ខ្យល់ព្យុះសង្ឃរា Ian បានធ្វើដំណើរទៅដល់រដ្ឋហ្វ្លរីដាសហរដ្ឋអាមេរិកនៅរសៀលថ្ងៃពុធ ទី ២៨ ខែកញ្ញា ឆ្នាំ ២០២២ ដោយនាំទៅជាមួយនូវខ្យល់បោកបក់ខ្លាំងភ្លៀងធ្លាក់គំហុកដែលបង្កទៅជាជំនន់ទឹកភ្លៀង។ ជាខ្យល់ព្យុះសង្ឃរាស្ថិតក្នុងកម្រិតទី៤ Ian ត្រូវគេចាត់ទុកថាជាខ្យល់ព្យុះសង្ឃរាដ៏កំណាចបំផុតមួយនៅក្នុងប្រវត្តិសាស្ត្រអាមេរិក ដោយបោកបក់ក្នុងល្បឿន ២៤០ គីឡូម៉ែត្រ ក្នុង ១ ម៉ោង ហើយបានពន្លិច និងបំផ្លិចបំផ្លាញផ្ទះសំបែងព្រមទាំងហេដ្ឋារចនាសម្ព័ន្ធដទៃទៀតនៅក្នុងតំបន់រងគ្រោះ។
គិតត្រឹមយប់ថ្ងៃពុធ ទី ២៨ ខែកញ្ញា ម៉ោងនៅសហរដ្ឋអាមេរិកខ្យល់ព្យុះសង្ឃរា Ian បានបន្ថយកម្លាំងរបស់ខ្លួនពីខ្យល់ព្យុះកម្រិត ៤ មកត្រឹមកម្រិត ២។ នេះបើតាមការវាយតម្លៃពីមជ្ឈមណ្ឌលខ្យល់ព្យុះសង្ឃរាជាតិរបស់អាមេរិក។
ដ្បិតតែថមថយកម្លាំងបន្តិច ប៉ុន្តែខ្យល់ព្យុះនេះនៅតែបង្កឱ្យមានភ្លៀងធ្លាក់ និងទឹកជំនន់ដែលបង្កការរំខានដល់ប្រតិបត្តិការជួយសង្គ្រោះប្រជាពលរដ្ឋ។
អាជ្ញាធររដ្ឋហ្វ្លរីដាបានឱ្យដឹងថា រហូតមកទល់ពេលនេះមានមនុស្សជិត ២ លាននាក់ ត្រូវកាត់ផ្ដាច់ពីចរន្តអគ្គិសនីគិតត្រឹមម៉ោង ១០ យប់ ថ្ងៃពុធ ទី ២៨ ខែកញ្ញា ឆ្នាំ ២០២២ និងថាចំនួននេះអាចនឹងកើនឡើងទៀតនាពេលខាងមុខ។
ការស្ដារចរន្តអគ្គិសនីឡើងវិញនៅតំបន់ដែលត្រូវខ្យល់ព្យុះ Ian វាយប្រហារអាចនឹងត្រូវប្រើពេលជាច្រើនថ្ងៃ ឬត្រូវអូសបន្លាយដល់ច្រើនសប្ដាហ៍ផងជាពិសេសនៅតំបន់ឆ្នេរប៉ែកខាងលិច ដែលទាមទារឱ្យមានការសាងសង់ឡើងវិញតែម្ដង។
ទន្ទឹមនឹងការគ្មានចរន្តអគ្គិសនីប្រើប្រាស់មានមនុស្សជាច្រើនផ្សេងទៀត កំពុងជាប់គាំងនៅក្នុងផ្ទះរបស់ពួកគេដោយសារតែជម្លៀសខ្លួនចេញមិនទាន់។
បើតាមអាជ្ញាធរដដែលគេត្រូវរង់ចាំឱ្យខ្យល់ព្យុះនេះ ថយកម្លាំងបន្តិចសិនទម្រាំក្រុមសង្គ្រោះបន្ទាន់ អាចចូលទៅជួយពួកគេបាន៕