បើទោះបីភ្លើងសង្គ្រាម នៅអ៊ុយក្រែន ហាក់ឆេះកាន់តែខ្លាំងឡើងគ្មានស្រាកស្រាន្ត នៅរយៈពេលចុងក្រោយនេះ ប៉ុន្តែការផ្គត់ផ្គង់ឧស្ម័នរបស់រុស្ស៊ី ទៅកាន់អឺរ៉ុប តាមរយៈផ្លូវនាំចេញសំខាន់ៗឆ្លងកាត់អ៊ុយក្រែនមានកម្រិតខ្ពស់នៅឡើយ។ នេះបើតាមការទីភ្នាក់ងារព័ត៌មានរុស្ស៊ី ដែលបានដកស្រង់ទិន្នន័យពីក្រុមហ៊ុនចែកចាយឧស្ម័ន។
TASS បានរាយការណ៍ថា បរិមាណនៃការចែកចាយឧស្ម័ន នៅមានកម្រិតខ្ពស់ស្មើកម្រិត កាលពីមុន ប្រហែល ៤២,២ លានម៉ែត្រគុប ក្នុង ១ ថ្ងៃ ដែលបញ្ជូនឆ្លងកាត់អ៊ុយក្រែន និង ៣៤ លានម៉ែត្រគុប តាមបំពង់បង្ហូរឧស្ម័ន Nord Stream កាលពីថ្ងៃពុធ។
ការកំណត់សម្រាប់ការដឹកជញ្ជូនឧស្ម័នរុស្ស៊ីឆ្លងកាត់អ៊ុយក្រែន នៅថ្ងៃពុធនោះ តាមរយៈស្ថានីយចែកចាយឧស្ម័ន Sokhranovka មិនដំណើរការទេ ខណៈការកំណត់សម្រាប់ការដឹកជញ្ជូនតាមស្ថានីយ Sudzha មានប្រហែល ៤២,២ លានម៉ែត្រគុប។ នេះបើតាមទិន្នន័យ នៅលើគេហទំព័ររបស់ប្រតិបត្តិករប្រព័ន្ធបញ្ជូនឧស្ម័នរបស់អ៊ុយក្រែន (GTSOU)។
ទន្ទឹមនឹងនេះ ការចែកចាយឧស្ម័នរបស់រុស្ស៊ីតាម Nord Stream ដែលជាបំពង់បង្ហូរដ៏សំខាន់ សម្រាប់ការនាំចេញឧស្ម័នរុស្ស៊ីទៅកាន់អឺរ៉ុប នៅស្ថិតក្នុងកម្រិតនៃប៉ុន្មានថ្ងៃមុនប្រហែល ៣៤ លានម៉ែត្រគុប ក្នុង ១ ថ្ងៃ។ នេះបើយោងតាម Nord Stream AG។
បើតាមក្រុមហ៊ុន Gas Infrastructure Europe (GIE) ចំពេលការផ្គត់ផ្គង់ឧស្ម័នទាបពីរុស្ស៊ី បណ្តាប្រទេស នៅអឺរ៉ុប បន្តបូមឧស្ម័នចូលទៅក្នុងកន្លែងផ្ទុកឧស្ម័នក្រោមដី (UGSF) ជាមួយនឹងការស្តុកទុកឧស្ម័ន នៅអឺរ៉ុបលើសពី ៧៤ % នាពេលនេះ។
គណៈកម្មការអឺរ៉ុប (EC) ធ្លាប់ស្នើថា កម្រិតបម្រុងទុក ត្រូវបានណែនាំ សម្រាប់កន្លែងស្តុកឧស្ម័នរបស់អឺរ៉ុបយ៉ាងហោចណាស់ ៨០% សម្រាប់រដូវរងាឆ្នាំ ២០២២-២០២៣ និង ៩០ % សម្រាប់រដូវរងាខាងមុខ៕
វីដេអូ៖