ការប្តូរពីឥន្ធនៈហ្វូស៊ីលទៅជាថាមពលកកើតឡើងវិញ អាចជួយពិភពលោកឱ្យសន្សំសំចៃថវិកាបានរហូតដល់ ១២ ទ្រីលានដុល្លារ ត្រឹមឆ្នាំ២០៥០ ខាងមុខ។ នេះបើតាមការសិក្សាមួយរបស់សាកលវិទ្យាល័យ Oxford នៃប្រទេសអង់គ្លេស។
របាយការណ៍ខាងលើ បង្ហាញថា វាខុសនិងទុទិដ្ឋិនិយម ក្នុងការអះអាងថា ការផ្លាស់ប្តូរយ៉ាងលឿនឆ្ពោះទៅរកប្រភពថាមពលស្អាតស្អំ គឺមានតម្លៃថ្លៃ។ តម្លៃឧស្ម័នបានកើនឡើង ដោយហេតុតែមានការព្រួយបារម្ភជាច្រើនអំពីការផ្គត់ផ្គង់ថាមពល។
ប៉ុន្តែក្រុមអ្នកស្រាវជ្រាវ ឱ្យដឹងថា ការងាកទៅប្រើថាមពលបៃតងឥឡូវនេះ គឺជារឿងត្រឹមត្រូវ សម្រាប់សេដ្ឋកិច្ច ពីព្រោះតម្លៃនៃថាមពលកកើតឡើងវិញមិនថ្លៃដូចគេគិតពីមុននោះទេ។ លោកសាស្ត្រាចារ្យ Doyne Farmer នៃវិទ្យាស្ថាន សម្រាប់ការគិតពីសេដ្ឋកិច្ចថ្មី នៅសាលា Oxford Martin បានប្រាប់សារព័ត៌មាន BBC ថា៖ «ទោះបីជាគេមិនមែនជាអ្នកដែលជឿលើបញ្ហាអាកាសធាតុក៏ដោយ ក៏គេគួរតែជឿនូវអ្វី ដែលអ្នកជំនាញកំពុងតស៊ូមតិ។ ការសន្និដ្ឋានរបស់យើង គឺថាយើងគួរតែឆ្ពោះទៅមុខយ៉ាងពេញដៃពេញជើងជាមួយនឹងការផ្លាស់ប្តូរទៅអនុវត្តថាមពលបៃតង ព្រោះវានឹងជួយសន្សំប្រាក់កាសរបស់យើង»។
ការរកឃើញរបស់របាយការណ៍ Oxford គឺផ្អែកលើការមើលទិន្នន័យតម្លៃជាប្រវត្តិសាស្ត្រ សម្រាប់ឥន្ធនៈហ្វូស៊ីល និងថាមពលកកើតឡើងវិញ ហើយបន្ទាប់មកធ្វើគំរូពីរបៀប ដែលវាអាចនឹងផ្លាស់ប្តូរ ក្នុងពេលអនាគត។ ទិន្នន័យសម្រាប់ឥន្ធនៈហ្វូស៊ីល រាប់ពីឆ្នាំ២០២០ ទៅជាង ១០០ឆ្នាំមុន បង្ហាញថា បន្ទាប់ពីការគណនាអតិផរណា និងការប្រែប្រួល ទីផ្សារតម្លៃរបស់វា មិនបានប្រែប្រួលច្រើននោះទេ។
ថាមពលកកើតឡើងវិញ បានលេចវត្តមានរយៈពេល ២-៣ទសវត្សរ៍ប៉ុណ្ណោះ ដូច្នេះមានទិន្នន័យតិចជាង។ ក៏ប៉ុន្តែនៅពេលមានការកែលម្អជាបន្តបន្ទាប់នៃបច្ចេកវិទ្យានោះ មានន័យថា ការចំណាយលើថាមពលពន្លឺព្រះអាទិត្យ និងខ្យល់ បានធ្លាក់ចុះយ៉ាងឆាប់រហ័ស ក្នុងអត្រាជិត ១០% ក្នុង ១ឆ្នាំ។
ការរំពឹងទុករបស់របាយការណ៍ដែលថា តម្លៃនៃថាមពលកកើតឡើងវិញ នឹងបន្តធ្លាក់ចុះ គឺដោយផ្អែកលើគំរូ«ប្រូបាប៊ីលីក» (Probabilistic) ដោយប្រើទិន្នន័យអំពីរបៀប ដែលការវិនិយោគធំ និងសេដ្ឋកិច្ចនៃមាត្រដ្ឋាន បានធ្វើឱ្យបច្ចេកវិទ្យាស្រដៀងគ្នាផ្សេងទៀតមានតម្លៃថោកជាង។
«ការស្រាវជ្រាវចុងក្រោយបំផុតរបស់យើង បង្ហាញថា ការពង្រីកបច្ចេកវិទ្យាបៃតងសំខាន់ៗ នឹងបន្តជួយកាត់បន្ថយការចំណាយ ហើយនៅពេលយើងអនុវត្តវាកាន់តែលឿន យើងនឹងសន្សំសំចៃបានកាន់តែច្រើន»។ នេះ គឺជាប្រសាសន៍របស់លោកបណ្ឌិត Rupert Way ដែលជាអ្នកដឹកនាំធ្វើរបាយការណ៍។
ខ្យល់ និងពន្លឺព្រះអាទិត្យ គឺជាជម្រើសធូរថ្លៃបំផុត សម្រាប់គម្រោងថាមពលថ្មី ប៉ុន្តែសំណួរនៅតែមានអំពីរបៀបរក្សាទុកដាក់ថាមពលឱ្យល្អបំផុត និងធ្វើឱ្យមានតុល្យភាពបណ្តាញអគ្គិសនី នៅពេលដែលការផ្លាស់ប្តូរអាកាសធាតុនាំឱ្យធ្លាក់ចុះនូវទិន្នផលថាមពលកកើតឡើងវិញ៕