សារព័ត៌មានសំឡេងប្រជាជនវៀតណាម VOV ផ្សាយថា បណ្តាខេត្តភាគកណ្តាលវៀតណាមបានរៀបចំផែនការជាបន្ទាន់ ដោយត្រៀមខ្លួនជាស្រេច ដើម្បីឆ្លើយតបនឹងព្យុះ Noru ដែលនឹងបោកបក់មក ដើម្បីកាត់បន្ថយការខូចខាត។
ព្យុះទីហ្វុង Noru កំពុងបង្កើនកម្លាំង បន្ទាប់ពីចាកចេញពីហ្វីលីពីន។ បច្ចុប្បន្ននេះវាកំពុងបក់បោកពាសពេញផ្ទៃទឹកសមុទ្រនៃសមុទ្រចិនខាងត្បូង ហើយត្រូវបានគេព្យាករថា នឹងបោកបក់នៅប្រទេសវៀតណាមនៅថ្ងៃទី ២៨ ខែកញ្ញា។ ឆ្នេរសមុទ្រភាគកណ្តាលរបស់ប្រទេសវៀតណាម រួមទាំងទីក្រុង Da Nang នឹងរងការវាយប្រហារដោយផ្ទាល់។ បន្ទាប់មក ព្យុះទីហ្វុងនេះនឹងឆ្ពោះទៅកាន់ប្រទេសថៃ។
រដ្ឋបាលខេត្ត Quang Nam កាលពីថ្ងៃទី ២៥ កញ្ញា បានបញ្ជាឱ្យបណ្ដាតំបន់ឆ្នេរត្រូវជម្លៀសប្រជាជន និងភ្ញៀវទេសចរទៅកាន់កន្លែងមានសុវត្ថិភាព។ អនុប្រធានគណៈកម្មាធិការប្រជាជនខេត្ត Quang Nam លោក HoQuangBuu បានឱ្យដឹងថា៖ «ខេត្ត Quang Nam មានផែនការលម្អិតក្នុងការជម្លៀសប្រជាជន និងភ្ញៀវទេសចរ។
ក្នុងករណីមានព្យុះបោកបក់ខ្លាំង យើងនឹងផ្លាស់លំនៅរបស់ប្រជាជន ១៨២ ០០០ នាក់ នៅក្នុងតំបន់គ្រោះថ្នាក់ ហើយក្នុងករណីមានព្យុះបោកបក់ខ្លាំងជាងទៀត យើងនឹងជម្លៀសប្រជាជន ៤០០ ០០០ នាក់។ រសៀលថ្ងៃទី ២៥ កញ្ញា ភ្ញៀវទាំងអស់ត្រូវបានជម្លៀសទៅកាន់ទីកន្លែងមានសុវត្ថិភាព»។
ប្រភពដដែលលើកឡើងថា កងកម្លាំងយោធានៅទីក្រុង Da Nang បានសម្របសម្រួលជួយអ្នកនេសាទ និងប្រជាជននៅឆ្នេរសមុទ្រក្នុងការបោះយុថ្កា នាំយកទូកចូលច្រាំង និងការពារផ្ទះសំបែងមុនពេលព្យុះបោកបក់។ កម្មាភិបាលនិងយុទ្ធជននៃបញ្ជាការដ្ឋានកងទ័ពការពារព្រំដែន Da Nang បានដាក់ពង្រាយទៅកាន់កំពង់ចំណតទូក ThoQuangខណ្ឌ Son Tra ដោយសម្របសម្រួលជាមួយគណៈគ្រប់គ្រងកំពង់ផែនេសាទ ដើម្បីផ្សព្វផ្សាយ និងស្នើឱ្យម្ចាស់នាវាបោះយុថ្កា និងធានាសុវត្ថិភាព។
ទន្ទឹមនឹងនោះ មូលដ្ឋានជាច្រើននៅខេត្ត ThuaThien Hue បានចល័តកម្លាំង ដើម្បីជួយប្រជាជននៅតំបន់សំខាន់ៗ ជម្លៀសទៅកាន់កន្លែងមានសុវត្ថិភាពនិងរៀបចំផែនការជម្លៀសប្រជាជនចេញពីតំបន់គ្រោះថ្នាក់។ ព័ត៌មានអំពីផ្លូវនិងការឆ្លើយតបទៅនឹងព្យុះទីហ្វុង Noru ត្រូវបានធ្វើបច្ចុប្បន្នភាពជាប្រចាំនៅលើប្រព័ន្ធផ្សព្វផ្សាយសង្គម និងបណ្ដាញសារព័ត៌មានដទៃទៀត៕