.jpg)
ត្រឹមតែប៉ុន្មានថ្ងៃសោះក្រោយពីកងទ័ពឈ្លានពានរបស់រុស្ស៊ីបាត់បង់តុល្យការលើការប្រយុទ្ធជាមួយអ៊ុយក្រែន ពោលគឺបាក់ទ័ព នៅក្នុងសមរភូមិជួរមុខនៃតំបន់ភាគខាងកើតរបស់ប្រទេសអ៊ុយក្រែនមេដឹកនាំរុស្ស៊ីលោក វ្ល៉ាឌីមៀរ ពូទីន បានប្រកាសឡើងពីការកេណ្ឌទ័ពបម្រុងមួយភាគ ដើម្បីយកទៅច្បាំងបន្ថែម។
ក្រឹត្យដែលលោក ពូទីន ចុះហត្ថលេខា និងចូលជាធរមានភ្លាមៗកាលពីថ្ងៃពុធ ទី ២១ ខែកញ្ញា អនុញ្ញាតឱ្យក្រសួងការពារជាតិរុស្ស៊ីអាចប្រមូលកម្លាំងទ័ពបម្រុងឱ្យបាន ៣០០ ០០០ នាក់។ តាមរយៈនេះ វានឹងក្លាយជាការកេណ្ឌទ័ពទៅច្បាំងក្នុងសង្គ្រាមជាលើកដំបូង មិនធ្លាប់មានពីមុនរាប់តាំងពីសង្គ្រាមលោកលើកទី ២។
ការកេណ្ឌទ័ពនេះ ធ្វើឡើងតែ ១ ថ្ងៃប៉ុណ្ណេះ បន្ទាប់ពីតំបន់ដែលគាំទ្រការផ្ដាច់ខ្លួននៅអ៊ុយក្រែនចំនួន ៤ បានប្រកាសយ៉ាងតក់ក្រហល់ពីការធ្វើប្រជាមតិ ដើម្បីអនុញ្ញាតឱ្យរុស្ស៊ី រាប់បញ្ចូលផ្នែកទាំងនោះ ថាជាទឹកដីរបស់ខ្លួនជាផ្លូវការ។ អ្នកវិភាគលោកខាងលិចមើលឃើញថា ប្រសិនបើផែនការនេះសម្រេចតាមការគ្រោងទុកនោះ រុស្ស៊ីអាចនឹងប្រើកងទ័ព ដែលខ្លួនកេណ្ឌបានបន្ថែម ដើម្បីយកទៅធ្វើសង្គ្រាម ដោយសម្អាងយ៉ាងពេញទីលើលេសការពារទឹកដី និងប្រជាជនរុស្ស៊ី ដូចការអះអាងរបស់លោក ពូទីន។
ទោះបីជាយ៉ាងនេះក៏ដោយចុះ ការប្រកាសពីការកេណ្ឌទ័ព ក្នុងលក្ខណៈប្រញាប់ប្រញាល់យ៉ាងដូច្នេះ បង្កឱ្យមានការយល់ឃើញខុសគ្នាៗ។ សម្រាប់អ្នកគាំទ្រក្រុងម៉ូស្គូ ជំហានរបស់លោក ពូទីន នៅពេលនេះ បង្ហាញពីអំណាចរបស់រុស្ស៊ី ប៉ុន្តែសម្រាប់អ្នកគាំទ្រអ៊ុយក្រែន វាគឺជាសញ្ញានៃការចុះខ្សោយរបស់រុស្ស៊ី។ យ៉ាងណាក្ដី ទាំងអស់នេះសុទ្ធសឹងតែជាការយល់ឃើញ និងជាសេណារីយោ ដែលអាចទៅរួចឈរនៅពីក្រោយការកេណ្ឌទ័ពនេះ។
-រុស្ស៊ីកេណ្ឌទ័ព ដើម្បីបង្ហាញសាច់ដុំនៃវិស័យយោធារបស់ខ្លួនលើឆាកអន្តរជាតិ
