ប្រធានាធិបតីបារាំងលោក ម៉ាក្រុង កាលពីថ្ងៃអាទិត្យ ទី ១១ ខែកញ្ញា បានស្នើសុំឱ្យលោកពូទីនដកអាវុធរបស់កងកម្លាំងរុស្ស៊ីចេញពីរោងចក្រនុយក្លេអ៊ែរហ្សាប៉ូរីចារបស់អ៊ុយក្រែន។ ចំណែកពីខាងវិមានក្រឹមឡាំងវិញ លោក ពូទីន បានព្រមានពីផលវិបាកដ៏មហន្តរាយ ដែលអាចកើតចេញពីការវាយប្រហាររបស់អ៊ុយក្រែនទៅលើស្ថានីយហ្សាប៉ូរីចា។
យោងតាមវិមានប្រធានាធិបតីបារាំង លោក អេម៉ានុយអែល ម៉ាក្រុង បានស្នើទៅកាន់មេដឹកនាំរុស្ស៊ីលោក ពូទីន តាមរយៈការជជែកគ្នាតាមទូរស័ព្ទ ដោយលោកនិយាយថា ការកាន់កាប់របស់រុស្ស៊ី នៅរោងចក្រនុយក្លេអ៊ែរហ្សាប៉ូរីចា គឺអាចនាំឱ្យមានហានិភ័យកើតឡើង។
ដោយឡែកក្នុងពេលសន្ទនាជាមួយគ្នា កាលពីថ្ងៃអាទិត្យនោះ លោក ពូទីន បែរជាបានលើកឡើងផ្ទុយពីមេដឹកនាំបារាំងលោក ម៉ាក្រុង ទៅវិញ។ បុរសខ្លាំងរុស្ស៊ីបានទាញឱ្យលោកម៉ាក្រុងងាកទៅយកចិត្តទុកដាក់ ចំពោះកងទ័ពអ៊ុយក្រែន ដែលលោកអះអាងថា ជាអ្នកបានបើកការវាយប្រហារការបាញ់ផ្លោងគ្រាប់ ទៅលើស្ថានីយហ្សាប៉ូរីចា រួមទាំងកន្លែងស្តុកទុកកាកសំណល់វិទ្យុសកកម្មជាទីដែលពោរពេញទៅដោយគ្រោះថ្នាក់ខ្លាំង។
បើតាមសេចក្តីថ្លែងការណ៍របស់វិមានក្រឹមឡាំងការជជែកគ្នាតាមទូរស័ព្ទ រវាងលោក ម៉ាក្រុង និងលោក ពូទីន ធ្វើឡើងតាមរយៈគំនិតផ្តួចផ្តើមរបស់លោកប្រមុខរដ្ឋបារាំងម៉ាក្រុង ហើយកិច្ចសន្ទនា រវាងមេដឹកនាំទាំង២ រួមមានតាំងពីការផ្លាស់ប្តូរទស្សនៈគ្នាយ៉ាងលម្អិត និងដោយស្មោះត្រង់អំពីស្ថានភាពនៅក្នុងប្រទេសអ៊ុយក្រែន។
បុរសខ្លាំងរុស្ស៊ីលោក ពូទីន បានគូសបញ្ជាក់ថា អ្នកឯកទេសរុស្ស៊ីនៅឯរោងចក្រមជ្ឈមណ្ឌលនុយក្លេអ៊ែរហ្សាប៉ូរីចា កំពុងចាត់វិធានការ ដើម្បីធានាសុវត្ថិភាពរបស់ខ្លួន ហើយបាននិយាយដែរថា ទីក្រុងម៉ូស្គូ បានត្រៀមខ្លួនរួចជាស្រេច ក្នុងការបន្តធ្វើការជាមួយទីភ្នាក់ងារថាមពលបរមាណូអន្តរជាតិ (AIEA) ដើម្បីដំណោះស្រាយបញ្ហានៅហ្សាប៉ូរីចានេះ។
ក្នុងអំឡុងពេលសន្ទនាជាមួយលោក ម៉ាក្រុង លោកពូទីនក៏បានចោទប្រកាន់កងទ័ពអ៊ុយក្រែនដែរថា បានប្រើប្រាស់អាវុធ ដែលផ្គត់ផ្គង់ដោយលោកខាងលិច ដើម្បីវាយប្រហារលើហេដ្ឋារចនាសម្ព័ន្ធស៊ីវិល នៅក្នុងតំបន់ដុនបាស់ភាគខាងកើតនៃប្រទេសអ៊ុយក្រែន៕