ប្រជាជនស្រីប្រុសជប៉ុន អាយុចន្លោះពី ១៨ ទៅ ៣៤ ឆ្នាំ មានទំនោរមិនចង់រៀបការច្រើនជាងមុន ខណៈក្រុមអ្នកជំនាញបានទាញសញ្ញាអាសន្នថា និន្នាការនេះនឹងធ្វើឱ្យប៉ះពាល់ដល់កិច្ចប្រឹងប្រែងរបស់រដ្ឋាភិបាលជប៉ុន ក្នុងការដោះស្រាយវិបត្តិប្រជាសាស្ត្រ។
យោងតាមការស្ទង់មតិ ១៧,៣% នៃបុរស និង ១៤,៦% នៃស្ត្រីជប៉ុន អាយុចន្លោះពី ១៨ ទៅ ៣៤ ឆ្នាំ ប្រាប់ថា ពួកគេគ្មានបំណងចង់រៀបការសាងជីវិតគូនោះទេ។ នេះជាតួលេខខ្ពស់បំផុត ចាប់តាំងពីការស្ទង់មតិលើកដំបូង នាឆ្នាំ ១៩៨២ ។
ទំនោរលែងចង់រៀបការកាន់តែច្រើននេះ បណ្តាលមកពីកត្តាមួយចំនួន រួមមានបំណងប្រាថ្នារបស់ស្ត្រីធ្វើការវ័យក្មេង ដែលរីករាយនឹងសេរីភាព ក្នុងជីវិតនៅលីវ និងការមានអាជីព។ រីឯបុរសជប៉ុនវិញ និយាយដែរថា ពួកគេរីករាយនឹងការនៅលីវ។ ពួកគេក៏បានប្រាប់ពីក្តីព្រួយបារម្ភអំពីសុវត្ថិភាពការងារ និងសមត្ថភាពផ្គត់ផ្គង់គ្រួសារដែរ៕