.jpg)
ឡានក្រុងដឹកមនុស្សយកទៅធ្វើចត្តាឡីស័កក្រឡាប់ បានផ្តាច់ជីវិតមនុស្សចំនួន ២៧ នាក់ភ្លាម។
នៅប្រទេសចិន ឡានក្រុងដែលមានដឹកមនុស្សចំនួន ៤៧ នាក់ ដើម្បីទៅធ្វើចត្តាឡីស័ក ស្របតាមវិធានការដ៏តឹងរ៉ឹងរបស់អាជ្ញាធរ បានក្រឡាប់នៅលើបណ្តោយផ្លូវល្បឿនលឿនហ្គ័ងចូវនៃភាគនិរតី នៅព្រឹកព្រហាមថ្ងៃទី ១៨ ខែកញ្ញា ។ នេះបើតាមសេចក្តីប្រកាសរបស់អាជ្ញាធរ ឧបទ្ទវហេតុក្រឡាប់ឡានក្រុងនេះ បានផ្តាច់ជីវិតមនុស្សចំនួន ២៧ នាក់ភ្លាម។
ហេតុការណ៍ក្រឡាប់ឡានក្រុងនេះ កើតឡើងនៅវេលាម៉ោង ២ និង ៤០ នាទីព្រឹក ឈានចូលថ្ងៃទី ១៨ ខែកញ្ញា។ នេះគឺជាគ្រោះថ្នាក់ចរាចរណ៍ដ៏ធំបំផុតប្រចាំឆ្នាំនេះ នៅប្រទេសចិន។ តាមការឱ្យដឹងពីអាជ្ញាធរក្នុងតំបន់ ឡានក្រុងនោះ មានដឹកអ្នកដំណើរចំនួន ៤៧ នាក់ ធ្វើដំណើរចេញពីទីរួមខេត្តហ្គ័ងយ៉ាង ឆ្ពោះទៅកាន់ស្រុកលីដូ បានក្រឡាប់ផ្ងារនៅលើផ្លូវល្បឿនលឿនខេត្តហ្គ័ងចូវ។ បើតាមអាជ្ញាធរ មនុស្ស ២៧ នាក់ ស្លាប់នៅកន្លែងកើតហេតុ។ ចំណែកជនរងគ្រោះ ២០ នាក់ផ្សេងទៀត ដែលមានរបួសធ្ងន់ស្រាលត្រូវបានជួយសង្គ្រោះបញ្ជូនទៅកាន់មន្ទីរពេទ្យ។
ក្នុងហេតុការណ៍នេះ អាជ្ញាធរមិនបាននិយាយអ្វី ដែលទាក់ទងទៅនឹងជំងឺកូវីដ ១៩ ឡើយ ប៉ុន្តែសារព័ត៌មាន ក្នុងស្រុកវិញ អះអាងថា អ្នកដំណើរខេត្តហ្គ័ងយ៉ាងទាំងនោះ បានជួបគ្រោះថ្នាក់ អំឡុងពេលត្រូវបានគេដឹកយកទៅធ្វើចត្តាឡីស័កកូវីដ ១៩។
ខេត្តហ្គ័ងយ៉ាង ដែលមានពលរដ្ឋរស់នៅចំនួន ៦ លាននាក់ ត្រូវបានបិទខ្ទប់ តាំងពីដើមខែកញ្ញាមក ដើម្បីទប់ស្កាត់កូវីដ ខណៈគោលនយោបាយកូវីដសូន្យដ៏តឹងតែងរបស់ចិន បានតម្រូវឱ្យអ្នកពាក់ព័ន្ធទាំងអស់ ត្រូវធ្វើចត្តាឡីស័ក។ ខេត្តហ្គ័ងយ៉ាង ត្រូវបានគេរាយការណ៍ពីករណីឆ្លងជំងឺកូវីដ ១៩ ថ្មីចំនួន ៩០០ ករណី ក្នុងរយៈពេល ២ ថ្ងៃចុងក្រោយនេះ។
ទន្ទឹមនឹងនេះដែរ អ្នកប្រើប្រាស់បណ្ដាញសង្គម បានបង្ហាញការខឹងសម្បា និងទាមទារការពន្យល់របស់អាជ្ញាធរពីមូលហេតុ ដែលឡានក្រុងដឹកអ្នកដំណើរ ១ គ្រឿងនេះ អាចធ្វើដំណើរលើដងផ្លូវនៅព្រលឹមស្រាងៗ នៅពេលដែលផ្លូវធំៗជាច្រើន ក្នុងខេត្ត ត្រូវបានបិទមិនឱ្យធ្វើចរាចរណ៍ធម្មតា។ ហើយព្រោះតែការរឹតបន្តឹងកូវីដ បញ្ជរគិតប្រាក់ នៅតាមដងផ្លូវ ក្នុងខេត្តហ្គ័ងចូវ ចំនួន ១០០ កន្លែង ត្រូវបានបិទចោលទាំងអស់ ហើយការធ្វើដំណើរឆ្លងកាត់វិញ ត្រូវបានហាមឃាត់ចាប់ពីម៉ោង ២ ទៀបភ្លឺ ដល់ម៉ោង ៥ ព្រឹក៕