រាប់ចាប់តាំងពីចុងខែកុម្ភៈមក «ប្រតិបត្តិការយោធាពិសេស» របស់លោក ពូទីន នៅប្រទេសអ៊ុយក្រែនបានអូសបន្លាយអស់រយៈពេល ៧ ខែហើយ ប៉ុន្តែលទ្ធផលនៅតែមិនទាន់សម្រេចបានតាមគោលបំណងរបស់លោក។ ម្ដងហើយម្ដងទៀត លោក ពូទីន រួមទាំងមន្ត្រីក្រោមអំណាចរបស់វិមានក្រឹមឡាំង នៅតែទទូចថា ប្រតិបត្តិការយោធារបស់ខ្លួនកំពុងប្រព្រឹត្តទៅដោយរលូន និងតាមផែនការ ហើយមិនយូរមិនឆាប់ទេ រុស្ស៊ីនឹងឃើញជ័យជម្នះលើការរំដោះតំបន់ដុនបាស នៅអ៊ុយក្រែន។
សុទិដ្ឋិនិយមបែបនេះ អាចជាកម្លាំងចលករ ដែលជំរុញអ្នកគាំទ្រសង្គ្រាមឈ្លានពានអ៊ុយក្រែនរបស់រុស្ស៊ី ក្នុងការយល់ឃើញថា ការកេណ្ឌទ័ព នាពេលនេះជាការបង្ហាញអំណាច និងជាការបង្កើនយុទ្ធសាស្ត្រសង្គ្រាមរបស់រុស្ស៊ី ដែលជាប្រទេសមហាអំណាចយោធាដ៏ធំបំផុតទី ២ របស់ពិភពលោក បន្ទាប់ពីសហរដ្ឋអាមេរិក។ ហើយអ្នកវិភាគលោកខាងលិច ក៏យល់ស្របនឹងការយល់ឃើញបែបនេះផងដែរ ដោយលើកឡើងថា កំណែនទ័ពរបស់រុស្ស៊ីមានប្រយោជន៍ ក្នុងការកម្លា ឬគំរាមដៃគូប្រជែង ក្នុងជម្លោះ។
បើប្រៀបធៀបទៅកងទ័ព ៣០០ ០០០ នាក់ ដែលនឹងត្រូវកេណ្ឌ មានទំហំធំទ្វេដង លើសចំនួនកងទ័ពរុស្ស៊ី ដែលដាក់ពង្រាយនៅក្បែរព្រំដែនអ៊ុយក្រែន មុនចាប់ផ្ដើមការឈ្លានពាននៅខែកុម្ភៈ។ ជាងកន្លះឆ្នាំនៃសង្គ្រាម រុស្ស៊ី បានប្រកាសកាលពីថ្ងៃពុធថា កងទ័ពរុស្ស៊ី ដែលស្លាប់ក្នុងប្រទេសអ៊ុយក្រែនមានត្រឹមតែ ៥ ៩៣៧ នាក់ប៉ុណ្ណោះ។ តួលេខនេះខានចេញផ្សាយតាំងពីចុងខែមីនា (កាលនោះរុស្ស៊ីថា កងទ័ពរបស់ខ្លួនជាង ១ ៣០០ នាក់) និងមានទំហំខុសគ្នាខ្លាំងទៅនឹងតួលេខរបស់អ៊ុយក្រែន ដែលប៉ាន់ស្មាន កាលពីដើមខែកញ្ញានេះថា កងទ័ពរបស់រុស្ស៊ីលើសពី ៥០ ០០០ នាក់ ត្រូវបានសម្លាប់។
ទោះបីជាយ៉ាងណាក៏ដោយ ការបង្ហាញសាច់ដុំលើឆាកអន្តរជាតិនោះគឺថា ប្រសិនបើផែនការកេណ្ឌទ័ពមួយភាគ ធ្វើឡើងយ៉ាងរហ័សតាមគម្រោងនោះ មានន័យថា អំណាចយោធារបស់រុស្ស៊ី នៅតែរឹងមាំ ដូចអ្វីដែលខ្លួនបានឃោសនាពិតមែន មិនថារុស្ស៊ីត្រូវបានបាត់បង់កម្លាំងទ័ពប៉ុន្មានពាន់នាក់នោះទេ។ បើតាមការអះអាងរបស់រដ្ឋមន្ត្រីការពារជាតិរុស្ស៊ី លោក Sergei Shoigu កាលពីថ្ងៃពុធ រុស្ស៊ីមានសក្ដានុពលអាចកេណ្ឌទ័ពទូទាំងប្រទេសបានរហូតដល់ ២៥ លាននាក់ ខណៈដែលរុស្ស៊ីមានកងទ័ពបម្រុង ដែលអាចប្រើសម្រាប់កំណែនរហូតដល់ ២ លាននាក់។
