថា ច្បាប់នឹងជួយប្រយុទ្ធប្រឆាំងអតិផរណា ដោយកាត់បន្ថយឱនភាពតាមសហព័ន្ធ។ ភ្នាក់ងារវាយតម្លៃ និងអ្នកសេដ្ឋកិច្ចឯករាជ្យយល់ស្របនឹងការលើកឡើងនេះ តែថា លទ្ធផលត្រូវប្រើពេលច្រើនឆ្នាំ។ ចំណែកបក្សសាធារណរដ្ឋវិញ រិះគន់ច្បាប់នេះថា នឹងមានផលប៉ះពាល់ផ្ទុយពីអ្នកប្រជាធិបតេយ្យលើកឡើង៕
ហួន ឌីណា
