.jpg)
លោក Cavusoglu (ស្តាំ) និងលោក Lapid ចាប់ដៃគ្នាក្នុងសន្និសីទសារព័ត៌មាន កាលពីថ្ងៃទី ២៣ ខែមិថុនា ក្នុងក្រុងអង់ការ៉ា។ AFP
ប្រទេសអ៊ីស្រាអែល និងតួកគី បានប្រកាសពីការបន្តចំណងទាក់ទងការទូតពេញលេញឡើងវិញ ក្រោយពីទំនាក់ទំនាក់ រវាងប្រទេសសមុទ្រមេឌីទែរ៉ាណេទាំង ២ នេះ បានជាប់គាំងអស់រយៈពេលជាច្រើនឆ្នាំ។
ការប្រកាស កាលពីថ្ងៃពុធ បានកើតឡើងបន្ទាប់ពីកិច្ចសន្ទនារវាងនាយករដ្ឋមន្ត្រីអ៊ីស្រាអែល Yair Lapid និងប្រធានាធិបតីតួកគី រ៉េសិប តៃយីប អេរដូហ្គែន (Recep Tayyip Erdogan)។ ការសន្ទនានេះ បានកើតឡើងរយៈពេល ៤ ឆ្នាំ ក្រោយពីប្រទេសទាំង ២ បានបណ្តេញឯកអគ្គរដ្ឋទូតចេញជុំវិញការសម្លាប់ពលរដ្ឋប៉ាឡេស្ទីន ៦០ នាក់ ដោយកងកម្លាំងអ៊ីស្រាអែលក្នុងអំឡុងការតវ៉ានៅព្រំដែនហ្គាហ្សាប្រឆាំងនឹងការបើកស្ថានទូតអាមេរិកនៅក្នុងទីក្រុង ហ្ស៊េរុយសាឡិម។
សេចក្តីថ្លែងការណ៍ ១ ចេញពីការិយាល័យលោក Lapid បានឱ្យដឹងថា៖ «ការិយាល័យ បានសម្រេចចិត្តជាថ្មី ក្នុងការធ្វើឱ្យល្អប្រសើរឡើងនូវទំនាក់ទំនង រវាងប្រទេសទាំង ២ ដើម្បីចំណងទាក់ទងការទូតពេញលេញ និងឱ្យឯកអគ្គរដ្ឋទូត និងអគ្គកុងស៊ុលវិលត្រឡប់ទៅវិញ»។
ការិយាល័យនោះ បានបន្ថែមទៀតថា៖ «ការធ្វើឱ្យទំនាក់ទំនងល្អប្រសើរឡើងវិញ នឹងចូលរួមចំណែកដល់ការធ្វើឱ្យចំណងទំនាក់ទំនងកាន់តែស៊ីជម្រៅ រវាងប្រជាជនទាំង ២ ដោយការពង្រីកទំនាក់ទំនងសេដ្ឋកិច្ច ពាណិជ្ជកម្ម និងវប្បធម៌ និងពង្រឹងស្ថិរភាពក្នុងតំបន់»។
លោករដ្ឋមន្ត្រីការបរទេសតួកគី Mevlut Cavusoglu ថ្លែងប្រាប់អ្នកសារព័ត៌មានក្នុងទីក្រុងអង់ការ៉ាថា ការតែងតាំងឯកអគ្គរដ្ឋទូត គឺជាជំហាន ១ ក្នុងចំណោមជំហានជាច្រើន ដើម្បីធ្វើឱ្យទំនាក់ទំនងប្រក្រតីឡើងវិញ»។ ជំហានវិជ្ជមានបែបនេះ បានកើតចេញពីអ៊ីស្រាអែល និងកិច្ចខិតខំប្រឹងប្រែង ហើយក្នុងនាមប្រទេសតួកគី យើងក៏បានសម្រេចចិត្តតែងតាំងឯកអគ្គរដ្ឋទូត ១ រូបទៅកាន់អ៊ីស្រាអែល គឺប្រចាំនៅទីក្រុងតែលអាវីវ»។
លោក Cavusoglu បានបន្ថែមទៀតថា វិធានការនេះ មិនមានន័យថា តួកគីនឹងបោះបង់ចោលបុព្វហេតុ នៅប៉ាឡេស្ទីនទេ។
លោករដ្ឋមន្រ្តីការបរទេសរូបនេះ បានបន្តថា៖ «យើងជានិច្ចកាល និយាយថា យើងនឹងបន្តការពារសិទ្ធិរបស់ប៉ាឡេស្ទីន នៅទីក្រុងហ្ស៊េរុយសាឡិម និងតំបន់ហ្គាហ្សា»។ វាពិតជាសំខាន់ណាស់ថា សាររបស់យើងត្រូវផ្ញើជូននៅកម្រិតការទូត ក្នុងទីក្រុងតែលអាវីវ»។
ទំនាក់ទំនង ដែលធ្លាក់ចុះ បានកើតឡើង ក្រោយពីមានភាពតានតឹងរយៈពេលជាង ១០ ឆ្នាំ។ ដំណើរទស្សនកិច្ច ១ ទៅកាន់តួកគីរបស់លោកប្រធានាធិបតីអ៊ីស្រាអែល កាលពីខែមីនា បានកើតឡើង បន្ទាប់ពីដំណើរទស្សនកិច្ចរបស់រដ្ឋមន្ត្រីការបរទេសនៃប្រទេសទាំង ២ ។
លោក Herzog បានប្រាប់កាលពីថ្ងៃពុធថា ការស្តារទំនាក់ទំនងពេញលេញ នឹងជួយជំរុញឱ្យមានទំនាក់ទំនងសេដ្ឋកិច្ចកាន់តែធំ ទេសចរ កាន់តែច្រើន និងចំណងមិត្តភាពកាន់តែស្អិតល្មួត រវាងប្រជាជនអ៊ីស្រាអែល និងតួកគី។
ទោះមានភាពខ្វែងគំនិតគ្នាផ្នែកការទូត កាលពីប៉ុន្មានឆ្នាំថ្មីៗនេះក្តី ក៏ការធ្វើពាណិជ្ជកម្ម នៅតែបន្ត ហើយតួកគីនៅតែជាគោលដៅពេញនិយម សម្រាប់ទេសចរអ៊ីស្រាអែលដែរ។
ទោះជាយ៉ាងណាក៏ដោយក៏អ៊ីស្រាអែល បានជំរុញឱ្យពលរដ្ឋរបស់ខ្លួនវិលត្រឡប់ទៅប្រទេសវិញ នៅក្នុងខែមិថុនា ដោយបានលើកឡើងពីផែនការធ្វើឃាតរបស់អ៊ីរ៉ង់ប្រឆាំងនឹងប្រជាជនខ្លួន នៅក្នុងទីក្រុងអ៊ីស្តង់ប៊ុល។
ចំណែកលោក Lapid បានអរគុណទីក្រុងអង់ការ៉ា ចំពោះកិច្ចសហការរបស់ខ្លួនលើបញ្ហានៃការស្តារទំនាក់ទំនងការទូតនេះ ឡើងវិញ៕
ហួន ឌីណា