-កេណ្ឌទ័ព ដើម្បីពង្រឹងតួនាទីរក្សាសន្តិភាព
ក្រោយលោក ពូទីន ប្រកាសពីការកេណ្ឌទ័ពជាផ្លូវការ លោក Shoigu អះអាងប្រាប់អ្នកសារព័ត៌មានថា កងទ័ពបម្រុងដែលកេណ្ឌបាននឹងទទួលបានការបណ្ដុះបណ្ដាលលើជំនាញប្រយុទ្ធបន្ថែម មុននឹងដាក់ពង្រាយទៅសមរភូមិប្រយុទ្ធជួរមុខ នៅអ៊ុយក្រែនប្រហែល ១ ០០០ គីឡូម៉ែត្រ។ ជាថ្មីម្ដងទៀត ការប្រកាសដាក់ពង្រាយបែបនេះ ធ្វើឡើងបន្ទាប់ពីកងទ័ពរុស្ស៊ីបាក់ទ័ពនៅសមរភូមិជួរមុខ ទាំងនៅភាគខាងត្បូង និងភាគខាងកើតអ៊ុយក្រែន បន្ទាប់ពីរងការវាយប្រហារពីកងទ័ពវាយបករបស់ក្រុងកៀវ ដែលប្រើជំនួយសព្វាវុធពីលោកខាងលិច។ ជុំវិញការកេណ្ឌទ័ពដដែលនេះ រុស្ស៊ីមិនបានបង្ហាញកាយវិការ ឬពាក្យសម្ដីណាមួយ ចំពោះតួនាទីរបស់ខ្លួន ក្នុងនាមជាអ្នករក្សាសន្តិភាព ក្នុងបណ្ដាប្រទេសអតីតសហភាពសូវៀតនោះទេ។ យ៉ាងណាក៏ដោយ អ្នកវិភាគយោធា និងភូមិសាស្ត្រនយោបាយមួយចំនួនបានលើកឡើងថា ការប៉ះទង្គិចប្រដាប់អាវុធសាជាថ្មី នៅតាមបណ្ដោយព្រំដែននៃប្រទេសអតីតសហភាពសូវៀត ដូចជាអាមេនី-អាស៊ែបៃហ្សង់ និងតាហ្ស៊ីគីស្ថាន-កៀហ្ស៊ីស្ស៊ីស្ថាន អាចជាលទ្ធផលនៃការបាក់ទ័ពរបស់រុស្ស៊ី ក្នុងសមរភូមិ នៅអ៊ុយក្រែន។ អ្នកវិភាគថា ការប៉ះទង្គិចរវាងតាហ្ស៊ីគីស្ថាន-កៀហ្ស៊ីស្ស៊ីស្ថាន កាលពីសប្ដាហ៍មុន អាចជាផលវិបាកមួយលេចចេញពីការដកទ័ពរបស់រុស្ស៊ីពីក្នុងប្រទេសទាំង ២ លរុស្ស៊ីដាក់ពង្រាយតាមរយៈសន្ធិសញ្ញាសន្តិសុខសមូហភាព ( CSTO)។
ចំពោះការប៉ះទង្គិចរវាងអាមេនី និងអាស៊ែបៃហ្សង់ ដែលកើតឡើងនៅសប្ដាហ៍មុនដូចគ្នា អ្នកវិភាគមើលឃើញថា វាអាចជាការឆ្លៀតឱកាសរបស់អាស៊ែបៃហ្សង់ ក្នុងការវាយប្រហារអាមេនី ដែលជាសម្ព័ន្ធមិត្តរបស់រុស្ស៊ី នៅពេលឃើញរុស្ស៊ីទ្រុធទ្រោមនៅអ៊ុយក្រែន ដែលខ្លួនកំពុងជាប់ដៃប្រយុទ្ធ។ ការសន្និដ្ឋានបែបនេះ បង្កឱ្យមានការយល់ឃើញថា ការកេណ្ឌទ័ពរាប់សែននាក់របស់រុស្ស៊ីអាចទប់ទល់នឹងការឆ្លៀតឱកាសដូចអ្វីដែលអាស៊ែបៃហ្សង់ បានធ្វើ។ ហេតុផលនោះគឺថា ទោះបីជារុស្ស៊ីមិនអាចពង្រឹងកម្លាំងទ័ព ឬកងកម្លាំងរក្សាសន្តិភាពរបស់ខ្លួននៅក្នុងប្រទេសទាំងនេះ នាពេលនេះក្ដី ក៏រុស្ស៊ីនៅតែអាចបង្ការការហក់លោតណាមួយ ដែលអាចកើតឡើងនៅថ្ងៃមុខ ប្រសិនបើកំណែនទ័ពរបស់ខ្លួនក្លាយជាយុទ្ធសាស្ត្រ ក្នុងការឈ្នះសង្គ្រាមនៅអ៊ុយក្រែន។
-ការកេណ្ឌទ័ពបង្ហាញថារុស្ស៊ីបាក់ទ័ព ខ្វះកម្លាំង និងកំពុងឈានទៅចាញ់សង្គ្រាម
សម្រាប់អ្នកវិភាគជាច្រើន ជាពិសេសពីលោកខាងលិច ការកេណ្ឌទ័ពរបស់លោក ពូទីន នាពេលនេះ បង្ហាញថា ទីក្រុងម៉ូស្គូកំពុងប្រឈមនឹងកង្វះកងទ័ពខ្លាំង បើទោះបីជាមានកិច្ចខិតខំប្រឹងប្រែងក្នុងការជ្រើសរើសកងកម្លាំងទៅប្រយុទ្ធ នៅសមរភូមិជួរមុខ ដោយរាប់បញ្ចូលទាំងអ្នកទោស និងអ្នកស្ម័គ្រចិត្ត ទាំងឆ្លងកាត់ការបណ្ដុះបណ្ដាលតិចតួច ក៏ដោយក្ដី។ ចំណុចដ៏គួរឱ្យកត់សម្គាល់នោះ គឺថា លោក Shoigu បានអះអាងថា កងទ័ពរបស់រុស្ស៊ីត្រឹមតែជិត ៦ ០០០ នាក់ប៉ុណ្ណេះ ដែលស្លាប់ក្នុងសង្គ្រាម ហើយមន្ត្រីក្រុងម៉ូស្គូផ្សេងទៀត ក៏ទទូចថា ប្រតិបត្តិការយោធាពិសេស ប្រព្រឹត្តទៅដោយរលូនផងដែរ ប៉ុន្តែលោក ពូទីន បែរជាប្រកាសពីការកេណ្ឌទ័ពរាប់សែននាក់យ៉ាងតក់ក្រហល់បែបនេះទៅវិញ។ ការគណនាខុស គឺជាបញ្ហាមួយ សម្រាប់រុស្ស៊ីចាប់តាំងពីសង្គ្រាមចាប់ផ្ដើមមក។ ពីដំបូងៗ រុស្ស៊ីថា ខ្លួនអាចនឹងវាយយកក្រុងកៀវបានត្រឹមរយៈពេល ២ ថ្ងៃយ៉ាងស្រួល ប៉ុន្តែបន្ទាប់ពីប្រយុទ្ធអស់ ១ ខែ រុស្ស៊ីបានដកទ័ពចេញពីតំបន់ជុំវិញក្រុងកៀវ ហើយមកផ្ដុំកម្លាំង ក្នុងការប្រយុទ្ធនៅតំបន់ដុនបាសវិញ ដោយមិនទទួលស្គាល់ការចុះចាញ់នៅទីនោះនោះទេ។
ជាង ៦ ខែនៃសង្គ្រាម ពោលគឺក្នុងខែកញ្ញានេះ រុស្ស៊ីបានដកទ័ពចេញពីតំបន់ខាកៀវ ហើយជាថ្មីម្ដងទៀត រុស្ស៊ី អះអាងដូចគ្នាទៅនឹងអ្វីដែលខ្លួនលើកឡើងជាហេតុផលដូចកាលពីមុន ហើយច្រានចោលការចំអកដែលថា កងទ័ពរុស្ស៊ីបាក់ទ័ព ចោលទឹកដី ដែលខ្លួនចំណាយពេលរាប់ខែ ដើម្បីដណ្ដើមយកពីកងទ័ពម្ចាស់ស្រុក។ ល្បឿននៃការវាយបកដ៏លឿន