រដ្ឋមន្ត្រីការបរទេសអាមេរិក លោក អានថូនី ប្ល៊ីនកែន (Antony Blinken) និយាយការពារការលក់សព្វាវុធទៅឱ្យប៉ាគីស្ថាន។ ក្រុងវ៉ាស៊ីនតោន និងអុីស្លាម៉ាបាដ សម្រេចកិច្ចព្រមព្រៀងទិញយន្តហោះចម្បាំង F-16 តម្លៃ $៤៥០ លាន។ ឥណ្ឌាយល់ថា ប៉ាគីស្ថាន អាចនឹងប្រើអាវុធ ដែលទិញពីអាមេិកនេះ ប្រឆាំងខ្លួន។
ក្នុងសន្និសីទសារព័ត៌មាន នៅរដ្ឋធានីវ៉ាស៊ីនតោន កាលពីថ្ងៃអង្គារ លោក ប្ល៊ីនកែន អះអាងថា កញ្ចប់ផ្នែកយោធា ដែលអនុម័តដើមខែនេះ រៀបចំឡើង សម្រាប់ជួសជុលថែទាំកងនាវាប៉ាគីស្ថាន ដែលមានស្រាប់ ហើយវាមិនមានយន្តហោះចម្បាំង ប្រព័ន្ធការពារ ឬអាវុធថ្មីនោះទេ។
លោកបានបញ្ជាក់ទៀតថា៖ «ប៉ាគីស្ថាន ពង្រឹងសមត្ថភាពយោធា ដើម្បីដោះស្រាយការគំរាមកំហែងភេរវកម្ម ដែលចេញពីប៉ាគីស្ថាន ឬក្នុងតំបន់។ វាមិនមែនប្រយោជន៍របស់នរណាទេ បើការគំរាមកំហែងទាំងនោះ នៅបន្តមាន»។
លោក ប្ល៊ីនកែន អះអាងយ៉ាងដូច្នេះ ពេលឈរទន្ទឹមនឹងលោករដ្ឋមន្ត្រីការបរទេសឥណ្ឌា លោក Subrahmanyam Jaishankar ដើម្បីធ្វើសន្និសីទសារព័ត៌មាន ក្រោយជំនួប រវាងរដ្ឋមន្ត្រីទាំង ២ ដែលធ្វើឡើង ១ ថ្ងៃបន្ទាប់ពីលោក ប្ល៊ីនកែន ជួបជាមួយសមភាគីប៉ាគីស្ថាន។
ការអះអាងនេះ ក៏ធ្វើឡើងផងដែរ បន្ទាប់ពីរដ្ឋមន្ត្រីការបរទេសឥណ្ឌា លោក Jaishankar និយាយកាលពីថ្ងៃអាទិត្យថា ជំហររបស់អាមេរិក មិនអាចបន្លំភ្នែកនរណាបានទេ ហើយឥណ្ឌាដឹងថា យន្តហោះចម្បាំង F-16 របស់អាមេរិក នឹងត្រូវយកទៅដាក់ពង្រាយ ដើម្បីប្រឆាំងឥណ្ឌា។ លោកបន្ថែមថា៖ «និយាយដោយត្រង់ចុះ វាជាទំនាក់ទំនង ដែលនឹងបញ្ចប់ទៅ ទាំងមិនបម្រើផលប្រយោជន៍ប៉ាគីស្ថាន ឬក៏អាមេរិកឱ្យបានល្អទេ»។
អាមេរិក បានរក្សាទំនាក់ទំនងរឹងមាំជាមួយឥណ្ឌា និងប៉ាគីស្ថានរយៈពេលជាច្រើនទសវត្សរ៍ បើទោះជាមានបញ្ហាផ្សេងៗ រវាងប្រទេសជិតខាងទាំង ២ ក្ដី។ អ្នកនាំពាក្យក្រសួងការបរទេសអាមេរិក លោក Ned Price ថ្លែងនៅដើមសប្តាហ៍នេះថា ទំនាក់ទំនងអាមេរិក-ឥណ្ឌា និងអាមេរិក-ប៉ាគីស្ថាន ស្ថិតនៅលើផ្នែករៀងៗខ្លួន។
វិស័យយោធារបស់ប៉ាគីស្ថាន ពឹងផ្អែកខ្លាំងលើការផ្គត់ផ្គង់ពីអាមេរិក ប៉ុន្តែទំនាក់ទំនង រវាងភាគីទាំង ២ ធ្លាក់ក្នុងភាពតានតឹងប៉ុន្មានឆ្នាំថ្មីៗនេះ ពិសេសអំឡុងសង្គ្រាម នៅអាហ្វហ្គានីស្ថាន។ ឥណ្ឌាវិញ មានភាពល្អក់កកទាំងបញ្ហាសិទ្ធិមនុស្ស និងការទិញប្រភេទអាវុធរុស្ស៊ី ដែលរំលោភច្បាប់ឆ្នាំ ២០១៧ របស់អាមេរិក។ ៣០ ឆ្នាំចុងក្រោយនេះ អាមេរិក ពង្រឹងទំនាក់ទំនងខ្លាំង ជាមួយឥណ្ឌា ដើម្បីទប់ទល់ឥទ្ធិពលរបស់ចិន ក្នុងតំបន់៕