កាលពីថ្ងៃទី ២៦ ខែកញ្ញា ទីភ្នាក់ងារព័ត៌មាន Reuters បានធ្វើសេចក្ដីរាយការណ៍ថា មន្ត្រីរុស្ស៊ីបានបង្ហើបឱ្យដឹងថា ទំនាក់ទំនងជាមួយសហរដ្ឋអាមេរិក ពាក់ព័ន្ធនឹងអាវុធនុយក្លេអ៊ែរ នៅមានជារយៈៗខ្លះៗដែរ បន្ទាប់ពីប្រទេសរុស្ស៊ី ក្លាយជាអ្នកទប់ទល់ទៅវិញ ក្នុងសង្គ្រាមនៅអ៊ុយក្រែន ហើយសហគមន៍អន្តរជាតិបារម្ភថា វាអាចនឹងមានការប្រើប្រាស់អាវុធទំនើបជាងមុន។
អ្នកនាំពាក្យរដ្ឋាភិបាលរុស្ស៊ី លោក Dmitry Peskov បាននិយាយថា ភាគីទាំង២ នៅតែមានការទាក់ទងគ្នា ដោយបើកចំហនូវការផ្ដល់សារឱ្យគ្នាទៅវិញទៅមក ក្នុងករណីសង្គ្រោះបន្ទាន់។
លោក Peskov បាននិយាយថា៖ «ផ្លូវក្នុងការមានទំនាក់ទំនងគ្នា ដែលសមរម្យ តាមលំដាប់ថ្នាក់ នៅតែមានជាធម្មតា។ វាគឺជាការទាក់ទងគ្នា ដោយរយៈខ្លីៗ និងមានកម្រិត។ យ៉ាងហោចណាស់ វានៅមានផ្លូវ ដែលភាគីទាំង ២ អាចប្រើ ដើម្បីបង្ហាញពីជំហររៀងៗខ្លួន»។
ការព្រួយបារម្ភទាំងឡាយ បានកើតឡើង បន្ទាប់ពីមានសេចក្តីថ្លែងការណ៍តាមទូរទស្សន៍របស់ប្រធានាធិបតីរុស្ស៊ីលោក វ្ល៉ាឌីមៀរ ពូទីន ដែលបានរំឭកឡើងវិញនូវការត្រៀមខ្លួនរួចជាស្រេចរបស់រុស្ស៊ី ក្នុងការប្រើប្រាស់អាវុធទំនើបចុងក្រោយ ដោយលោកប្រាប់ថា៖ «មិនបានគំរាមលេងៗនោះឡើយ» ប្រសិនបើរុស្ស៊ីមានអារម្មណ៍ថា អធិបតេយ្យភាព និងបូរណភាពទឹកដី កំពុងត្រូវបានគេឈ្លានពាន។
លោកប្រធានាធិបតី ពូទីន បានប្រាប់ថា រុស្ស៊ីបានត្រៀមខ្លួនជាស្រេច ក្នុងការប្រើអាវុធនុយក្លេអ៊ែរ ដើម្បីការពារប្រទេស និងប្រជាជនរុស្ស៊ី ខណៈដែលមន្ត្រីអាមេរិក បានដាស់តឿនថា រុស្ស៊ីនឹងត្រូវប្រឈមជាមួយផលវិបាកយ៉ាងធ្ងន់ធ្ងរ ប្រសិនបើខ្លួនសម្រេចចិត្តប្រើប្រាស់អាវុធប្រល័យលោកនេះ ក្នុងសង្គ្រាម នៅអ៊ុយក្រែន។
ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា សហរដ្ឋអាមេរិកនឹងតបតយ៉ាងដាច់ខាត ប្រសិនបើរុស្ស៊ីនាំយកអាវុធបែបនេះមកប្រើ ហើយថា អាមេរិក បានជូនដំណឹងជាសម្ងាត់ដល់រុស្ស៊ីថា តើរុស្ស៊ីនឹងត្រូវប្រឈមនឹងផលវិបាកអ្វីខ្លះពីអាមេរិក?
ហើយជាមួយគ្នានេះ លោក Antonio Guterres អគ្គលេខាធិការអង្គការសហប្រជាជាតិ (UN) បាននិយាយដល់ការយកអាវុធនុយក្លេអ៊ែរមកប្រើប្រាស់ ដើម្បីបំផ្លិចបំផ្លាញគ្នា គឺជាអ្វីដែល «មិនអាចទទួលយកបានជាដាច់ខាត»៕
វីដេអូ៖