និងភាពមានប្រៀបរបស់អ៊ុយក្រែនធ្វើឱ្យមានការព្យាករទាំងអ្នកគាំទ្រអ៊ុយក្រែន និងអ្នកគាំទ្ររុស្ស៊ីថា មិនយូរមិនឆាប់ អ៊ុយក្រែននឹងទទួលបានជ័យជម្នះ ហើយរុស្ស៊ីនឹងចុះចាញ់។ រូបភាពបែបនេះ ជំរុញឱ្យមានការរិះគន់យ៉ាងខ្លាំង លើការវិស័យការពារជាតិរបស់រុស្ស៊ីពីអ្នកគាំទ្រក្នុងស្រុករបស់លោក ពូទីន និងស្នើឱ្យលោកបង្កើនកងទ័ព និងផ្លាស់ប្ដូរយុទ្ធសាស្ត្រ ដើម្បីយកឈ្នះអ៊ុយក្រែន។ ស្របពេលដែលការរិះគន់បែបនេះធ្វើឱ្យលោក ពូទីន ប្រថុចញ៉ុច មេដឹកនាំរុស្ស៊ីរូបនេះត្រូវប្រឈមនឹងការខកចិត្តពីសម្ព័ន្ធមិត្តផ្សេងៗទៀត ក្នុងកិច្ចប្រជុំអង្គការសហប្រតិបត្តិការសៀងហៃកាលពីសប្ដាហ៍មុន។
ក្នុងកិច្ចប្រជុំនោះ មេដឹកនាំឥណ្ឌាបានប្រាប់លោក ពូទីន ថា យុគសម័យនេះមិនមែនជាយុគសម័យ សម្រាប់ធ្វើសង្គ្រាមទេ ខណៈលោក ពូទីន ខ្លួនឯងផ្ទាល់ព្រលយថា ចិនមានចម្ងល់ និងកង្វល់ ចំពោះការឈ្លានពានរបស់រុស្ស៊ីនៅអ៊ុយក្រែន។ គ្រប់បញ្ហាទាំងអស់នេះហើយ ដែលអ្នកវិភាគមួយចំនួនអះអាងថា ជាកត្តាមួយ ក្នុងចំណោមផ្សេងទៀត ដែលជំរុញឱ្យលោក ពូទីន បង្កើនភាពតានតឹងនៃសង្គ្រាមដោយការបញ្ជាឱ្យមានការធ្វើប្រជាមតិ នៅអ៊ុយក្រែន ការកេណ្ឌទ័ព និងការព្រមានប្រើប្រាស់អាវុធនុយក្លេអ៊ែរ ដើម្បីដាក់សម្ពាធឱ្យអ៊ុយក្រែនចរចា ឬឆាប់ឃើញការឈ្នះចាញ់ក្នុងសង្គ្រាម។
បើទោះបីជាយ៉ាងណាក្ដី ជំហានទាំងនេះទទួលរងនូវការថ្កោលទោសយ៉ាងធ្ងន់ធ្ងរ លាយឡំនឹងការចំអកពីលោកខាងលិច រួមទាំងអ៊ុយក្រែន ដែលថា ខ្លួនរួមសាមគ្ដីគ្នា ហើយនឹងមិនឈប់ប្រយុទ្ធទេ លុះត្រាតែរុស្ស៊ីដកទ័ពចេញពីប្រទេសខ្លួនទាំងអស់។ មិនត្រឹមតែប៉ុណ្ណេះ ការកេណ្ឌទ័ពរបស់លោក ពូទីន ធ្វើឱ្យផ្ទុះការតវ៉ាក្នុងប្រទេស ដែលសុំឱ្យលោក ពូទីន បញ្ចប់សង្គ្រាម។ ហើយការណ៍នេះ អាចបង្កើតបានជាសេណារីយោផ្សេងទៀតថា កងទ័ពដែលរុស្ស៊ីនឹងកេណ្ឌទៅបន្ថែម នឹងគ្មានទឹកចិត្ត ឬមិនមានស្មារតីគ្រប់គ្រាន់ក្នុងការឈរជើងប្រយុទ្ធ ក្នុងប្រតិបត្តិការឈ្លានពាន ក្រោមបញ្ជារបស់លោក ពូទីន នោះឡើយ៕
