.jpg)
សមត្ថកិច្ចចុះទៅត្រួតពិនិត្យទីតាំងកន្លែងកើតហេតុ កាលពីថ្ងៃទី ២១ ខែកញ្ញា។ រូបថត Kyodo
បុរសជប៉ុនម្នាក់ បានដុតខ្លួនឯងនៅក្បែរការិយាល័យនាយករដ្ឋមន្ត្រីជប៉ុន ក្នុងទីក្រុងតូក្យូ នាព្រឹកថ្ងៃពុធ ទី ២១ កញ្ញានេះ ដើម្បីប្រឆាំងតវ៉ា ចំពោះពិធីបុណ្យសពថ្នាក់រដ្ឋសម្រាប់អតីតនាយករដ្ឋមន្ត្រី ស៊ីនហ្សូ អាបេ ដែលត្រូវបានគេធ្វើឃាត កាលពីខែកក្កដា។ នេះបើតាមប្រព័ន្ធផ្សព្វផ្សាយនានា។
ភ្លាមៗបន្ទាប់ពីប្រទេះឃើញបុរសម្នាក់ កំពុងត្រូវភ្លើងឆេះ នៅជិតការិយាល័យនាយករដ្ឋមន្ត្រីជប៉ុន សាក្សីបានទូរស័ព្ទទៅប៉ូលលិស។ ប្រព័ន្ធផ្សព្វផ្សាយក្នុងស្រុកជប៉ុនរាយការណ៍ថា មន្ត្រីជប៉ុន បានពន្លត់ភ្លើង ហើយដឹកយកបុរស ដែលនៅដុតខ្លួននោះ ទៅកាន់មន្ទីរពេទ្យ។
ខណៈពេលនេះ គេនៅមិនទាន់ដឹងនៅឡើយទេ អំពីទំហំនៃរបួស និងស្ថានភាពរបស់បុរសនោះ។ សារព័ត៌មានជប៉ុន គ្រាន់តែរាយការណ៍ថា បុរសនោះ ទំនងជាមានអាយុខ្ទង់ ៧០ ឆ្នាំ។ ជុំវិញហេតុការណ៍នេះ រដ្ឋាភិបាលក្រុងតូក្យូ នៅមិនទាន់អត្ថាធិប្បាយអ្វីឡើយ។
ប៉ុន្តែការប្រឆាំងនឹងពិធីបុណ្យសពថ្នាក់រដ្ឋ សម្រាប់លោក អាបេ បានកើនឡើងជាបន្តបន្ទាប់ ដោយសារការមានការលាតត្រដាងថា ការសម្លាប់រូបលោកអតីតនាយករដ្ឋមន្ត្រីមានជាប់ពាក់ព័ន្ធរឿងរ៉ាវ រវាងគណបក្សប្រជាធិបតេយ្យសេរី ដែលកំពុងកាន់អំណាច និងអង្គការវិហារបង្រួបបង្រួមដ៏ចម្រូងចម្រាសមួយ។
ខ្មាន់កាំភ្លើង ដែលជាឃាតករសម្លាប់លោក អាបេ ធ្លាប់បាននិយាយថា រូបគេខឹងនឹងអង្គការសាសនានេះ ដែលបានបញ្ចុះបញ្ចូលម្តាយខ្លួនឱ្យបរិច្ចាគ រហូតជាប់ផុងក្នុងវិបត្តិហិរញ្ញវត្ថុ។
ពិធីបុណ្យសពរបស់លោក អាបេ នឹងត្រូវប្រព្រឹត្តធ្វើទៅនៅថ្ងៃទី ២៧ ខែកញ្ញា ខាងមុខ។ គេរំពឹងថា ព្រះមហាក្សត្រ ប្រមុខរដ្ឋប្រមុខរដ្ឋាភិបាល និងថ្នាក់ដឹកនាំអន្តរជាតិជាច្រើនរយនាក់ នឹងចូលរួមក្នុងពិធីនេះ។
លោក អាបេ ត្រូវបានបាញ់សម្លាប់ កាលពីថ្ងៃទី ៨ ខែ កក្កដា ក្នុងវ័យ ៦៧ ឆ្នាំ ពេលកំពុងជួយឃោសនាឱ្យបេក្ខជនគណបក្សរបស់លោក សម្រាប់ការបោះឆ្នោតសភាជាន់ខ្ពស់ជប៉ុន។ ការសម្លាប់នាយករដ្ឋមន្ត្រីជប៉ុនដែលកាន់អំណាចយូរជាងគេនេះ ត្រូវបានថ្កោលទោសជា អន្តរជាតិ និងបង្កឱ្យមានការភ្ញាក់ផ្អើល ទូទាំងជប៉ុន ដែលជាប្រទេសមានកំណត់ត្រាអំពើហិង្សា នយោបាយ និងឧក្រិដ្ឋកម្មកាំភ្លើងតិចតួចបំផុត៕
